Read Rongmei Naga JOB 37 Bible Online

JOB 37 - Rongmei Naga bible

JOB 37

¹Pwanzingh hu khou abuc ntwnna sow mak khe.

²Nangniw guayna, Ravguangc khwan tei nking o kamwang khou rui patmei ganh khwan tei.

³Kamei rui tingpuk khou ting tipaliklou the, kandih tintou guay khou tiipat the.

⁴Khoutei kakhwan tei chu the, charynmei tingthinhmei khwan tei, kumna tingpalik pat the.

⁵Ravguangc tuang latdanv khou charynmei, maansei rui kabah thay tangh lakmei azuh taanc pat the.

⁶Katuang latdanv khou rui kandih khou gunh key the, khatni ting dui bun kumc bun key the.

⁷Kamei rui maansei tuang taanv ta ti-nthaekclou the; kumna kamei rui taanvtaanc bam e twmei kaniw khou lyanlou the.

⁸Nwmbangc khouringc nunc rui kakai kakai khou bam the.

⁹Dihba thangc rui pwanzingh ngangh the, dihpy thangc rui nkai tu kumhmei nchumei pwan key the.

¹⁰Ravguangc tuang thiu rui dui ta ti-nkangv the, kumna gunh dangv tiguanh the.

¹¹Muangh khou rui tingpalik pat the,

¹²Ravguangc rui ningmei theilayna Ravguangc tuang latdanv guay kaniw taanc the, kandih kabamv kathuicna khou lik sikh sikna.

¹³Ravguangc rui kandih khou ting zwan key the; maansei ta dandi tiina ni riu key e, kazauzian lyanna ni tii key e.

¹⁴Joble, nchwng keyna nking o; Ravguangc rui taancloumei charynmei taanv guay ta kakhanh o.

¹⁵Ravguangc tuang latdanv theilayna muangh khou rui akumhna tingpalik pat tu cho twmei nang thay dai?

¹⁶Ravguangc tuang charynmei ningting rui muangh hei tingpuk khou akumhna samc bam cho twmei nang thay dai?

¹⁷Dihba pwan rui mi kandic ta rai pwkhou mi tuang thiu khou nang ryanra puni.

¹⁸Tingpuk ti hei thut karangloumei ntanhpaek kumcna Ravguangc rui laamv ntyng patlou khou tei nang kata nkhav ngam cho?

¹⁹Ravguangc khou tabui lat sa nina cho aniw khou dinclou o; aniw lungning khou ramh maek khe; aniw lat sa khang maek khe.

²⁰Ai Ravguangc khou sa ni twna sa lak ge; kamei rui ata sw kamut kamailou khang tabui swna ai sw bam nina cho?

²¹Mpwan rui tingpuk hei aliu nthanlou pwkhou tingpuk khou nai bammei neihmik hei karang langv tina mik zauc adyang ngam mak ge.

²²Dihpy biak thangc gaanhmei kachaekc how e, kumna Ravguangc hym rui aniu khou pingmei padik ge.

²³Ravguangc hym hei heidikamv daic e aniu kadaeng guang tuanc ngam mak ge, kamei rui maansei ruc khou taanv swloumei hei nchumhna khatni nzihna swlou e.

²⁴Hei zaeng rui, maansei rui kata ping e, kalam thu karana kata ningtyngmei e twna sapui mei ta kamei chakhwang swlou mak ge.