Read Rongmei Naga JOB 17 Bible Online

JOB 17 - Rongmei Naga bible

JOB 17

¹Apanty hei luailou zaic puni the. Athiu laa suak ngam mak khe; akhang tarou na hamhna ramh baihmei maek khe.

²Meic kathuicna rui ata sinnuina bammei ta nkhwanna ai zaucna bam e.

³He Ravguangc, ai hei lungning nthanna bam e. Ai rui samei hei nkinglou o. Ai rui samei hei kazuanlounipui mei baihmei maek khe.

⁴Nang rui kaniw tuang kakhanhmei lung tei mbanghlou kan the; kaniw ta aruc khou tina ngamlou rio.

⁵Reynungc latchap khou: gaanv khat rui kachampanv ta syan khang zuanc tu e, kumna kanac nunc rui mi thai tei ryanramei ariw e.

⁶Kumna meic nunc rui mi latchap hei aruc khou salou the; kaniw rui guangna azaw khou ntei nsuklou the.

⁷Ryanramei rui amik-ama ni how mak khe; aphay abaanc hei meic maengcna kumc the.

⁸Lungh nthanmei nunc tei hahlah laa the, kumna ai rav ta thay timakna de twna kaniw rui sa the.

⁹Chakhwang swlou nuhmei nunc e twna bammei nunc tei ni kaniw tei nchumh dyng e twna laa hay hay kan the.

¹⁰Tiki kaniw kaguayna tei ahu khou guang ding pw e thei kaniw pang khou ningtyngmei gaanv khat na sini kadah pat ni tuang hamh e.

¹¹Apanty hei tat kan the; atuang raeng guay guang tangh mak khe; atuang rigwnmei guay amaan ngam the.

¹²Tiki achampanv nunc rui zingbangc ta kalaanv de twna sa e; gaanhmei ana the twna kaniw rui sa e, tiki ai hei zinghmei khou bam e twmei ai thay e.

¹³Atuang machunhmei kiu thu taruaih na di the, khou tei ai hei zinghmei khou aliau keyna zip puni.

¹⁴Tarou ta apu sw puni the, khatni nthanv ta apui khatni atanpui nunc sw puni the.

¹⁵Tabui khou tei ai machunh khang nai hena cho? Ai machunh nuhmei tuang thow how pat bu cho?

¹⁶Ai rui taruaih key pwkhou atuang machunc tei athei lay key ni tuang hamh e.