Read Rongmei Naga TATPATMEI 9 Bible Online

TATPATMEI 9 - Rongmei Naga bible

TATPATMEI 9

¹RINGHPOUC rui Mousi khou sa the, “Guangh khou tei tatna RINGHPOUC, Ibrimei Racguangc rui sa e twna kumna sa ti tho, ‘Ata kalum khang amei nunc ta titat tho.

²Kaniw ta titat mak bam dat re thei,

³nangniw tuang khouringc ruc khou takuanh, kuanniam, guaikuan, guaih, lauziu, khatni ziuh guay ruc khou si sihmei ravpyan tiguang puni.

⁴Ai rui Isaraelmei tuang khouringc lev Izipmei tuang khouringc khaklangc pat puni; kumna Isaraelmei tuang khouringc thu akhat na sini theic lak ge.

⁵Mi hei RINGHPOUC ai rui nthuanh taanh khang dinglou kan the.’ ”

⁶RINGHPOUC kamei rui sa kanmei kumcna, nthuanh thauna Izipmei tuang khouringc kaguayna theic the; tiki Isaraelmei tuang khouringc thu akhat na sini theih mak ge.

⁷Tabui lwnlung pat bam the cho twna guangh rui thanv pwkhou, Isaraelmei tuang khouringc thu akhat na sini theic mak ge twna sa the. Kum e tiki kamei kalung tancna, meic nunc ta tei titat mak ge.

⁸RINGHPOUC rui Mousi lev Aron khou sa the, “Kandih khou rui mbut baankiu padikna ruai thau o. Mousi rui hei tei guangh hu khou kauh thangc nrou ku nina e.

⁹Mbut katunghmei kumcna, Izip kandic kabamv kathuic khou zinlik pat puni; kumna kabamv kathuic khou, hei tei rui suhtakna tipatna, maansei khou ni, khouringh khou ni, asuh tipat puni.”

¹⁰Kumna kaney tei mbut sinna guangh hu khou ding the. Mousi rui hei tei kauh thangc nrou ku tina, hei tei rui suhtakna patna meic nunc khou ni, khouringh khou ni asuh pat the.

¹¹Duaih swmei nunc tei, Mousi hu khou guang ding ngam mak khe; kalam thu kaniw tei ni asuh rui nnau ngam the.

¹²RINGHPOUC rui sa kanmei kumcna, RINGHPOUC rui guangh lung titanclou the; kumna guangh tei Mousi lev Aron lat chulou mak khe.

¹³Khoutei RINGHPOUC rui Mousi khou sa the, “Nthuanh lauthwan thwanzingh guangh ta ariwna, RINGHPOUC, Ibrimei Racguangc rui sa e twna heikumna sa o, ‘Ata kalum khang amei nunc ta titat tho.

¹⁴Kandih nam ruc khou ai kumhmei baihmei maek ge twmei nang thay khang, ntaw thu nang tuang meicdaihmei nunc, khatni nang mei nunc na ta hamhna, nang ta ni ai rui dandi tii puni the.

¹⁵Ai rui nang ta, khatni nang mei nunc ta, ravpyan rui sw kasic khang abaanc zay thau khwan e thei, nangniw ta swmutsutlou kan ni tuang di the.

¹⁶Tiki angamv lyan khang, ai rui nangniw ta tiringclou bam tuang e. Mi hei azanc gaymei kandih kabamv kathuic khou zin lik pat khang e.

¹⁷Tiki nangdai swna, amei nunc ta titat makna bam e.

¹⁸Izip khou lungc thau rap khou rui pat zat makmei tanhmei nrihthai zauclo nthuanh, mi kumhmei ganv khou tiguang puni.

¹⁹Nang tuang khouringc khounac, khatni baih baihmei kapaengc khou naimei guay, kai nungc khou laa gutlou khang latdanv tii la tho. Kapaengc khou bammei maansei, khatni khouringh kapwmna ruc khou, nrihthai key puni; kumna kaniw kapwmna theic puni.’ ”

²⁰RINGHPOUC rui samei tei, guangh tuang meicdaihmei asaekc thu ping the; kumna kaniw bangc nunc, khatni khouringh nunc, kai lungc khou rylou the.

²¹Gaanvsaekc thu, RINGHPOUC lat tei chulou makna, kaniw bangc nunc, khatni khouringh nunc, kapaengc khou ganclou the.

²²Khoutei RINGHPOUC rui Mousi khou sa the, “Nang baanc tingpuk biak thangc zay thau o; kum e thei Izip kandic kapwm, meic nunc, khouringh nunc, khatni ramvpuk thingbang guay khou, nrihthai key puni.”

²³Kumna Mousi rui katuang builwang tingpuk biak thangc zay thau the; RINGHPOUC rui nrihthai tikey the; khatni kandih khou ganh key the.

²⁴RINGHPOUC rui ranvmei nrihthai, tingpalik ganh keymei kazauhna, tiguang the. Hei tei lungc pat rap khou rui Izip kandic khou guangloumei ranvliangmei ting pwanzingh e.

²⁵Izip kandic kapwm khou naimei maansei khatni khouringh kapwmna, nrihthai tei rui siauc kasic ngam the. Phunling phunlu khatni thingbang guay siauc kasic ngam the.

²⁶Nrihthai keylou makmei kiu, Isaraelmei nunc bammei, Gosen ramv khou na khwan e.

²⁷Pharao rui Mousi lev Aron ta kaw guangna kumna sa the, “Ntaw thu, ai paapc taanc the; RINGHPOUC nchumh the; ai khatni amei nunc hei nkhuai the.

²⁸RINGHPOUC khou huayneylou tho! Nangniw ta titat ni the twna ai latdyng sw the; nangniw mi khou hei bam key dat ni tu hamh the.”

²⁹Mousi rui kakhou sa the, “Ai mi kaidai khou rui tat patpui lev abaanc zay thauna, RINGHPOUC khou huayneylou puni. Kandih hei RINGHPOUC tuang e twmei nang thay khang, ganh nthaekc kan puni the; nrihthai key dat ni tu hamh the.

³⁰Tiki nang khatni nang tuang meicdaihmei nunc hei, RINGHPOUC Ravguangc ta ping mak he twmei ai thay e.”

³¹Siupian lev sipian daihmei guay kasic ngam the; hei tei sipian minhmei ganv e, khatni siupian daihmei ngguammei ganv e.

³²Gehu thu minc nkhamh tina kasic mak ge.

³³Mousi guangh khou rui tat patna, kaidai paengc patna, kabaanc zay thauna RINGHPOUC khou huayneylou the. Ganh, nrihthai, khatni ting nthaekc kan the.

³⁴Mi guay tei nthaekc kan pwkhou, kamei paapc taanc dat di he. Kamei khatni katuang meicdaihmei nunc, kahu nungc kumcna, kaniw lung tanc bam de.

³⁵Mousi khou RINGHPOUC rui salou reymei kumcna, guangh tei rui Isaraelmei nunc ta titat mak ge.