Read Rongmei Naga JOB 15 Bible Online

JOB 15 - Rongmei Naga bible

JOB 15

¹Mi khou tei Temanmeipu Eliphaz rui mundaw dat the,

²Ningtyngmei rui heikumna gaeng makpui lat sa puni dai?

³Ningtyngmei rui nang samei kumcna sa ni tuang hamh e, mi kumhmei kabah maekmei lat rui karana kata saguc bam ni tuang hamh e.

⁴Nang khang duakmei chaeng nai ti thei meic gaanv khat na sini Ravguangc ta ping ni tuang hamh e; meic gaanv khat na sini Ravguangc ta kalum ni tuang hamh e.

⁵Nang hei meicsimei e twmei nang tuang lat rui nthanna dinc e; nang baley thaymei rui hei tei nkamh khang sw e.

⁶Nang nkhuai e twna ai rui sa dat bam khang maek khe; nang tuang latsa kathuic rui nang nkhuai e twmei dinc e.

⁷Nang hei maansei lungc pat rey liangmei e twna ningna cho? Ravguangc rui chyngbut guay damh khou tei nang bamna cho?

⁸Ravguangc rui taanh khang raengc bammei raeng tei nang thaylouna cho? Ningting hei nang khou na naina cho?

⁹Aniw rui thay makmei nang tabui tuang thaymei naina cho?

¹⁰Aniw tuang ningting hei pypuangh-samngauh nunc— nang pu puanh mak khou rui lungc bammei nunc khou rui nchammei tuang e.

¹¹Ravguangc rui nang ta suamclou niina bam e; nang ta lat mbuaihna sa bammei hei tabui swna nang laa zihna cho?

¹²Tabui swna nang katuan-kalouna lunghpuamcna zauc bam tu cho?

¹³Tabui swna nang lunghpuamcna Ravguangc ta sa kasicna sa bam tu cho?

¹⁴Maansei hei nthan thiak nuh dina cho? maansei hei Ravguangc khou nthuih thik nuh dina cho?

¹⁵Ravguangc rui katuang baanchara nunc ta nganvna lwm mak ge; kaniw tei nganvna kamikzaw khou nthan mak ge.

¹⁶Maansei nunc rui simei ta dui zangv kumc zangv e, ngguay, maansei hei mphuam the, gaeng makmei puat di the.

¹⁷Joble, ai rui samei hei nking o, ai rui thaymei sa puni.

¹⁸Ningtyngmei nunc rui nchumhmei tei akhou dinclou the. Hei tei kaniw pupouc khou rui nchammei tuang e, nkamhloumei tuang khat na sini maek khe.

¹⁹Kaniw tuang kandic khou kandih baihmei meic maek khe, kaniw ta Ravguangc khou rui zay mbianghlou nimei maek khe.

²⁰Meickai ta raina lunghmei meicsimei nunc tei, kaniw ringh saanv ryanrana lungc puni.

²¹Pingna kauhmei khwan rui kanu padik puni the, ramhping-ramhroucmei tuang maekna bampui ganv khou kwamtumei nunc rui guangkwam puni the.

²²Zinghmei khou rui duak pat khang kachaeng nai dat pu lak khe, kalam thu baengsaeng rui ata nkhwan bam the,

²³katuang phouh tei tu khang langdia nunc nkhwan bam the. Katuang theidwan hei zingc the twmei kamei thay the,

²⁴tancbauhmei guangc kumcna, sw kamut kamaimei rui kata nkhwanna bam the.

²⁵Kalam thu kamei baanhpwam ntyngna Ngamparymeipu ta thouh sw makna bam e.

²⁶Kamei thouh sw makna katuang nggih sinthauna Ravguangc ta adow khang pak gut re.

²⁷Kamei kazaw tei kazanc tei rui daic padik ge khatni kasian phai tei kazanctei rui padik ge,

²⁸kamei tei kaidai guay laimeipu e khatni kakaipouc pingna pak kanmei kai nunc tei asut laameipu e. Tiki mi kaidai guay tei rih rui sw kamut kamai puni khatni mi kai guay tei swmaan puni.

²⁹Kamei tei lungcgay saengc lak ge; katuang lanv guay tei tingsaeng lak ge. Katuang twmei ramhkhat na sini nai bam dat lak khe,

³⁰khatni kamei tei zinghmei khou rui duak ngam lak khe. Kamei tei kachy kachaeng mai kau ngammei thingbang kumc, kapwang guay mpwan rui aliu ganc ngammei bang kumc puni the.

³¹Kamei rui mpangna simei khou lwmlou e thei, simei thai kamei laa puni.

³²Kaganv tangh makna kamei ngguaih key puni, theic keyna ndiakc dat zat makmei thingchy kumc puni.

³³Kamei tei kathai nzwmei drakhaluai kumc puni, khatni kapwang nzu ngammei Olive bang kumc puni.

³⁴Rav ta thay makmei nunc tei kakikta nai ni tuang hamh e, lanvbiwmei lanv rui swloumei kai tei mai rui sw kamut kamai puni.

³⁵Kaniw hei sw katuakc katit nimei raeng raengcna simei taanv taanc bammei nunc e. Kaniw lung tei meic guatmei lung rui padik ge.