Read Rongmei Naga JOB 31 Bible Online

JOB 31 - Rongmei Naga bible

JOB 31

¹Tunac akhat ta nthahmei mikzaw rui zauc lak ge twna ai tanhmei latdyng sw the.

²Ngamparymei Racguangc rui aniu khang tabui swlou tha? Akumhna kamei rui maansei tuang taanvphy hei tiilou tha?

³Nkhuaimei taanv taanhmei nunc khang kamei rui ryanramei khatni kamut kamaimei tii guang e.

⁴Ai rui taanhmei kaguayna Ravguangc rui thay e; atuang phaykaamv kaguayna kamei rui thay e.

⁵Ai rui simei taanv taanh mak ge khatni meickai ta guat khang sw mak ge twmei hei syangdyng swna samei tuang e.

⁶Ravguangc rui ata nchumhmei tuang duh khou nthau pwkhou, ai hei khuay maek dyng e twmei kamei thay puni.

⁷Ai hei nchumhmei chaeng khou rui tat mbiangh pat khwan e thei, simei khou tei gutlou khwan e thei, abaanc hei zei rui mphuam khwan e thei,

⁸atuang phunling phunlu guay hei swmaan kan di tho, khatni ai rui lingcloumei phunling hei meic baihmei rui tu kan di tho.

⁹Ai rui kainingmei now ta kahawlou khwan e thei, khatni kainingmei kai kaikhamv thei khou duplou khwan e thei,

¹⁰anow hei meic baihmeipu tuang napgan suangc dat kan di tho khatni meic baihmeipu laeng khou zip kan di tho.

¹¹Mi kumhmei meicsimei ti hei theihmei rui dandi tii nina e.

¹²Hei tei rui sw kamut kamaimei maikwam tuang mai kumcna atuang naimei kaguayna raw mutsutlou puni.

¹³Abangc akhat rui kakhang kunghmei naina akhou sa pwkhou ai rui hei tei nking e kumna laalou e.

¹⁴Ai kumh mak khwan e thei, akumhna ai Ravguangc ta zaw puanc adyang ngam nina cho? Ravguangc rui ata latzan sw pwkhou ai tabui sa ngam nina cho?

¹⁵Ata damhmei Racguangc tei rui abangc nunc ta ni damhmei tuang de.

¹⁶Ai rui lungcsimei ta nkhavlou makna taan mak ge; amaypui nunc ta ni kaniw rui kahawmei tiguang tangh makloumei tuang maek ge;

¹⁷khatni ai tu lana nruna nunc ta ti-ndaapcloumei tuang maek ge.

¹⁸Ai chabwan panty khou rui khatni alauc khou rui thauna kaniw ta kadanlou khwan e.

¹⁹Thowkumhmei rui lungcsina pheybaan liubow lakna bam e thei,

²⁰atuang lauziu khou rui kasiamhmei ramh hiw phey tiilou e. Khoutei kamei kalungsyng khou rui ata thuancna tat kan e.

²¹Latzan kai khou ai rui ngam diu e twna nruna nac ta guatloumei tuang nai e thei,

²²abaanc bau kan di tho; aboukhuak khou rui bau bat tat kan di tho.

²³Kalam thu ai Ravguangc tuang dandi ta ping e, ai hei kumhmei taanv hei taanc bam bauh mak ge.

²⁴Ai syan lanv khou lwmlou mak ge

²⁵khatni lungcgay chingkhiuhmei khou agaengh sw mak ge.

²⁶Ai rui neihmik ta karang e twna kalum mak ge, bw ta ni how gay e twna kalum mak ge.

²⁷Bwneih ta kalum khang alung mbiangh pat mak ge, khatni bwneih ta kalumna abaanc kaput mak ge.

²⁸Mi kumhmei pat khang hei theihmei dandi tii nina e; hei tei Ngamparymei Racguangc ta nuh makmei e.

²⁹Ata zauczihmei rui ryanra pwkhou ai neihlalou zat mak ge, kaniw khou kamut kamaimei guanglou pwna ai neihla zat mak ge.

³⁰Kaniw theic kan khang huayneyna ai paapc taanh mak ge.

³¹Ai rui gin-ga ta neihlana laalou e twmei ai lev taanvtaanc nchamcmei guay rui thay e.

³²Ai rui gin-ga ta akai khou tibangv e, kaniw ta zingbangc chaengluang khou tizip zat mak ge.

³³Meic gaanvsaekc rui kaniw tuang paap nkamh khang sw e, tiki ai thu apaap nkamh mak ge.

³⁴Meic nunc rui tabui sa puni cho twna ai ping mak ge; kaniw rui luhlou pwng e twmei pingna kaikwn khou dupna reih reina bam mak ge.

³⁵Ai rui sa bammei hei meic gaanv khat na sini chulou lakna cho? sa bammei lat guay hei nchumhmei e twmei syangdyng swna samei tuang e. Ngamparymei Racguangc rui ai rui samei hei dawlou pw diu o. Ata zauczihmei nunc hei rui aruc khou nkhamloumei khuay guay hei ai howna bam khang hy keylou e thei gay ni tuang e.

³⁶Hei tei rui agaengh swna abou khou phungc ni tuang e khatni apy khou pyrun swna run ni tuang e.

³⁷Ai rui taanhmei guay Ravguangc khou poulou ni tuang e, khatni kahu khou azaw kauh khamh kham bam ni tuang e.

³⁸Ai rui taanc bammei lau hei houcloumei tuang lau khwan e thei khatni kakaipouc khou rui asutloumei tuang khwan e thei,

³⁹kumna mi khou tei rui nthaimei nap-bi tei nsa ai tu lana kakaipouc tei ndaapc lyn bam e thei,

⁴⁰khou tei gehu khatni sipian phaan pucbang sauhbang thau lyn kan di tho. khou hei Job lat nganvlou the.