Read Rongmei Naga JOB 34 Bible Online

JOB 34 - Rongmei Naga bible

JOB 34

¹Elihu rui kaluan swna sa key e,

²nangniw hei ningtyngmei nunc the ntakmei nunc the; ai rui samei hei nkinglou o.

³taektw tei baley rui mbap be; nukuanc rui lat mbap be.

⁴Nchumhmei hei tabui tei cho twmei aniu rana thay kho, tabui tei gaymei cho twmei aniu kathai kariu kho.

⁵Job rui kamei nkhuai mak ge, Ravguangc rui nchumhmei swlou zih tina de twna sa bam e.

⁶Kamei rui sa e, “Ai nkhuai the twna akumhna ai saraamcna sa bam nina cho? Ata theihpui tadiu tikabiu the, tiki ai hei paapc maekmei de.”

⁷Mi Job kumhmei maansei ta nangniw how thah cho? Kamei Ravguangc ta khat na sini chakhwang sw mak ge.

⁸Kamei meicgay makmei nunc ta kapam sw e, kamei paapcmei nunc ta kaduang sw e.

⁹Ravguangc rui ningmei khou tatmei rui ramh gaengmei tuang maek ge twna kamei sa e.

¹⁰Sigay thay makmei nuncle, ai rui samei hei nkinglou o! Ngamparymei Racguangc rui nkhuaimei taanv taanc dina cho?

¹¹Kamei rui maansei khang kataanv kataanv theilayna tii biuhmei phy tei tiimei tuang de.

¹²Ngamparymei Racguangc thu simei taanv taanc zat mak ge; kamei meic gaanv khat na khou sini nkhuaimei taanv taanclou mak ge.

¹³Ravguangc khou meic gaanv khat na rui sini ngamv tiiloumei tuang hamh e maansei rui kata kandih kaipouc tiswloumei tuang hamh e.

¹⁴Ravguangc rui ringhmei thiu hei laa ganc kan ti thei

¹⁵ringhmei kaguayna hei theic ngam kan ni de kumna taniang mbaih dat ngam kan ni de.

¹⁶Nang hei ningtyngmei e thei, ai rui samei hei nkinglou o.

¹⁷Nang rui nchumhmei Racguangc ta nkhuai e twna sa bam tu cho? Kamei nchumhmei ta karaengna cho?

¹⁸Guangh nunc khatni dihsinpouc nunc rui gaeng timak ge thei “Gaeng makmei” khatni “Meicsimei” twna Ravguangc rui sa e.

¹⁹Kamei rui dihsinpouc nunc ta puanc liangc mak ge, khatni lungcsimei nunc ta sina sw khang lungcgaymei nunc liang liangh mak ge kalam thu kamei rui meic kathuicna ta damclou the.

²⁰Maansei hei thay mak daekna zingbangc rui theic nuh de. Ravguangc rui maansei ta sw key pwkhou kaniw tei mutsut the. Kamei rui tancbauhmei ta ni pumtan gut makna swluai de.

²¹Kamei rui maansei tuang phaykaamv kathuicna ta zaucna bam e.

²²Paapcmei rui Ravguangc khou rui nkamh nuhmei zinghmei bamv kandih nam ruc khou maek ge.

²³Ravguangc kamei rui maansei ta latzan sw nimei ganv hei kaklou bam khang kakhang kage mak ge.

²⁴Kamei rui kapy swmei nunc ta laa ganc lana kaniw phaan lynlou dat khang kalam kathai bam khang maek ge.

²⁵Kalam thu kaniw tuang taanv tei kamei thay e; kamei rui zingbangc rui kaniw ta sw bow keyna swpuatlou the.

²⁶Meic kathuicna hu khou kamei rui paapcmei ta dandi tii e,

²⁷kalam thu kaniw rui kathei lay mak khe khatni katuang latdanv guay ta thouh sw mak khe.

²⁸Kaniw rui lungcsimei nunc ta Ravguangc khou kauh khang tiswlou the, kumna kaniw rui kauhmei tei Ravguangc rui chu the.

²⁹Ravguangc rui ramhkhat na sini taanc lak khe twna reina bam kan e thei, meic gaanv khat na rui sini karuc khou lat sa bam ngam mak ge. Kamei rui kazaw nkamh kan e thei, maansei thu ramh sw kadai khang nai ni tuang hamh e.

³⁰Kum pwkhou rav ta thay makmei sintumei nunc rui kaipouc sw mak khang zaatc nunc tei rui ramh sw dat ngam lak ge.

³¹Joble, nang Ravguangc khou nang tuang paap kalauh the cho? Paapc taanc dat mak khang nang latdyng sw the cho?

³²Nang khuay dinclou o twna Ravguangc khou ney the cho? Simei taanv taanc taan khang nang nuh the cho?

³³Nang lunglaic zihna akumhna Ravguangc rui nang kahawmei taanclou nina cho? Ntaw hei nang lungdyng akhat laa tho, kumna nang ningmei kiu sa tho.

³⁴Kabah thaymei guay rui khatni ningtyngmei akhou rui chumei kathuic rui sa puni.

³⁵Thaymei maekna Job rui lat sa e, kumna kalat tei ningting kazauh mak ge.

³⁶Job rui samei guayna hei kakhanh o; kamei rui samei lat guay hei meicgay makmei lat re twmei thay puni.

³⁷Kapaap ruc khou meicliammei haaplou the; aniu hu khou kamei Ravguangc ta sinnui the.