Read Rongmei Naga JOB 19 Bible Online

JOB 19 - Rongmei Naga bible

JOB 19

¹Mi tangv Job rui sa daw dat the.

²Tabui swna nangniw ata lat rui kumna rai bam tu cho?

³Nangniw rui ata tizak dat zak dat nina cho? khatni zakmei tuang maekna asaanh nangniw ata sa kasicna bam nina cho?

⁴Ai rui taanc nkhuailoumei tuang nai bam khwan sini hei tei rui nangniw khang tabui simei tuang naina cho?

⁵Nangniw hei akhang suangc gay e twna nangniw ning e, ai ryanra bammei hei apaap rui the twna ning e.

⁶Mi hei Ravguangc rui taancloumei tuang e twmei nangniw thay makna cho? Kamei rui akhang phah zawloumei tuang e.

⁷Kamei rui kumna swloumei hei nkhuai e twna ai rui sa pwkhou, meic gaanv khat na sini nkinglou mak ge; nchumhmei taanclou khang ai rui kauhmei tei gaanv khat na rui sini chulou mak ge.

⁸Ravguangc rui achaeng thingc the, kumna ai tat kaan ngam mak khe; kamei rui achaeng zinghmei khou swmaanlou the.

⁹Kamei rui atuang lanv guay laa ganc kan the kumna ahym guay swmaan ngam the.

¹⁰Kamei rui ata kazat kathuicna khou rui sw key the. Atuang machunc guay tei kamei rui kamaan phuk the, kangc keyna theih khang ganclou the.

¹¹Ravguangc rui aruc khou lunghpuamc kasicna puamc the, kamei rui ata katuang zauczih kasicmei ta kumcna sw the.

¹²Ata sw khang kamei rui katuang ricmei thouclou the, kaniw rui rihlin kasiamhna atuang pheykai ta ding bin the.

¹³Ravguangc rui achana nunc ta akhou rui ti-mpaanlou kan the; ata zaw thaymei nunc tei ata thay mak khe;

¹⁴chana punav, champanv chamgay guay ni tat kan the.

¹⁵Atuang gin guay ni ata amuc the; abangcpui nunc rui ata gin ta kumcna sw the.

¹⁶Ai rui abangc ta kaw pwkhou kamei dawlou mak khe, nkhavlou khang sa pwkhou nganvna nkhavlou mak khe.

¹⁷Amunthiu rym hei anow rui nganvna karaeng the, achana nunc rui nganvna guang tuanc nii mak khe.

¹⁸Alauc nunc rui ata mala the kumna kaniw rui ata how pwkhou nuic the.

¹⁹Achampanv dianghmei nunc rui nganvna ata chanyna zauc the; ai rui nzian liangmei nunc tei rui ata karaeng the.

²⁰Arou ta agic na rui sian bammei tuang na di the; ai hei theihmun khou na bam di the.

²¹Nangniw hei achampanv nunc e! Ata zauc nzianlou o! Ravguangc tuang baanc rui ata bai bow key the.

²²Ravguangc rui swmei kumcna nangniw tabui swna ata rai bam nina cho? Nangniw rui ata raimei hei biuh mak hena cho?

²³Thowkumhmei rui atuang lat guay hei ningtowlouna latrik buk khou hy keylou e thei gay ni tuang e!

²⁴Tingsaengzaeng nai bam khang alat guay hei ntauh khou hianlou e thei gay ni tuang e.

²⁵Tiki nganv pwkhou ata kanlou nimeipu ringcbam e twmei ai thay e.

²⁶Agic hei karik-karuc rui tu ngam kan sini mi pumc hei rui ai Ravguangc ta how puni.

²⁷Amik kahak rui ai kata how puni, khou kiu apoubauhmei baihmei sw dat lak khe. Ai hei alung tangkhyn the kalam thu,

²⁸“Aniu akumhna kata rai kho cho?” twna nangniw rui kakhanh the. Ata sw kasic khang rui nangniw kachaeng phu the.

²⁹Ravguangc tuang lungpuam paapc ruc khou phungc guang nimei lat tei ramh thay o, kum pwkhou latzan akhat nai e twmei nang thay puni.