Read Rongmei Naga JOB 24 Bible Online

JOB 24 - Rongmei Naga bible

JOB 24

¹Tabui swna Ravguangc rui latzan swmei ganv khang kaklou mak tu cho, katuang siamruai swmei nunc khang nchumhmei latzan swloumei tingmik khang?

²Maansei rui ramvrei tauc puanc kalaicna ramvdui laa e; kaniw rui lauziu houc guangna lauziu pang khou lou e.

³Kaniw rui nruna nunc tuang kuanniam nunc laa e, khatni swmmaypui nunc tuang guaichic tei pow phaan laa e.

⁴Lungcsimei nunc ta tei kaniw tuang dam tilaa mak ge khatni lungcthuy lakmei nunc ta kaithi kai thangc nthau ganclou e.

⁵Hei kumna lungcsimei nunc tei, nwmbangc kuanniam nunc kumcna tazikramv khou kabung khang phu the; kaniw nac nunc bung khang mpacloumei bamv baihmei maek khe.

⁶Kaniw meic ramcmei lau tayphih the, kumna meicsimei nunc tuang drakhalau khou kathai khuaic the.

⁷Pheybaan khang maekna kaniw zingbangc pumtang zip the, tingsikmei khou rui baanv lumclou khang ramh maek khe.

⁸Chyng khou riu keymei ting rui kaniw tei zuat zuay zuay the, kaniw tautuangc daeng khou kakhuan swna dup kaduai the.

⁹Meicgay makmei nunc rui kapu maekmei ngana nunc ta bangh khang nym e, khatni sansimei nac nunc ta pow phaan laa kuak ge.

¹⁰Kaniw tei pheybaan maekna pumtang tat pat the; lautay khou nganvna kaniw nap ndaapc the.

¹¹Kaniw Olive thauc khatni drakhadui sunc e, tiki kaniw thu tari the.

¹²Kaidai kaidai khou nzamhmei theic pw nina kauc bam e, tiki kaniw rui huayneymei Ravguangc rui chulou mak ge.

¹³Gaanhmei ta laa zihmei mei nunc nai e, kaniw rui mi ta tei thay mak ge khatni hei tei rui zayloumei khou tat mak ge.

¹⁴Meicdowmei tei lauthwan thwanzingh zipthau lana lungcsi lungcroumei nunc ta dow khang tat the khatni kamei zingbangc rui kaihouc the.

¹⁵Nthah-boulahna lungcmaanvmei nunc rui zingc keymei ta nkhwan e; meic how mak khang kazaw gumna tat re.

¹⁶Kaihouhmei nunc rui zingbangc kai kai khou gut re, kalaanv thu gaanhmei khou rui leyna nkamh e.

¹⁷Kaniw rui kalaanv gaanhmei ta ping e, tiki zinghmei khou kaniw ramh ping mak ge.

¹⁸Meicsimei ta duidai rui phungc ganc e, khatni katuang ramv khou tei Ravguangc tuang syang nai e; kumna kamei katuang drakhalau khou taanvtaanc dat mak khe.

¹⁹Neihthiu khou gunh nungc amaanmei kumc, paapcmei nunc ni ringhmei kandic khou rui amaan kan the.

²⁰Ntaw thu kapui rui nganvna ningtow dat mak khe; kata tei nthanv rui tu mutna bow keyloumei thingbang ta kumc swmaan kan the.

²¹Kamei rui amaypui nunc ta sina swmei zaeng rui, kanac maekmeipui nunc ta nzianlou makmei zaeng rui mi hei guanglou tuang e.

²²Ravguangc, katuang pumtan rui ngammei nunc ta swmaan the; Ravguangc rui taanvtaanc pwkhou meicsimei theic the.

²³Ravguangc rui kata giuga makna tilungclou bam nuh e, tiki kata zauc tanh tanna bam e.

²⁴Matat akhat khang meicsimei tei lungcgay bam nuh e, tiki lautay kumc, pucbang dan kumc theic key kan ni de.

²⁵Mi hei kumh mak ge twna sa nimei thow naina cho? Ai rui sa bammei hei nchumh mak ge twmei thow rui lyan ngam cho?