Read Rongmei Naga JOB 20 Bible Online

JOB 20 - Rongmei Naga bible

JOB 20

¹Khoutei Zophar rui sa daw the.

²Joble, nang rui anyng tisumc the. Ai daw niimei rui khaeng ngam mak khe.

³Nang rui sa bammei hei tizak bammei tuang e, tiki daw nimei lat ai thay e.

⁴Maansei ta kandih khou damclou rap khou rui thaybam tuang the

⁵Meicsimei nunc khatni rav ta thay makmei nunc neihla suang ngam mak ge.

⁶Kamei tingpuk daic twng bam nuh e, kapy muangh daic tangc bam nuh e,

⁷tiki kata tei mbut ta kumcna aliu ganc kan ni de. Kata thaymei nunc tei rui “Kamei tabui thangc tat kan thena?” twna sa puni de.

⁸Kamei tei mang kumcna amaan kan ni de, kata how dat kanei ni tuang hamh the.

⁹Kamei bammei bamv khou tei kata how dat ni tuang hamh the;

¹⁰lungcsimei khou rui houc guangloumei tei kanac mpouh nunc rui khangclou dat nina e.

¹¹Kapumc tei chabwan swna karav gayna bammei tei, asaanh makna mbut guanh kan puni.

¹²Simei tuang tha-bum tei kamei heidikamv kahawna

¹³nlic ganc khang nzavna kamwang khou mbamh bam e.

¹⁴Tiki hei tei kabung khou key tangc pwkhou nkhucmei mbaih the, nrui khay kumc nkhuc the.

¹⁵Meicsimei tei kamei rui houc guangmei lanv tei nrui pat dat re; Ravguangc rui kabung khou rui nganvna laa pat dat re.

¹⁶Meicsimei rui aluakc gutmei puat tei kakhang ruigam khay kumh tuang e; nrui khay kumcna hei tei rui kata swluai e.

¹⁷Olive thauc tuang duithuak nkhuaihdui khatni guaihnoudui tuang duithuak luanghmei tei ringcna how tangh lak khe.

¹⁸Kamei rui taanc guangloumei guay tei ganclou puni the, katuang lanv tei kamei piutow lak khe,

¹⁹kalam thu kamei rui lungcsimei nunc ta rai e khatni thouh swlou mak ge, khatni meickai rui swloumei kai tei asut laa e.

²⁰Katuang agaamvmei tei pian zat mak ge.

²¹Kamei rui tu pwkhou tu nsaekcloumei tuang maek khe, tiki ntaw thu katuang lunggay guay tei luai the.

²²Katuang lunggay ku nganvmei twan khou rui, ryanramei rith rui kata simpuat paruat key puni the.

²³Kamei rui kahawmei kamv tu kan diu! Ravguangc rui kareic patna kata dandi tii puni. Karuc khou tei tingriu kumc lungpuam bunkey puni the.

²⁴Kamei ntanh tuang baengsaeng khou rui pak duak khang sw pwkhou, tanzinc saucpai rui kata kaap key puni.

²⁵Pailu rui kapumc hui alamv puni the; karaengmei pailu twan khou tei kazei nzuk puni the, kumna pingmei rui kalungthw kakam kumc puni the.

²⁶Kamei rui rykaduailoumei guay tei swmaan puni the, maansei baanc rui ntou makmei mai rui kata khatni kakai kaikhunc kapwm ta raw puni the.

²⁷Tingkauh rui kapaap kalauh puni the, khatni kandih rui karuc khou sakhi sw puni the.

²⁸Ravguangc tuang lungpuam duidai khou katuang lanv guay swmaan ngam puni the.

²⁹Mi hei meicsimei ruc khou keylou nimei tuang kiu the, Ravguangc rui kakhou tiguang nimei kiu the.