Read Rongmei Naga JOB 27 Bible Online

JOB 27 - Rongmei Naga bible

JOB 27

¹Job rui kalatdwan tei sa key e,

²Ngamparymei ringcbammei Racguangc, akhou nchumhmei swlou makna apanty ta ryanramei panty tiswloumeipu zanc khou latdyng swna sa e—

³Ravguangc rui athiu tilaalou bam saanv,

⁴amwang khou rui simei lat sa pat lak ge, abaley rui saraamc zat lak ge.

⁵Nangniw nchumh e twna sa zat lak ge; ai hei nchumh de twmei theihmei nganvna dingbam kan ni de.

⁶Ai nchumhna ding bam puni; alung rui mi hei nthanna dinc e.

⁷Ata akhangvna sw bammei nunc ti hei meicsimei, ravchaptat makmei ta kumcna dandi tiilou o.

⁸Rav ta thay makmei nunc ta tei Ravguangc rui kaniw tuang panty laa ni twna sw pwkhou, kaniw khang tabui machunhmei nai dat di hena cho?

⁹Ryanramei guang pwkhou, kaniw rui kapmei khwan tei Ravguangc rui chulou punina cho?

¹⁰Kamei rui tiimei neihla ta tei kaniw kahaw ni tuang e; kaniw kakhou huayney tanh tan bam ni tuang e.

¹¹Ravguangc tuang ngamv hei adih daic cho twmei ai rui nang khou dinclou puni; khatni Ngamparymei Racguangc tuang raeng dinclou puni.

¹²Kiuc hamh e mi guay tei nang kahak rui how kan the; kum e thei tabui swna mi kumhmei kabah maekmei lat hei sa bam tu cho?

¹³Ngamparymei Ravguangc rui meicsimei, meicngam meicliammei nunc ta heikumna dandi tii e.

¹⁴Kaniw nac mpouh geicna puanclou bam nuh e, tiki kaniw ta tei rih khou swluai ngam kan ni de; kaniw nac nunc tei tuzangv khang maekna lungc puni.

¹⁵Theic nsaekcloumei nunc tei ravpyan rui theic puni, kaniw now nunc rui nganvna kaniw theih khou kaplou lak ge.

¹⁶Meicsimei nunc tei kasing chak ngam lakmei dandi nai bam nuh e, pheybaan ni piu ngam lakmei zu nai bam nuh e;

¹⁷tiki mi phey guay tei meicgaymei thow kumhmei rui piu kan puni, khatni lungning nthanmei thow kumhmei rui daandi tei laa puni.

¹⁸Meicsimei rui kakai tei nkupui bou kumc swlou e, lau nkhwanmei kai kumc swlou e.

¹⁹Nkhamhmei swna lungcgaymei akhat swna zip key e, tiki zipthau dat pwkhou katuang lanv guay tei tat ngam kan puni the.

²⁰Pingmei rui dui daih kumc guang puni; pwanzingh rui kaniw ta zingbangc aliu ganc puni;

²¹neihpat pwan rui kaniw ta kaniw kai khou rui aliu ganc puni;

²²kaniw rui pak duak khang kaniw sangrang patna pak bam sini hei tei rui kaniw ta zauzian maekna sw key puni the.

²³Hei tei rui kariuh riuna alay puni, kumna mi tuang sw kamut kamaimei pumtan ta tei kaniw ping puni the.