Read Rongmei Naga JOB 38 Bible Online

JOB 38 - Rongmei Naga bible

JOB 38

¹Khoutei pwanzingh khou rui RINGHPOUC rui Job khou sa the.

²Nang tuang mpangmei, kabah maekmei lat tei ruina ata ntanvna bammei nang thow cho?

³Ntaw thu nggaanvmei akhat swna ding thau tho kumna ai rui thanv nimei lat hei daw tho.

⁴Ai kandih damhmei ganv khou tei nang bamna cho? Nang thay e thei, mi lam khou tei sa tho.

⁵Kandih diat hei thow rui riatlou tu cho? Thow rui kadai ndatlou tu cho? Mi hei nang thay bu cho?

⁶Kandih tiangc guay hei tabui khou ding bam tu cho? Kandih tuang kaikwn-tauc tei thow rui duanclou tu cho?

⁷Mi nungc lauthwan tei gaanchuangcna guay kariuna lu suan khwan e, khatni tingkauhmei nunc neihlana kauc khwan e.

⁸Duipui rui kandih lungc khou rui luangc patmei ta thow rui mbangh namlou tu cho?

⁹Duipui ta muangh rui duam binloumei khatni zinghmei rui gum binloumei hei ai rui e

¹⁰Ai rui duipui khang ramvrei baengclou the khatni kaikhamv taan binna lou the.

¹¹“Mi langv hei the, khou rui twan pat nuh mak ge! Duimuatle, nang ngamv khou hei rui nganvlou nina e,” twna ai rui kadylou the.

¹²Job, nang kiu nang panty khou zaeng neih khat na sini tinggaanc tho twna latdanv tii zauc tha cho?

¹³Lauthwan hei rui kandih ti hei katun lana mi khou tei dup bammei meicsimei nunc ta kanukc pat tho twna nang latdanv pat tha cho?

¹⁴Kalaanv riw rui chyng nzaengc ta phey kadiploumei kumc, bihlai khou ramhmaengc nthanna hiaklou kumc tihow nthan thiakh thiakhlou e.

¹⁵Kalaanv neicriw hei meicsimei khang gaanc langvna khou tei kaniw simei taanv taanc ngam mak ge.

¹⁶Duipui syng thangc naimei duipuakkai bamv nang key tangc tha cho? Duipui syng khou nang tat the na cho?

¹⁷Zinghmei taruaih kandic tuang raengckat nang khou lyanlou tha cho?

¹⁸Kandih hei adih daic cho nang thay dai? Nang thay e thei daw o.

¹⁹Tabui khou rui gaanhmei guang tu cho, tabui khou rui zinghmei guang tu cho nang thay dai?

²⁰Nang rui mi ta tei kabamv kabamv thangc suanclou dat diu dai?

²¹Nang thu ngam pwng dyng e, nang thu gaanvthaih dyng the cho, kandih damh khou tei nang thu bam dyng the cho!

²²Ai rui gunh khatni nrihthai ryloumei bamv tei nang zauc tha?

²³Hei tei ai rui ryanramei ganv khang rylou the, suc-rih ganv khang lou the.

²⁴Neihmik patpui bamv nang tat tangc tha? Neihpat pwan nliu patpui bamv tat tangc tha?

²⁵Ting bun key khang thow rui duichaeng riatlou cho khatni ganh khang thow rui chaeng swlou cho?

²⁶Meic lungh makmei bamv khou thow rui ting tiriulou cho?

²⁷Thow rui phuithiumei dui maekmei ramv khou ramhbwan thau khang dui zwanlou cho?

²⁸Ting khatni zikdui hei kapu naina cho?

²⁹Gunh tuang pui hei thow cho? thow rui tingpuk thangc rui tikeylou tuang cho?

³⁰Dui rui ntauh kumcna tanc kanmei tei, duipui ta nganv ti-nkangvloumei tei.

³¹Nang asahkailiu ta bang kariulou ngam cho khatni gaanchuangcna kang bangclou bammei riang tei riclou diu cho?

³²Nang gaanchuangcna guay ta kakwm kaganv thei layna chaengzay ngam dai cho? Gaanchuangcna kang kang ta zay ngam dai cho?

³³Tingpuk hei akumhmei thiak khou tat key bam tu cho, mi thiak tei kumcna kandih khou ni tat key nuh dai?

³⁴Nang rui muangh khou latdanv tiina mi khou tei rui ting tiriu key diu dai?

³⁵Tingpalik khang nang rui latdanv pat tina “Taanc ni the” twna daw puni dai?

³⁶Nail Dui daic puni the twna thow rui duiruay khou dinclou tina cho? Thow rui nruayduic khou ting riu puni the twna dinclou tina cho?

³⁷Muangh ta kasing chak khang thow khou ningting naina cho, thow rui ting tiriu ngam cho,

³⁸mbut ta bihbangv riu mbaihlou ngammei ting ta?

³⁹Kamangliangpui taek khang tei nang tiilou ngam dai cho, ndaapc bammei kamangliangpui nac nunc bung ti-ngulou ngam dai?

⁴⁰Kaniw rui kaniw kai khou kanei nkai kariak bammei hamh e thei ngouh khou nchwan bammei nunc khang tei.

⁴¹Ndaapcna ruan tat bammei agaekc nunc khang, ndaapcna nap ney bammei kanac nunc khang thow rui titu tu cho?