Read Rongmei Naga JOB 23 Bible Online

JOB 23 - Rongmei Naga bible

JOB 23

¹Mi khou tei Job rui mundaw dat the,

²Ai Ravguangc ta nuh makna sana bam e; Ai kalangh bam sini ata tiryanramei thu ranvsih bam di he.

³Ai kata ariw ngam e thei mu, kadaeng khou guangmei chaeng thay e thei mu,

⁴atuang latbamv hei kakhou sa ni tuang e, khatni kata agi ni tuang e.

⁵Kamei rui tabui lat sa puni cho khatni akumhna daw puni cho twmei ai thay nii e.

⁶Ravguangc rui kapumtan guay tei akhou sinsw bam nina cho? Kiuc hamh e, ai sa pwkhou kamei nking puni de.

⁷Ai alungning nthan de; ai Ravguangc lev kaphianh nchamc nuh de; ai hei khuay maek ge twmei kamei rui kauc pat puni de.

⁸Ai rui Ravguangc ta neihpat neihkey phu the; tiki kata ariw mak khe.

⁹Ravguangc hei dihpy dihba khou ni taanvtaanc bam e, tiki ai kata how mak ge.

¹⁰Tiki atuang phaykaamv kathuicna Ravguangc rui thay e, kamei rui ata nchanv zauc pw e thei ai hei nthan de twmei thay puni.

¹¹Kachaeng khou ai tat chuyna tatna bam de, ai tat mbiangh zat mak ge.

¹²Ravguangc tuang latdanv ai piuna bam e; ai kachwn theilayna tat bam e, achwn theilayna tat mak ge.

¹³Kamei hei kalaic zat mak ge. Meic gaanv khat na rui sini kata akhangv ngam mak ge, khatni kata thingc ngam mak ge.

¹⁴Kamei rui akhou swlou ni twmei tei swlou puni; hei tei kakhou nai bammei raeng azuh khou akhat na de;

¹⁵hei zaeng rui ai pingna kahu khou kadunh e.

¹⁶Ravguangc rui alung tinaulou the Ngamparymeipu rui ata tikaluanglou the.

¹⁷Kalam thu ai zinghmei khou paklou the khatni zingc gunh gunmei rui azaw nkamhlou the.