Read Rongmei Naga JOB 26 Bible Online

JOB 26 - Rongmei Naga bible

JOB 26

¹Mi tangv tei Job rui mundaw dat the,

²nangniw rui pumtan makmeipu ta nkhavloudyng the nangniw rui pumtan maekmei nsuanmei baancpwam ta nkhavloudyng the.

³Nangniw rui hei kumhmei lat guay hei dinclou dyng the, mpangmei ai kumhmei khang ningting tiilou dyng the!

⁴Nangniw tuang lat thow rui nkinglou puni twna ningna cho? Hei kumhmei lat hei sa khang thow rui katiulou puna cho?

⁵Kandih bangc thangc dui lungc khou theihmei bumaengc nunc kadunh e.

⁶Ravguangc hu khou thu taruaih ni ndauhphau tuang de; kamik zaw khou rui ramhkhat na rui sini nkamhlou ngam mak ge.

⁷Ravguangc rui dihpy biak tingpuk hei laamv ntyng patlou the kumna kandih ta karaeng khou thaengclou the.

⁸Muangh khou dui tiphungclouna mi tei phak key mak khang swloumei hei Ravguangc rui e.

⁹Kamei rui bwbung ta muangh thei khou nkamhlou the.

¹⁰Duipui khou rui kalang riat ngguiclouna kamei rui zinghmei khatni gaanhmei nzanhlou the.

¹¹Tingpuk ta tung bammei ntiangh guay ta kamei rui kadung pwkhou, kaniw pingna kadunh the.

¹²Duipui ta ngammei tei katuang pumtan rui e; kaningting rui duipui thaanngangc ta swmut the.

¹³Kamunthiu rui tingpuk sw nthanlou the, khatni kabaanc rui pak duak kanmei ravsic ta swluai the.

¹⁴Mi hei kangamv katit na lyanloumei tuang de, aniw rui chumei tei katit na saloumei tuang de. Ravguangc hei heidikamv daic e twmei thow rui sa ngam nina cho?