Read Rongmei Naga TATPATMEI 8 Bible Online

TATPATMEI 8 - Rongmei Naga bible

TATPATMEI 8

¹Hei tangv RINGHPOUC rui Mousi khou sa the, “Guangh daeng thangc tatna, RINGHPOUC rui sa e twna kumna sa o, ‘Ata kalum tat khang amei nunc ta titat ro.

²Kaniw ta titat mak ge thei, gou tipadik patna nang kandic ta dandi tii puni.

³Nail duithuak gou rui padikna, mi khoutei rui patna, nang kai khou, nang zykai, nang laeng khou, nang tuang meicdaihmei nunc, khatni nang mei nunc kai khou, nang kai maimangc, khatni nap gan lai khou nganv gou rui padik puni.

⁴Nang khou, nang mei nunc khou, khatni nang tuang meicdaihmei nunc khou gou rui kachakc padik bam puni.’ ”

⁵RINGHPOUC rui Mousi khou sa the, “Aron ta katuang builwang duithuak, duiriang, khatni duikhunc guay ruc khou zay thauna, gou tipatna mi kandic tei gou rui tipadiklou khang sa o.”

⁶Kumna Aron rui katuang builwang dui ruc khou zay thaulou tina, gou pang patna mi kandic tei bam padik the.

⁷Tiki duaih sinmei nunc tei rui ni duaih swna, Izip kandic khou gou tipat the.

⁸Guangh rui Mousi lev Aron ta kaw guangna sa the, “RINGHPOUC khou khaeng tat khang ai rui nang mei nunc ta titat puni the; kumna mi gou guay ta laa ganclou dat khang RINGHPOUC khou huayneylou o.”

⁹Mousi rui daw the, “Nang khang, nang tuang meicdaihmei nunc khang khatni nang mei nunc khang ai rui huayneylou khang kiu kaganv nrianhlou tho. Ai rui huayneylou pwkhou Nail duithuak khou hamhna baihmei bamv khou gou nai dat ni tuang hamh the.”

¹⁰“Nthuanh kiu huayneylou tho,” twna guangh rui daw the. Mousi rui sa the, “Nang rui samei kumcna, ai swlou puni the; khou kiu RINGHPOUC aniw Racguangc kumhmei rav baihmei maek ge twmei nang thay puni.

¹¹Gou guay tei nang, nang tuang meicdaihmei nunc khatni nang mei nunc khou rui tat pat kan ni the. Nail duithuak khou na tei bam puni the.”

¹²Mousi lev Aron tei, guangh khou rui tat pat lana, guangh khou tiguangloumei gou guay tei laa ganclou khang, Mousi rui RINGHPOUC khou huayneylou the.

¹³Mousi rui neymei tei RINGHPOUC rui dawlouna kai khou, kaisangh khou, khatni ramvpuk khou bammei gou guay tei theic ngam the.

¹⁴Izipmei nunc rui mi guay tei kakhuan dai dai khuanlou the; kumna nrumhmei rym rui kandih kapwm namh padik the.

¹⁵Gou tei theic ngam kan pwkhou, RINGHPOUC rui samei kumcna, kamei kalung tanc thau dat the; kumna guangh tei Mousi lev Aron lat tei chulou dat mak khe.

¹⁶RINGHPOUC rui Mousi khou sa the, “Aron ta katuang builwang tei kandih taniang khou baikey khang sa o; kum tithei Izip kandic kabamv kathuic khou taniang rui chagou guanh puni.”

¹⁷Aron rui katuang builwang rui kandih ta kathamv the; kumna Izip kandic kabamv kathuic khou taniang rui chagou guanh the. Hei tei rui maansei nunc khou ni, khouringh nunc khou ni, thuap padik the.

¹⁸Duaih swmei nunc tei kaniw duaic rui chagou sw pat khang karamc the; tiki kaniw ngam mak khe. Kabamv kathuic khou chagou rana di the.

¹⁹“Mi hei Ravguangc rui taanhmei tuang di the!” twna duaih swmei nunc tei rui guangh khou sa the. Kum e tiki RINGHPOUC rui samei kumcna, guangh tei kalung tanc bam de; Mousi lev Aron lat chulou mak ge.

²⁰RINGHPOUC rui Mousi khou sa the, “Nthuanh lauthwan guangh duithuak khou key pwkhou, nang ni thwanzingh duithuak khoutei keyna RINGHPOUC rui sa e twna heikumna sa tho, ‘Ata kalum tat khang amei nunc ta ti tat o.

²¹Nang hei tei nuh mak ge thei, nang khou, nang tuang meicdaihmei nunc khou, khatni nang mei nunc khou, sim pang thouc guangna nang ta dandi tii puni. Izipmei kai guay sim rui padik puni; khatni kandih sim rui thuap liam puni.

²²Tiki amei nunc bammei bamv, Gosen ramv na tei thu nsaekclou puni; hei khou tei thu sim nai lak ge. RINGHPOUC, ai rui mi kandic khou hei taanvtaanc bam e twmei nangniw thay khang, ai rui mi hei taanc puni.

²³Ai rui amei, khatni nang mei twmei khaklangc pat puni. Mi charynmei taanv hei nthuanh pat puni the.’ ”

²⁴RINGHPOUC rui guangh kai khou, khatni katuang meicdaihmei nunc kai guay khou, sim pang daihmei thouc guang the. Sim pang tei rui Izip kandic kapwm sw kasic the.

²⁵Khoutei guangh rui Mousi lev Aron ta kaw guangna sa the, “Nangniw tatna, nangniw rav ta kiuc, mi kandic khou hei kalum o.”

²⁶Khoutei Mousi rui daw the, “Hei tei sw nii mak ge; kalam thu RINGHPOUC aniw Racguangc khang aniw rui khouringh khaeng ti thei, Izipmei laa zih puni de. Aniw rui mi khouringc nunc tei Izipmei nunc howmei bamv khou khaeng pwkhou, Izipmei nunc rui nuh makna, aniw ta ntauh nkwam luai pw lakna cho?

²⁷Aniw khou latdanv tiimei kumcna, aniw rui tazikramv thangc zaeng neih thumh chaeng tatna, RINGHPOUC aniw Racguangc khou khaeng tat kan ni de.”

²⁸Pharao rui sa the, “RINGHPOUC nangniw Racguangc ta kiuc tazikramv thangc khaeng tat khang nuhlou ni the, tiki nangniw ducna tat nuh mak ge kumna akhang ni huayneylou o.”

²⁹Mousi rui daw the, “Ai tat pat rappui lev RINGHPOUC khou huayneylou puni, kumna nthuanh thu sim guay hei nang, nang tuang meicdaihmei nunc, khatni nang mei nunc khou rui tat kan puni the. Tiki nang aniw ta guat datna RINGHPOUC ta khaeng tat khang thingc dat nuh mak khe.”

³⁰Mousi guangh khou tei rui tat patna, RINGHPOUC khou huayney the;

³¹kumna Mousi rui neymei RINGHPOUC rui dawlou the. Sim guay tei guangh, katuang meicdaihmei nunc, khatni kamei nunc khou rui tat kan the; sim akhat na sini maek khe.

³²Kum e tiki ntaw nganvna, guangh tei kalung tanc thau datna, meic nunc ta tei titat dat mak khe.