Read Rongmei Naga JOB 1 Bible Online

JOB 1 - Rongmei Naga bible

JOB 1

¹Kazanc Job twna kawmeipu gaanv khat Uz kandic khou lungc bam khwan e. Kamei tei Ravguangc ta kalummeipu khatni Ravguangc khang lwm nuhmeipu khwan e. Kamei tei meicgaymei, simei taanh mak khang swna lungc bammeipu khwan e.

²Kanac mpouh gaanv chanei aluh gaanv thumh nai khwan e.

³Katuang khouringc khounac ni lauziu 7000, guaikuan 3000, lau sinmei guaituamchic 1000, khatni kuanniam 500 nai khwan e. Kabangc ni mpeyna nai khwan e kumna kamei tei neihpat biak thangc lungcgay liangmeipu khwan e.

⁴Job nac mpouh nunc tei khat khat kai khou khumngai sw karyna lungc bam khwan e, kumna mi khou tei kaniw tanpui nunc ta ni kawna ngay bam khwan e.

⁵Khumngai luaimei nungc lauthwan kathuic Job tei lauthwan zip thau thuan lana kanac nunc ta tei sw nthan khang kanac pumsing tei khaengna bam khwan e. Kanac nunc tei rui thay makna Ravguangc zaw sw kasicna paapc taanc maanvlou bam kho ni nuh e twna ningna kamei rui khaeng tanh tan bammei tuang e.

⁶Tingkauhmei nunc RINGHPOUC hu khou guangmei tingmik akhat khou Seitaan ni guang kazauh khwan e.

⁷RINGHPOUC rui kakhou thanv the, “Nang tabui thangc rui cho?” Seitaan rui daw the, “Ai hei kandih kapwm khou ruanna kabamv kathuicna khou tatna bammei tuang e.”

⁸RINGHPOUC rui sa the, “Nang abangc Job ta thay dai? Kamei kumcna gaymei khatni lwm nuhmei meic kandih nam ruc khou maek ge. Kamei hei ata kalum e kumna simei twmei hei taanh mak khang swna lunghmeipu e.”

⁹Seitaan rui daw the, “Job rui nang ta nsa khang kalum bam pw nina cho?

¹⁰Nang rui kata, kakai kaikhunc ta khatni katuang naimei kapwm ta gaek bam tina hamhna cho? Nang rui kataanv guay khou suaihiamlou e khatni nang rui katuang ramvpuk guay tei katuang khouringc rui tipadiklou the.

¹¹Nang rui katuang naimei guay tei laa ganc dat kan tizauc, kamei rui nang ta sianglou puni de!”

¹²RINGHPOUC rui Seitaan khou sa the, “Gay the, katuang naimei kaguay tei nang baanc khou tiilou the, tiki kata thu nang kahi nuh mak ge.” Heikumna Seitaan tei tatpat kan the.

¹³Zaeng neih khat Job nac nunc tei kachaic gaanvthaihmei kai khou ngayna bam khou,

¹⁴latpoumei gaanv khat Job khou pak guang the. Mipu tei rui sa the, “Aniw rui guaihpuat sinna lausuak bam khou khatni kuanniam tei kadaeng khou kataek mpacna bam khou,

¹⁵thay mak daekna Sabeanmei nunc guangna mi guay tei laa tat ngam kan the. Kaniw rui nang bangc guay ta ni swluai ngam kan the, arana di the pak duakmei. Nang khou latpoumei khang na kha ai hei duakpatmei tuang di the.”

¹⁶Mipu tei sa suak mak khou rui kabangc gaanv khat guang datna sa the, “Lauziu khatni lauziu gaenghmei nunc khou tei ganh keylouna kaniw theic ngam kan the. Latpoumei khang arana duak patmei tuang di the.”

¹⁷Mipu tei rui sa suak mak khou kabangc baihmei gaanv khat ni guang datna sa the, “Kaldiamei kang kathumh guangna nang bangc guay ta tei dow luai ngamna guaikuan guay tei ni laa tat ngam kan the. Latpoumei khang na ai hei duak pat di the.”

¹⁸Mipu tei rui sa suak mak khou, kabangc baihmei gaanv khat ni guangna sa the, “Nang nac nunc tei kachaic gaanvthaihmei kai khou ngayna bam khwan e,

¹⁹khoutei tazikramv thangc rui pwanzingh dai aliu guang the. Kumna kai tei nliu bow keyna kaniw meic guayna theic ngam kan the. Latpoumei khang na ai hei duak patmei tuang di the.”

²⁰Khoutei Job tei dingthauna kalung kabiuna kaphey siat the. Kamei kapy guat lana kandih khou pun nkhum keyna sa the,

²¹“Ai hei pumtang lungc guangmei tuang de, pumtang hanc dat nina de. RINGHPOUC rui tiilou the, kumna kamei rui laa dat kan the. RINGHPOUC zanc ta thuanc o!”

²²Mi guay khou hei guanglou bam sini Job rui Ravguangc ta nsihna paapc taanh mak ge.