Read Rongmei Naga JOB 28 Bible Online

JOB 28 - Rongmei Naga bible

JOB 28

¹Daandi chau patmei khunc nai e; kachaekc sw nthanmei bamv nai e.

²Ntanh hei kandih khou rui chau patmei tuang e khatni kuanri tanc hei ntauh khou rui suangc pat re.

³Zingh zinghmei bamv thangc nganv maansei key tangh e. Kaniw rui kandih syng tei phu lana zinghmei khou ntanhtauc phu e.

⁴Maansei lungh makmei bamv thangc, maansei rui tatlou makmei bamv thangc, meic nunc rui ntanh chau e. Khunh lungc khou riang thaengc keyna rimh rimhmei khou taanvtaanc e.

⁵Kandih khou rui nap-bi thau pat re, mi bangc thangc tei thu mai rui kumna swkalaicna bam e.

⁶Ntauhbut khou sapphir tauc nai e, ntanh buay khou kachaekc nai e.

⁷Mouc rui thu kachaekc khunc chaeng tei thay mak ge, langdia rui khou tei samc guang mak ge.

⁸Kamang-chagamh rui ni mi chaeng tei thay mak ge.

⁹Maansei rui ntauh tanhmei tei chau e, kumna chyngbut tei kabamv chau tangclou e.

¹⁰Kaniw rui ntauh lungc khou chau gutna kamanv kunghmei tauc chau pat re.

¹¹Kaniw rui dui puak patpui bamv chau tangcna nkamhlou bammei tei gaanh khou phungc pat re.

¹²Tiki ningting thu tabui thangc rui ariw nina cho? Kabah thaymei tabui thangc rui laatow nina cho?

¹³Ningting hei meic pang khou rui phutow nina hamh e; mi tuang thukh tei meic gaanv khat na rui sini thay mak ge.

¹⁴Duipui syng rui ni kakhou ningting maek ge twna sa e.

¹⁵Ningting hei daandi kachaekc rui ni liu ngam mak ge.

¹⁶Gay liangmei kachaekc kaphut lev ni akhiak nuh mak ge.

¹⁷Mi hei kachaekc suangc kungc e, kachaekc tamkuak suangc ni kungc e.

¹⁸Ningting hei kamanv kungh kunghmei ntauh guay suangc ni kungc e.

¹⁹Kachaekc nthanmei khatni kaphut lev ni kida khang maek ge.

²⁰Kum e thei tabui khou rui ningting laa ni cho? Tabui khou rui kabah thaymei laa nina?

²¹Khouringh rui hei tei how ngam mak ge, nruayna rui ni how mak ge.

²²Theihmei khatni sw kamut kamaimei rui ni hei tei kaniw chu kadaimei tuang na de twna sa e.

²³Ravguangc na rui ningting chaeng thay e, ningting laatow nimei bamv thay e,

²⁴kalam thu kamei kandih tintou nganv how tangh e, tingpuk bangc khou naimei katana ta kamei how e.

²⁵Ravguangc rui mpwan khou ngamv tiilou khou khatni duipui dai riatlou khou;

²⁶Ravguangc kamei rui ting khang latdanv pat khou, khatni ganh khang kachaeng riatlou khou;

²⁷kamei rui ningting ta how the kumna mi thukh tei zauc the— khou tei kamei rui hei tei gay the twna salou the.

²⁸Ravguangc rui maansei khou sa e, “Ravguangc ta pingmei hei ningting kiu the, kabah thaymei guangmei hei simei ta ganc pwkhou rui guang nina e.”