Read Rongmei Naga JOB 29 Bible Online

JOB 29 - Rongmei Naga bible

JOB 29

¹Job rui sa dat re.

²Ravguangc rui zauclou bammei panty tei guang dat pumei ta ai adih kahaw cho!

³Mi douc tei Ravguangc rui ata lamluai tanh tanlouna ai zinghmei khou tatlou pwkhou kamei rui gaanhmei tiilou e.

⁴Mi douc tei ai lungcgay chingkhiuhna bam khwan e, Ravguangc rui akai ta gaeklou bam khwan e.

⁵Mi douc tei Ravguangc rui ata lamluailouna, anac nunc rui adaeng bam padik bam khwan e.

⁶Aguaic, aziuc noudui rui dui luangh kumc bam khwan e, atuang Olive bang guay ni khowtauh ramv khou nganvna thau khwan e.

⁷Kaidai tuang gaanvsuh gaanvthaih guay kariumei sanghbamv khou ai guang pwkhou,

⁸chabwan nunc rui ata howna karei phah pha bam khwan e, gaanvthaih nunc rui dingthauna chakhwang sw bam khwan e.

⁹Kapy nunc ni lat sa mak khwan e;

¹⁰meicdaihmei nunc ni rimh rim bam khwan e.

¹¹Ai rui samei chuloumei khatni ata howmei kathuic rui ai rui taanv gaymei taancloumei lam guay tei racna bam khwan e.

¹²Kalam thu nkhavlou khang samei lungcsimei guay ta nkhavlou khwan e; tatloumei bamv maekmei nruna nac nunc ta nkhavlou khwan e.

¹³Theic kan nina bammei nunc rui ata thuanc khwan e. Ai rui amaypui nunc lung tineihlalou khwan e.

¹⁴Ai rui kaganv kathuicna khou nchumh-nzihmei rui pheybaan piukumc piu khwan e khatni nzihna taanc khwan e.

¹⁵Ai hei mik tiatmei nunc khang mik, kaphay bauhmei nunc khang phay sw bam khwan e.

¹⁶Ai hei lungcsimei nunc pu sw bam khwan e khatni ryanramei ganv khou gin-ga nunc liang ding bam khwan e.

¹⁷Ai rui meicsimei nunc tuang nei swbau khwan e, khatni kaniw baanc khou keyloumei nunc ta asut patlou dat khwan e.

¹⁸Ai hei panty lungsingna lungc pw khang, khatni amanvna kai khou theiclou pw khang agwn bam khwan e.

¹⁹Ai hei kamaan dui timc tanh tanmei kachy zikdui laeng tanh tanmei thingbang kumc bam khwan e.

²⁰Meic kathuicna rui ata thuancna bam khwan e, khatni apumtan kachac key mak bam khwan e.

²¹Ai rui lat sa pwkhou meic nunc rui rimh rimna nkingna bam khwan e;

²²ai rui samei khou tei sa haaplou dat khang makna bam khwan e. Alat guay tei dui rim kumc rim gutlou khwan e;

²³lau taanhmei rui lauphwnswan ting nkhwan kumc meic kathuicna rui alat ta nkhwan bam khwan e.

²⁴Kaniw rui lwmgaymei maek guang pwkhou ai rui kaniw khou nuic rimh rimlou khwan e, neihlamei azawpaanv rui kaniw ta katiu thaulou khwan e.

²⁵Ai rui kapy swna kaniw khang chaeng dinclou bam khwan e, guangh rui karicmei ta chaengzay kumc kaniw ta ai rui zay bam khwan e, khatni kaniw swangmav maek pwkhou ai rui swmlou bam khwan e.