Read Rongmei Naga JOB 30 Bible Online

JOB 30 - Rongmei Naga bible

JOB 30

¹Tiki ntaw thu, akhang suangc alaucmei nunc, kaniw pu nunc ta atuang lauziu gaekmei si pang khou sini thouclou biuh makmei nunc rui ata sinnui the.

²Kaniw tei pumtan maekmei nunc, ataanv ramhkhat na sini taanc ngam lakmei nunc e.

³Kaniw tei lungcsi-lungcroucmei, tu khang maekna thingmaan kang khuaic tuna meic lungh makmei ramvpuk khou zingbangc chaeng ruan tat bammei nunc e.

⁴Kaniw tei ramvkaengv tuang thingbang phuai tu the, kathav kabum maekmei kaigiakraubang maan nganv lanc tu the!

⁵Meic kathuicna rui kaniw ta tei kaihouhmei ta nthau kumc kaucna nthau ganc the.

⁶Kaniw tei khowlang khowlang khou, khunh khunh khou lungc tat the.

⁷Nwmbangc khou kaniw khouringh nunc kumcna rahna tat the, khatni thingphwam bang bangc khou dup kaduai tat the.

⁸Gaeng makmei kaniw zanc sini maekmei kang! Nthau gancloumei nunc kang e.

⁹Ntaw kaniw rui guangna ata nuic bam e; ati hei kaniw tuang kiaula bamv sw the.

¹⁰Kaniw rui ata chanyna sw the; kaniw rui azaw khou nganv teih nsuklou the.

¹¹Ravguangc rui ata tisuanloumei zaeng rui, kaniw lungpuam patna kaniw ata kwam bam e.

¹²Kaniw rui py sowna ata akwam gut the; kaniw rui ata alay the; kaniw rui ata swluai ni the twna sw the.

¹³Kaniw rui ai pak duak nuhmei chaeng guay thingc ngam the kumna ata swmaan khang sw the; kaniw ta khaamlou dat nimei meic maek khe.

¹⁴Atuang rihgaekkai phoukai guay khou rui kaniw luangc gut the kumna aruc khou chamkey the;

¹⁵ai hei pingmei rui padik the; agunc guay hei maan ngam the, alanv guay ni achin kumcna maan kan the.

¹⁶Ntaw thu ai hei theic puni the; aram ryanra hei nchwng key nuhmei bamv maek khe.

¹⁷Zingbangc key e thei arou-aruc suc ngam the; ata nkhih bammei ramh kachiat hei nthaekc mak khe.

¹⁸Ravguangc rui atuang thiula guang bianc the, kumna apheybaan guay kariang kadat kadaengvlou the.

¹⁹Kamei rui ata bih ding khou ndat keylou the; ai hei mphuam tanacmei puat di the.

²⁰He Ravguangc, ai rui nang ta kauc e, nang rui dawlou mak ge; ai rui huayney pwkhou nang nkinglou mak ge.

²¹Nang rui ata si sihna swlou the; nang pumtan kaguay gutna nang rui ata rai the.

²²Nang rui mpwan rui ata tiphungc ganc the; pwanzingh khou nang rui ata tiphungc tat the.

²³Nang rui ata theihmei khou zay keylou puni the twmei ai thay the, ringc bammei khang chamdaanvloumei bamv khou tei zay keylou puni the.

²⁴Hei kumhmei sw kasic-karoucloumei, ngangv bamv maekna nkhavlou khang huayna bammeipu ti hei nangniw tabui swna akwam bam tu cho?

²⁵Ryanramei nunc lev ai kap nchamc kan tu hamhna cho? Lungcsimei nunc khang lungh kabiu kan tu hamhna cho?

²⁶Ai neihlamei khatni gaanhmei ta machunh khwan e, tiki zinghmei lev ryanramei rana guang the.

²⁷Asuh kaphut-kachiatmei hei nthaekc mak khe; tingmik tingmik khou ryanra mbu hay hay guang the.

²⁸Ai hei zinghmei khou, neihriw maekna ruan bam the; ai rui charuangc khou ding thauna nkhavlou khang ney the.

²⁹Akhwan hei asacsi rah kumc, puanmangh rah kumc the.

³⁰Agic guay ni miw ngam the; apumc hei ravman rui maimangh kumc the.

³¹Atuang nrah khwan hei puihuaymei khwan guanh the, atuang alim khwan ni huaymei khwan guanh the.