Read Rongmei Naga JOB 16 Bible Online

JOB 16 - Rongmei Naga bible

JOB 16

¹Mi tangv Job rui mundaw e,

²Mi kumhmei lat guay tei ai chu tang the; nang rui saswm bammei lat hei ata rai bam di the.

³Nang hei nthaekc makna sa bam rap nina cho? Nang rui sa binlou tan ni de twna cho?

⁴Ai hei nang bam khwan, nang hei ai bam khwan e thei, nang rui sa bammei guay tei ai ni sa diu e. Ai rui apy kangwmna amwang khou rui dui bun kumc patna nang ta dui liak bin kumc liak binlou diu e!

⁵Ai rui nang khou lat gaymei nchamlouna nang chaengc tiringclou diu e.

⁶Tiki ai rui sa bammei rui gaengmei tuang maek khe, reih reina bammei rui suhmei hei sw nchumei tuang maek ge.

⁷He Ravguangc, nang rui ata sw kasiclou the, akai kaikhunc kapwm ta swmaanlou the.

⁸Nang rui ata bangclou the; nang ata zauczih the. Ai hei arou lev agic na di the; mi hei akhuay rui the twna meic nunc rui laa the.

⁹Ravguangc rui kalungpuamcna aphay abaanc thaek tap pat the, kamei rui ata karaengmei mikzaw rui zauc the.

¹⁰Meic nunc rui ata nuic the; kaniw rui ata ding nkuayna kaphi the.

¹¹Ravguangc rui ata meicgay makmei nunc baanc khou tiipatlou the.

¹²Ai hei nchu-nrina lungc bam khwan e, tiki Ravguangc rui aruak chakit lana siauc puatlou the. Ravguangc rui ata nchanvpui bamv sw the,

¹³kumna kabamv kathuicna khou rui sauhpailu kaap guang the, hei tei rui ata tow the, kumna ai kabiu the; kum bam khou tei nganvna kamei rui ata nzian mak ge.

¹⁴Kamei rui ata kaluaih kaluaihna tikabiu the, rihmei kumcna ata katwan kaluih the.

¹⁵Ai rui zaengsiphey piuna mbut khou dungcna kapna bam e.

¹⁶Azaw kap haengc ngam the, amik kap puamc ngam the.

¹⁷Ai meic akhat ruc khou baanh keylou tuang maek ge, ai rui Ravguangc khou huayney bammei hei nchumhmei lat de.

¹⁸He kandihle, akhou nkhuaimei taanv taanclou bammei hei nkamhlou rio! Nchumhmei taanclou khang ai rui huayney bammei hei reih reina ganclou rio.

¹⁹Atuang swngpouc tingkauh thangc gaanv khat nai e.

²⁰Achampanv nunc rui ata luh the; kumna Ravguangc khou amikdui luanlailou the.

²¹Thowkumhmei rui kachampanv khang dinglouna samei kumc, akhang rui Ravguangc khou saloumei ta kahaw e.

²²Apanty hei tat kan the, hanc guang dat lakmei chaeng khou tat key the.