Read Rongmei Naga JOB 36 Bible Online

JOB 36 - Rongmei Naga bible

JOB 36

¹Elihu rui kaluan swna sa key e,

²Ravguangc phaan swna ai rui sa bammei hei akhaengvna nking kanak lou o.

³Aningting hei kauh the; aningting sinswna Ravguangc ata Damhmeipu hei nchumh de twmei ai lyanlou pumc e.

⁴Ai rui nang khou sa bammei hei nkhuaimei tuang khat na sini maek ge; ningting changhpui mei kiu nang hu khou bam e.

⁵Ravguangc hei adih tanc kan tu cho! kamei meic gaanv khat na ta sini mala mak ge; kamei rui kabah thay makmei tuang ramhkhat na sini maek ge.

⁶Kamei rui meicsimei ta tiringclou bam mak ge tiki kamei rui lungcsimei khou nchumhmei swlou e.

⁷Ravchaptatmei ta kamei rui gaeklou e; kaniw rui guangh nunc kumcna kaipouc sw khang, khatni kaniw ta tingsaengzaeng chakhwang sw bam khang kamei rui swlou e.

⁸Meic nunc tei kangriang ntalouna, kaniw taanv zaeng rui ryanra bam pwkhou.

⁹Ravguangc rui kaniw tuang paap khatni daihriw swmei tei kaniw khou lyanlou e.

¹⁰Kaniw ta sw ntwnloumei lat tei, kaniw tuang simei khou rui lunglaih khang tiimei latdanv tei Ravguangc rui kaniw ta tichulou e.

¹¹Kaniw rui Ravguangc lat piuna kasiamruai swna lungc dat pwkhou kaniw tei nchu-nzaenghna, lungcgay chingkhiuhna lungc dat re.

¹²Tiki kaniw rui chulou mak ge thei, kaniw tei baengsaeng hu khou theic puni khatni kabah thay makna theic puni.

¹³Rav ta thay makmei nunc tei lungpuamcna bam e, kumna dandi tii tisini, nkhavlou o twna kaniw kauh mak ge.

¹⁴Kaniw hei chabwan swna theic e, zakmei rui kaniw pumc suan e.

¹⁵Tiki Ravguangc rui ryanramei tiguangna nchamlou e khatni sucnumei rui kaniw mik tiraklou e.

¹⁶Ravguangc rui nang ta ryanramei khou rui tiduaklou khwan e, kumna kadan makna tilungclou khwan e, nang tuang kuakpaeng khou taektw rui khuan padiklou bam khwan e.

¹⁷Tiki ntaw thu nang khang tii biuhmei dandi tii the.

¹⁸Lanvbiwmei rui nang ta guat mak khang, lanv rui zay mbiangh mak khang ramh thay o.

¹⁹Nkhavlou khang kaucna bammei rui nsa de; nang tuang pumtan rui ni nang ta nkhavlou dat ngam mak khe.

²⁰Zingbangc guang nimei ta kahaw riu, zaatc nunc amaan nimei ganv ta tei.

²¹Simei khou tatlou mak khang ramh thay o; mi kumhmei khou tei rui tiduaklou khang mi ryanramei hei nang khou tii guangmei tuang e.

²²Ravguangc tuang pumtan hei adihkamv tanc cho twmei ningtow o; kamei hei daic liangmei nchamloumeipu e.

²³Meic gaanv khat na rui sini Ravguangc ta ncham ngam mak ge, kataanv tei nkhuai e twna ni sa ngam mak ge.

²⁴Kataanv khang tei kata thuanh khang ningtow o, meic nunc rui thu lu rui thuancna bam e.

²⁵Kataanv tei meic kathuicna rui how the; tiki meic gaanv khat na sini kabah thay mak ge.

²⁶Zauclo Ravguangc hei adih daic kan tu cho, kata aniu thay tangh mak ge, katingkwm ni chak ngam mak ge.

²⁷Kandih khou rui dui laa thauna tingthw tikeymei hei Ravguangc rui e.

²⁸Kamei rui muangh khou rui maansei nac katana khang ting tiriu key e.

²⁹Ravguangc bamv tingpuk khou akumhna muangh tat bam tu cho, akumhna tingthin bam tu cho meic thay mak ge.

³⁰Katuang tingpalikmei rui tingpuk gaanc lik ge, tiki duipui syng thu zingcna bam de.

³¹Mi hei kumna kamei rui maansei ta makuat bam tuang e, khatni taektw mphamh mphahna tiilou e.

³²Kamei rui ganh ta kabaanc khou sin lana tamhmei bamv tou khang latdanv pat the.

³³Pwanzingh guang the twmei tingthinhmei rui dinc e, guang pw the twmei guaih pang rui nganvna thay e.