Read Rongmei Naga JOB 22 Bible Online

JOB 22 - Rongmei Naga bible

JOB 22

¹Mi khou tei Temanmeipu Eliphaz rui mundaw e,

²maansei hei Ravguangc khang gaeng nuh dina cho? Ningtyngmei ni Ravguangc khang gaenglou nuh dina cho?

³Nang rui nchumhmei taanhmei rui hamh e thei nang meicgaymei swmei rui Ravguangc khang gaenglou nuh dina cho?

⁴Nang rui Ravguangc kata ping timei zaeng rui kamei rui nang ta luh tuang hamh e, khatni nang ta latzan sw tuang hamh e.

⁵Mi hei nang rui paapc taanc geic langv timei zaeng rui e; nang rui simei taanv taanhmei guay zaeng khou tei rui e.

⁶Nang chana khou rui nang pow laa nkuakcna nang rui katuang pheybaan laana kaphey kabaan maekna ganclou the.

⁷Lakmei nunc khang nang dui tii nii mak ge, ndaapcmei nunc ta ni titu mak ge.

⁸Nang tuang ngamv khatni lanv paan khou rui kandih kapwm hei laa khang sw e.

⁹Nang amaypui nunc ta nkhavlou makmei na hamhna nrunac nunc ta sina sw e khatni kaniw tuang asut laa e.

¹⁰Kumhpui zaeng rui ntaw thu nang daeng khou kuamc rana di the, kumna nang khang thay mak daekna pingmei rui padik the.

¹¹Zinghmei rui nang how dat mak khe, duidai rui nang ta daicbin the.

¹²Ravguangc hei kauh liangmei tingpuk khou bamna kauhmei gaanchuangcna guay ruc thangc rui zauc key bam e.

¹³Tiki “Ravguangc rui tabui thayna cho? Kata muangh rui gum zingclou bam diki akumhna kamei rui aniu ta latzan sw nina cho?” twna nang rui sa bam e.

¹⁴Tingpuk kandih ramvrei khou kamei tat bam sini muangh zinghmei rui kamei how ngam mak ge twna nang ningna cho?

¹⁵Meicsimei nunc rui tatna bammei chaeng khou tei nang tat khang nang lung ding thena cho?

¹⁶Kaniw tuang ganv guang tangh mak khou rui kaniw ta tei duidai rui phungc ganc kan the.

¹⁷Mi nunc hei Ravguangc ta laalou makmei nunc e, Ravguangc rui kaniw khou ramh swlou ngam ni tuang hamh e twna ningmei nunc e.

¹⁸Tiki kaniw ta tilungcgayloumei hei Ravguangc rui e— meicsimei nunc tuang lungning tei ai thay e.

¹⁹Meicsimei ta dandi tii pwkhou, meicgaymei nunc rui neihla e khatni khuay maekmei nunc rui zaenggay e.

²⁰Meicsimei nunc tuang guay tei swmaan e, nsaekcloumei guay tei mai rui swmaan e.

²¹Joble, Ravguangc lev latgay dat ro hei kum pwkhou kamei rui nang ta suaihiamlou puni.

²²Kamei rui nchamloumei tei laalou o; kalat guay tei nang lung khou lou o.

²³Ngguay, nang niamh keyna Ravguangc khou hanc guang dat nina e, kumna nang kai khou simei taanv taanc bammei guay tei taanc nthaekc nina e.

²⁴Nang tuang kachaekc guay tei ganc ngam tho, nang tuang kachaekc guay tei duithuak khou kaliang ganclou tho.

²⁵Ngamparymei RINGHPOUC Ravguangc ta nang tuang kachaekc sw o, kumna kata nang tuang khuan padikloumei daandi sw o.

²⁶Kum e thei nang Ravguangc khou lwmlou tanh tanna lungc puni khatni kamei rui nang ta tineihlalou bam puni.

²⁷Khou kiu, nang rui huayney pwkhou kamei rui dawlou puni, kumna nang rui swlou kanmei latryan tei ngaek ngam puni.

²⁸Nang rui karamhmei guay guang tangc puni, kumna nangchaeng khou gaanclou puni.

²⁹Daihriw swmei nunc ta Ravguangc rui zay key e khatni niamhmei nunc ta kanlou e.

³⁰Khuay maekmei nunc ta kamei rui kanlou e, nangtaanv tei nchumh ti thei kamei rui nang ta kanlou puni.