Read Rongmei Naga JOB 12 Bible Online

JOB 12 - Rongmei Naga bible

JOB 12

¹Mi tangv Job rui mundaw dat khwan e,

²Ngguay, nanglat hei meic nunc tuang lat the. Nang theihpui nungc nang ningting ni lay theic kan ni de.

³Tiki nang thaymei tei kumcna ai ni thay muay de; ai nang khang suangc key kasuanmei tuang maek ge; nang rui sa bammei tei meic kaguayna thay bammei tuang de.

⁴Ntaw thu achampanv nunc rui sini ata nuic the; ai hei ravchap tatna khuay maekna bam tisini kaniw rui nuic the; tiki ai rui huayneymei hei Ravguangc rui dawloumei ganv nai puni e.

⁵Nangniw khang ryanramei tuang maek ge, kumlana nangniw rui ata sinnui the; bow nina bammei mei ta nangniw rui bai the.

⁶Kaihouhmei khatni rav ta thay makmei nunc, kaniw tuang pumtan ta kaniw tuang rav swna bammei nunc tei nchu-nrina lungc bam e.

⁷Nruay-thauruay, khouringh khounah rui nganvna nangniw ta nchamlou khang geicna nai e.

⁸Kandih khatni dui khouringc guay khou dinclou o twna thanv tio.

⁹Kaniw ta Ravguangc rui damclou tuang e twmei kaniw thay e.

¹⁰Khouringh khounah katana panty hei Ravguangc baanc khou nai e; maansei panty ni kabaanc khou nai e.

¹¹Tiki thac bumhmei ta nang baley rui kahawmei kumc, nang nu rui ni lat chu nii e.

¹²Gaanvthaih nunc khou ningting nai e, panty lungsingmei rui kabah thaymei phungc guang e.

¹³Tiki Ravguangc khou ningting khatni pumtan nai e kabah thayna chamlou dinclou ngam e. Tiki Ravguangc khou thu ningting ni ngamv ni nai e. Gaanvthaih nunc hei how duc e, Ravguangc khou thu how ducna taanc ngammei ngamv nai e.

¹⁴Ravguangc rui ra key kan pwkhou, thow rui kasiamh thau dat ngam ni thena cho? Ravguangc rui kangloupui mei ta tei thow rui mpatlou ngam nina cho?

¹⁵Ravguangc rui ting tikey mak ge thei tingkaengc the; kamei rui dui mpat pat pwkhou duidai guang the.

¹⁶Ravguangc hei thu tanc e kaganv kathuic ngammeipu e; meic guatpui mei ni meickai rui guatloupui mei ni kabaanc khou nai e.

¹⁷Kamei rui dih sinpouc nunc tuang ningting tei laa gancna, kapy nunc ta mpangmei taanv titaanc e.

¹⁸Kamei rui guangh nunc ta kaniw bamv lou keyna, kaniw ta kangmei tiswlou e;

¹⁹kamei rui amuh nunc khatni ngamv naimei nunc ta ti-nthyam keylou e.

²⁰Ngangvlou nuhmei mei nunc mwang kamei rui thingclou e, khatni gaanvthaih nunc tuang ningting laa ganc e.

²¹Ngamv naimei nunc ta kamei rui tizaklou e, khatni dihsinpouc nunc pumtan laa ganclou e.

²²Theihmei kumcna zinghmei bamv guay khou kamei rui gaanhmei tii guang e.

²³Kamei rui zaatc nunc ta titanc tidaiclou e, kumlana kamei rui kaniw ta zaw tisilouna swmaanlou e.

²⁴Kamei rui kaniw tuang kapy nunc ta ti-mpanglou e kumna kaniw ta kabamv kazy thay makna tiruan amaanlou e;

²⁵kaniw tei zouh zangv mbamei kumcna taruth tarutna zinghmei khou katham tat bam e.