Read Rongmei Naga JOB 13 Bible Online

JOB 13 - Rongmei Naga bible

JOB 13

¹Mi guay ti hei amik rui howtang the khatni anu rui ni chutangna kabah thay the.

²Nangniw rui thaymei tei ai ni thay de, nangniw khou rui ai key kasuan mak ge.

³Ai rui agi bammei thu Ravguangc ta de, nangniw ta hamh e; ai kamei lev twna atuang latbamv khou agi niimei tuang de.

⁴Saraamhmei rui nangniw ta gum bin bam e; nangniw hei meic gaanv khat na ta sini tigay ngam makmei amuc kumc the.

⁵Lat sa riu, kum ti thei nangniw ta meic gaanvsaekc thu ningtyngmei khwang e twna ninglou pwng e!

⁶Ai rui atuang latbamv khou sa bammei hei nkinglou o.

⁷Nangniw tabui swna saraamc bam tu cho? Nangniw tuang saraamhmei rui Ravguangc khang gaeng puni twna ningna cho?

⁸Nangniw Ravguangc ta sa gaek khang sa bam tu cho? Latzankai khou nangniw rui kaphaan agi nina cho?

⁹Ravguangc rui nangniw ta zauc diangcna zauc pw e thei nangniw khou ramh gaymei khat na sini how pat ni tuang hamh e. Nangniw rui maansei ta kumcna Ravguangc ta guat nuh e twna ningna cho?

¹⁰Nangniw tuang ning kasicloumei lung tei nkamhna bam sini, kamei rui nangniw ta luh puni de.

¹¹Kahym rui nangniw ta tipinglou puni de.

¹²Nangniw tuang latkwdyn guay tei mbut kumh tuang de; nangniw rui akhangv bammei guay hei bih tuang rihpan kumh tuang de.

¹³Reih rei bam o kumna ai sa khang kaganv tii o, kum e thei tabui bui pwni akhou patlou nii niimei patlou kan diu.

¹⁴Ai apanty amaan nimei ta ping mak ge.

¹⁵Atuang rigwnmei ni maek khe, Ravguangc rui ata swluai nii pwni ai thu kakhou lwmbam kan ni de cho? Atuang latbamv hei kakhou sa ni the.

¹⁶Arambau rui ata kanlou kho ni nuh de, kalam thu meicsimei thu Ravguangc ta zauc apwan adyang ngam mak ge.

¹⁷Ntaw ai rui samei hei nkinglou o.

¹⁸Alam khou ai sa puni the, kalam thu ai hei nchumh de twmei ai thay e.

¹⁹He Ravguangc, nang ata ti-nkhuai khang guang tu cho? Kum e tw e thei, ai hei lat sa lak khe, reina theic kan ni the.

²⁰He Ravguangc, akhang mi kanei na hei taanclou o, kum e thei ai nang khou nkamh lak khe;

²¹nang baanc akhou rui laa ganclou o, mi meic pingmei tuang taanv hei rui ata sw kasiclou rio.

²²He Ravguangc, nang rui sa rey pw e thei ai daw dat ni, hamh e thei ai rui sa pw e thei nang rui dawlou o.

²³Apaap kiu tabui tei cho? Ai rui taanc nkhuailoumei apaap kiu tabui tei cho? Ai nkhuai e twmei khuay kiu tabui tei cho?

²⁴Nang tabui swna akhou rui nkamh bam tu cho? Tabui swna nang ata zauczihmei ta kumcna sw bam tu cho?

²⁵Nang ata mpin bam tu cho? Ai hei thu thingnuy kumhmei tuang na de, nang rui napgou tang ta adow bammei tuang de.

²⁶Ai rui chabwan douc taancloumei paap tei nganvna nang rui nkhucna hy keylou the.

²⁷Nang rui aphay khou kangriang rui bangclou the; akaamv kaguayna nang zauc the, aphaypav khunc nganvna nang zauc the.

²⁸Hei zaeng rui ati hei thingraamv kumc, nthumc tu ngammei phey kumc ganclou the.