Read Rongmei Naga JOB 2 Bible Online

JOB 2 - Rongmei Naga bible

JOB 2

¹Tingkauhmei nunc RINGHPOUC hu khou guang datmei tingmik akhat khou, Seitaan ni kaniw pang khou kazauh khwan e.

²RINGHPOUC rui kakhou thanv the, “Nang tabui thangc rui guang tu cho?” Seitaan rui daw the, “Ai hei kandih kapwm khou ruanna kabamv kathuicna khou tat bammei tuang e.”

³RINGHPOUC rui sa the, “Nang abangc Job ta thay dai? Kamei kumcna gaymei khatni lwm nuhmei kandih nam ruc khou meic baihmei maek ge. Kamei hei ata kalum e khatni simei taanh mak khang swna lungc e. Kalam akhat na sini maekna kata sw khang nang rui akhou rui ney pat kan the, tiki Job tei kalung kalaih mak ge.”

⁴Seitaan rui daw the, “Puatc guay hei maan kan sini meicpumc theih mak ge thei kiucrap di the.

⁵Nang rui kazanctei khatni karou kahina tikabiu pwkhou kamei rui nang ta sianglou kan ni tuang de!”

⁶Kum tina RINGHPOUC rui Seitaan khou sa the, “Gay the, kata nang baanc khou tiipatlou the, tiki kapanty thu swmaan nuh mak ge.”

⁷Mi tangv tei Seitaan tei RINGHPOUC hu khou rui tat patna Job pumc kapwmna khou asuh tipat the.

⁸Job rui mbut ding khou dungcna katuang asuh tei laikiak rui guanc the.

⁹Kanow rui kakhou sa the, “Nang nang lung ntipna bam ni hena cho? Ravguangc ta siangna theic rap damc the cho!”

¹⁰Job rui daw the, “Mpangmei lat sa riu! Ravguangc rui ramh gaymei tiilou pwkhou neihlana laalou e. Tabui swna ryanramei tiguang pwkhou lunghpuamh bam nina cho?” Job tei kamei heidi ryanra bam sini Ravguangc ta sa kasic zat mak ge.

¹¹Job champanv gaanv thumh nai khwan e. Mi nunc kiu thu: Teman kaidaimei Eliphaz, Shua kandicmei Bildad, khatni Naama kandicmei Zophar hei nunc hei e. Job tei ryanra sihna bam e twmei chamv kaniw rui chu pwkhou, kaniw kadaeng khou guangna saswmlou me twna ning the.

¹²Kaniw guang pwkhou duh thangc rui Job ta phaengc how the, tiki kaniw rui kalwn tei thay mak khe. Kaniw rui kata how pwkhou, kaniw tuang phey siatkaekna, kaniw py khou mbut nroulouna lungh kabiuna kap ranvna kap the.

¹³Khoutei kaniw zingbangc chanei kalaanv chanei lat sa makna kadaeng khou kandih khou dungc nduangh the kalam thu kamei tei adih ryanra cho twmei tei kaniw how the.