Read Rongmei Naga JOB 10 Bible Online

JOB 10 - Rongmei Naga bible

JOB 10

¹Ai hei ringc bam nii mak khe. Ai rui sa bammei lat hei nkinglou o.

²He Ravguangc, ata nkhuaimei tiswlou rio. Ai rui nkhuaimei kiu tabui tei cho dinclou o.

³Heikumna ata rai bammei hei nang khang neihlamei cho? Nang rui damcloupui mei ta heikumna mala bammei hei. Meicsimei nunc raeng khou tei neihlana nuic bammei hei.

⁴Aniw rui howmei kumcna nang ni how bu cho?

⁵Nang panty ni maansei panty saanv na dina cho?

⁶Kum e thei tabui swna apaap ta phu bam tu cho, akhuay kaguay ta suicna phu bam tu cho?

⁷Akhuay maek ge, khatni meic gaanv khat na rui sini ata nang khou rui kanlou nimei maek ge twmei nang thay e.

⁸Nang baanc rui ata kasiamhlou the, mi baanc kahak tei rui ata sw kasiclou the.

⁹Nang rui ata bih khou rui kasiamhlou the twmei amuclou rio; nang rui ata taniang ti-mbaihlou dat ni thena cho?

¹⁰Ata puanclou nuh khang nang rui apu khou tiilou the; nang rui ata apui nacbamv khou tidaicthaulou the.

¹¹Nang rui arou khatni athuriang guay damclou the arou guay tei zanhtei khatni gih rui duam binlou the.

¹²Nang rui akhang panty tiilouna nzianlou the, kumna nang rui kadanloumei paan rui ai ringcna bam tuang e.

¹³Tiki mi douc tei rui ata sw kasic khang sw bam tuang di the twmei ai thay the.

¹⁴Nang rui ata kuaklou dat mak khang, ai paap taanhmei ta nang zauc bam khwan the.

¹⁵Ai rui paapc taanhpui lev, ata ryanramei khou tikeylou the, tiki ai rui nchumhmei taanc pwkhou hei tei chaklou mak ge. Ai hei ryanra the khatni zak the.

¹⁶Ai rui apy khuang thau ti thei, nang rui ata kamangliangpui kumcna sw key khang sw the; charynmei taanv taancna ata sw kasic the.

¹⁷Aruc khou sakhi sw nimei meic nai the, nang lungpuam aruc khou mbu hay hay thau the; ata sw khang kathiak kathiak swna guang the.

¹⁸He Ravguangc, tabui swna nang ata tipuanc patlou tu cho? Meic thay mak khou ai theic kan e thei gay ni tuang e.

¹⁹Puancpatlouna tarou thangc zutphutna tat datmei suangc khat sini lungclou mak kham e thei gay ni tuang e.

²⁰Apanty hei luai changh luai kan ni the, ata mpatlou tho! Akhang nsaekcloumei dak khou hei amanvna lungclou me.

²¹Ai hei asaanh mak khou tat kan puni the kumna guang dat zat lak khe, zinghmei kandic thangc tat kan puni the.

²²Zinghmei kandic, kasuakc kaguakcmei gaanhmei nai dat makmei zinghmei bamv khou tat kan puni the.