Read Rongmei Naga JOB 14 Bible Online

JOB 14 - Rongmei Naga bible

JOB 14

¹Ntumei khou rui puanhmei maansei hei tingmik tit na lungclou khang de khatni ryanramei rui padik ge.

²Aniu hei daicthau lana mwnpwang kumcna asaanh makna tuai nuangc the; ramh swngna kumcna amaan the.

³He Ravguangc, nang ata zauc sini zauclou lakna cho? Hamh e thei nang ata latzan sw nina cho?

⁴Thow rui nthan makmei puat khou rui nthanmei tipat ngamna cho? Tipat ngammei maek ge.

⁵Maansei tuang panty kamei rui lungclou nimei kabw kaneic reyna dinglou tang the. Nang rui hei tei dinglou tang the, hei tei kalaic dat nuh mak khe.

⁶Kakhou rui zauc mbianghlou tio kumna karana ta mpatlou tio; nuh e thei katuang kunghmei panty hei neihlana lungc kan diu o.

⁷Dowkey kanmei thingbang khang tei ni machunhmei nai de; hei tei kabwan kasatc pat dat nuh de.

⁸Kamaan tei kaguangc keyna kabang tei kandih khou theic keylou sini

⁹ting riu keylou dat pwkhou kabang thanh thau dat puni.

¹⁰Tiki maansei khang thu theihmei tei luaimei di the; kamei theic keyna tabui thangc tat kan tha?

¹¹Luangc taanmei duithuak kumc, thipmei zeic kumc,

¹²meic nunc tei theic the, thau dat mak khe. Tingpuk nai bam saanv kaniw tei thau dat mak khe; kaniw zipchyang thau dat mak khe.

¹³Nang rui ata taruaih thangc nkamhlou pw e thei mu adih gay ni; nang lungpuam luai mak saanv khou tei nkamhlou o, kumlana ata ningtow dat nimei ganv nrianhlou o.

¹⁴Maansei hei theic lana ringc dat puni dai cho? Tiki ai mu gay ranvmei ganv ta nkhwan ni, mi ryanramei ganv hei luaimei ta nkhwan ni.

¹⁵Khou kiu nang rui kaw pwkhou, ai daw ni, kumna nang rui damcloumei ata nang rui pianlou puni.

¹⁶Mi khou kiu akaamv kathuic nang rui zauclou puni, tiki nang rui apaap ta thu suiclou dat lak khe.

¹⁷Nang rui mi guay tei kuaklou puni the khatni ganclou puni the; ai rui taanc maanvloumei guay nang rui thut ganclou puni the.

¹⁸Chyngbut mpangv keymei ganv nai e, khow ni kalaihmei ganv nai e.

¹⁹Dui rui ntauh luangc tyang e, ting rui taniang riu ganc e; heikumna maansei rui lungc niimei machunc tei nang swmaan e.

²⁰Nang rui maansei ta ngamna tingsaengzaeng khang thouc ganc kan the; nang rui kalwn tikalaiclouna thouc ganc kan the.

²¹Kanac nunc tei zaw kauhna guang e, tiki kamei hei tei thay dat mak khe, kaniw zawsina bammei ta ni how dat mak khe.

²²Kapumc khou suhmei na tei kamei thay e, khatni kalung ryanramei na tei kamei thay e.