Read Rongmei Naga JOB 18 Bible Online

JOB 18 - Rongmei Naga bible

JOB 18

¹Mi tangv Shuameipu Bildad rui sa daw dat re,

²Joble, nang hei reih reina bam ngam mak khena cho? Nang rui sa nthaekcna nking pw e thei, aniw ni nang khou salou nii e.

³Aniw hei khouringh kumcna mpangmei de twmei tabui zaeng rui nang ningna cho?

⁴Nang lungpuam rui nang rana nang ta sw kasic bam di the, nang lunghpuamc bam tina kandih ti hei ganclou pw nina cho? Nang ta tipianlou khang Ravguangc rui chyngbut guay ti hei tikalaiclou pw nina cho?

⁵Meicsimei tuang maibwang tei sw amit puni; mi maibwang tei chuangc dat lak khe.

⁶Katuang pheykai khou nai bammei maibwang tei zingc puni.

⁷Katuang phaybamv ntip bam khwan e, tiki ntaw thu kamei phay kalanv the; karana kaphah khou manc the.

⁸Kamei phah khou tatlouna katan manc the;

⁹phah rui kaphaytyang tei khap ntiplou kan the.

¹⁰Phahmun tei kandih bangc khou nkamhlou the; kachaeng khou phah zawlou the.

¹¹Meic pingmei tuang rui kata bam nkuay the; hei tei rui kaphay kaamv kathuic lay suic the.

¹²Kamei lungcgay bam khwan e, ntaw thu kamei ndaapc the; sw kasic-karouc nimei kadaeng khou dingna nkhwan bam the.

¹³Theic nuhmei asuh rui kapumc kapwmna lik the, kaphay kabaanc titaamc the.

¹⁴Katuang pheykai khou giuga makna bammei khou rui kata siatpuatlou the, kumna Theihmei Guangc hu khou zay pat the.

¹⁵Naengv mak khang kakai khou tei maipu zinlou lana guang lungc niimei lungc nuh the.

¹⁶Katuang maan khatni kachy guay ngguaih keyna theic the.

¹⁷Kai khou ni ruan thangc ni kazanc tat taan the; meic gaanv khat na rui sini kata ningtowlou dat mak khe.

¹⁸Kata tei ringhmei kandic khou rui nthau ganc puni the. Gaanhmei khou rui zinghmei khou nthau ganclou puni the.

¹⁹Kakik kata nsaekclou lak khe.

²⁰Neihpat khou rui neihkey nganv kachamv chu tanghmei guay ping kadunh puni the.

²¹Meicsimei ruc khou guanglou nimei kiu hei tei the, Ravguangc ta thouh sw makmei ruc khou keylou nimei kiu.