Read Rongmei Naga JOB 33 Bible Online

JOB 33 - Rongmei Naga bible

JOB 33

¹Kumhpui zaeng rui Joble, ai rui ntaw sa nimei lat hei nking chuyna nkinglou o.

²Zauclo ai amwang hahpat the; amwang khou naimei abaley rui sa puni the.

³Ai rui sa nimei hei lungning nthanna sa nimei tuang e, nchumhmei lat tei sa puni.

⁴Ravguangc tuang bumaengc rui ata damclou the khatni akhou ringhmei tiilou the.

⁵Nang rui daw ngam diw e thei daw o. Nang rui daw akhangv nimei lat kiu chamdaanv tho.

⁶Nang ni ai ni Ravguangc mikzaw khou nchamc de, nang ta ni ata ni bih rui kasiamhmei tuang de.

⁷Hei zaeng rui nang ata ping khang maek ge; ai rui nang ta nym bin bam ni tuang hamh e.

⁸Nang rui kumna sa kanmei ta ai chu the:

⁹“Ai nkhuai mak ge; ai simei taanv khat na sini taanh mak ge. Ai akhuay maek ge, akhou paapc maek ge.

¹⁰Tiki Ravguangc rui nkhamlouna ata tiryanra the kumna ata zauczihmei ta kumcna sw the.

¹¹Kamei rui ataanv khou kangriang ntalou the; kumna aphaykaamv guay ta zauc the.”

¹²Tiki Joble, nang nkhuai de. Ravguangc thu maansei suangc daihmeipu de.

¹³Tabui swna maansei rui apanv bammei lat tei dawlou mak ge twna Ravguangc ta sa bam tu cho?

¹⁴Ravguangc rui kathiak khat khou hamh e thei khat khou lat kachuc e tiki maansei rui thay mak ge.

¹⁵Zingbangc maansei rui zip bammei ganv khou, Ravguangc rui mang khou khatni ndawman khou dinclou the.

¹⁶Ravguangc rui kaniw nu khou kachuclou the, kumna kalat tei rui kaniw ta tipinglou the.

¹⁷Paapc taanv taanh khang khatni daihlwn sw mak khang Ravguangc rui salou the.

¹⁸Mi hei kaniw ta sw kamut kamai mak khang khatni theihmei khou rui kanlou khang e.

¹⁹Ravguangc rui sucnu naunianmei tiguangna maansei ta sw ntwnlou e.

²⁰Sucnupui mei tei tu nii zangv nii tuang maekna, tugay zangvgaymei taektw ta sini kaning si the.

²¹Kapumc tei karou-karuc na kha keylou the;

²²kaniw du tei khunh daeng khou ana guang the, kamei theic puni the.

²³Khoutei maansei nunc ta kaniw thouc tina ningtowlou bammei Ravguangc tuang baanchara ching ching pang khou rui gaanv khat kumhmei guangna kata nkhavlou bam nuh e.

²⁴Zauc-nzianpui zaeng rui baanchara tei rui sa puni, “Kata riclou ti tho! Kata taruaih thangc tikeylou ri tho. Kata ran pat khang mi hei nai the.”

²⁵Khoutei kapumc tei chabwan pumc kumcna gayna tanc pat dat puni;

²⁶kamei rui huayney pwkhou Ravguangc rui dawlou dat puni; kamei neihlana Ravguangc ta kalum dat puni; Ravguangc rui kakhang ramh kaguayna ti-nthuihlou dat puni.

²⁷Khoutei kamei rui charuangc khou sa puni, “Ai paapc taanc dyng the. Ai nchumhmei taanh mak dyng the, tiki Ravguangc rui ata kanlou the.

²⁸Ai taruaih key nimei khou rui kamei rui kanlou the, kumna ai ntaw ringcna bam tuang the.”

²⁹Ravguangc rui mi hei maansei khou taanclou dat datna bam e;

³⁰kamei rui maansei gaanv khat panty ta kanlou e, kumna ringhmei tuang neihlamei tei kakhou tiilou e.

³¹Joble, ai rui sa bammei hei nkinglou o; ai rui samei hei reih reina nkinglou o.

³²Nang rui sa khang nai e thei ni, ai nking puni; nang nchumh de twmei ai neihlana nuh puni de.

³³Kum mak ge thei reih reihna nkinglou o, nang ningting khang ai rui nchamlou puni.