Read Rongmei Naga JOB 11 Bible Online

JOB 11 - Rongmei Naga bible

JOB 11

¹Mi tangv Naamathimeipu Zophar rui mundaw e:

²Mi mpangmei lat guay hei meic dawlou lak khena cho? sa geihmei rui kata ti-nzihlou nina cho?

³Joble, aniw daw ngam ni tuang hamh e twna ningna cho? Kumna nang rui nsicna bammei lat rui aniw mwang thingc puni twna ningna cho?

⁴Nang rui samei hei nchumh e twna nang rui sana bam e; nang hei Ravguangc mikzaw khou nthan de twna sa bam e.

⁵Ravguangc rui dawlou ti thei gayniki twna ai ning e!

⁶Kum e thei, ningting hei kalam mpeyna nai e, maansei rui thay tangh lakmei azuh nai e twna dinclou ni tuang e. Ravguangc rui tii bammei dandi hei nang paap chamv tiimei tuang hamh e.

⁷Ravguangc thukh khatni kangamv tei nang kanganv thay tanghna cho?

⁸Ravguangc khang thu tingpuk hei kanganv hamh e, nang thu hei tei ku tangc ngam mak khe. Ravguangc thu taruaih ta ni thay e, nang thu hei tei thay tangh mak ge.

⁹Ravguangc ramdai thu kandih suangc daic e, duipui suangc ni daic e.

¹⁰Ravguangc rui nang ta nymna latzankai khou phungc ku e thei, kata khaam nimei thow naina?

¹¹Thow thow tei gaeng makpuimei cho twmei Ravguangc rui thay e; kaniw tuang simei taanv guay tei kamei how e.

¹²Nwmbangc kuanniam tei angiw nac puanc pat re thei mpangmei nunc tei ningting dat puni.

¹³Joble, nang lung tei sw ntwn o. Nang baanc tei Ravguangc khou haamv pat ro.

¹⁴Simei khatni gay makmei guay tei nang kai khou rui ganc pat ro.

¹⁵Kum e tw e thei zak tuang makna nang py khuang thau puni the, ping tuang maekna nang ding ntipna ding puni the.

¹⁶Khou kiu nang tuang ryanra guay ta amuc ngam kan ni the, luangc tat kanmei dui ta kumcna amuc kan ni the.

¹⁷Nang panty hei kalaanv neic riw suangc gaanc puni the, zingc liangmei panty sini lauthwan kumc gaanc puni the.

¹⁸Nang ping rouh tuang maekna rigwnmei naina lungc puni the; Ravguangc rui nang ta gaeklou puni khatni tizaengswlou puni the.

¹⁹Nang ta zauczihmei nunc ta nang ping dat lak khe; nkhavlou khang meic mpeyna rui nang khou sa puni the.

²⁰Meicsimei nunc tei kaniw ningmei tangc lamakna zauc ngguicna zauc puni the, kumna kaniw duak nimei chaeng nai lak khe. Theic puni the twmei hei rui kaniw ning nganvloumei kiu di the.