Read Rongmei Naga JOB 32 Bible Online

JOB 32 - Rongmei Naga bible

JOB 32

¹Job kamei tei kakhuay maek ge twna sa ngam timei zaeng rui, kaniw gaanv thumh tei daw taan the.

²Job kamei nchumh de, nkhuaimei thu Ravguangc de twna sa bammei tei kadaeng khou ding bammei Elihu rui chu lana kalungpuam tei kamei khaam ngam mak khwan the. (Elihu hei Ram puinacmei, Buz kiktamei, Barakel rui puanhmei mpouh e.)

³Kamei rui Job champanv gaanv thumh ta tei ni lungpuamc the. Kalam thu kaniw rui Job nkhuai the twna sa bam sini kalat mundaw thaymak khwan e.

⁴Elihu tei kaniw pang khou alauc liang la mei zaeng rui kaniw guay tei saluai kanmei ta nkhwanna bam khwan e.

⁵Kaniw gaanv thumh tei rui Job tuang lat tei daw ngam mak ge twmei kamei rui how pwkhou kamei kalungpuamcna

⁶sa thau the. Ai thu alauc de, nangniw thu gaanvthaih di the, kumhpui zaeng rui ai rui sa nimei tei sa khang rouhmei tuang nai the.

⁷Tingmik guay hei rui khatni tingkwm guay hei rui ningting dinclou nina de twna ai sa khwan e.

⁸Tiki maansei khou guangna ningting tiiloumei thu Ngamparymei Racguangc tuang bumaengc rui de.

⁹Gaanvthaihmei rui ningting rapmei tuang hamh e, khatni nchumhmei thay rapmei tuang hamh e.

¹⁰Kumhpui zaeng rui ai rui samei hei nkingloumei ta laa nii e; ai rui ningmei salou nii e.

¹¹Nangniw rui sa bam khou tei ai akhaengvna nking kan the, ningting latkaeng phu bam khou tei nkhwan kan the.

¹²Ai nking mincna nking the kumna nangniw sa ngam kan makmei ta chu the; Job rui samei tei nkhuai e twna nangniw sa ngam kan mak khe.

¹³Aniu ningting laatow the twna sa riu kalam thu Ravguangc rui maansei ningting rui hamhna sinriap kan puni de.

¹⁴Job rui sa bammei tei nangniw khou de, akhou hamh e, tiki nangniw kumcna thu ai daw lak ge.

¹⁵Joble, kaniw khang lat maek khe; kaniw nang lat daw ngam mak khe.

¹⁶Kaniw rui sa bammei ta ai nkhwan bam kho twna cho? Kaniw ramh baihmei lat sa kadai khang maekna ding bam the.

¹⁷Ngguay, ai daw me kumna ai rui ningmei salou me.

¹⁸Kalam thu akhang sa khang padik the, alung rui katiu bammei hei khaam ngam mak khe.

¹⁹Ai hei salou mak ge thei, drakhadui thanh khau puak bak kumc puni the.

²⁰Ai akhaengv ngam mak khe; ai sa rap nina di the.

²¹Ai rui meic gaanv khat na biak sini liangc lak ge, ai meic gaanv khat na ta sini thuanc lak ge.

²²Ai meic kai ta kapaengc khou na sa chuy bam thay mak ge, kumna sw e thei Ravguangc rui ata dandi tii puni de.