Read Rongmei Naga JOB 4 Bible Online

JOB 4 - Rongmei Naga bible

JOB 4

¹Mi tangv tei Temanmei Eliphaz rui daw the,

²Joble, ai sa ti thei nang ningsumc puni cho? Ai reih reina bam ngam mak khe.

³Nang rui meic mpeyna ta nchamlou the khatni kabaanc suanmei meic mpeyna khang pumtan tii kan the.

⁴Thowkumhmei phaysuymei, suanmei khatni lakmei guay ta nang tuang lat rui katiu thaulouna tiding thaulou kan the.

⁵Ntaw thu ryanramei hei nang khou guanglou the, kumna nang hei tei akhaengv ngam mak khe.

⁶Nang Ravguangc ta kalum e, nang khuay maek ge; hei zaeng rui nang lwmgayna bam e.

⁷Ntaw kakhanh hanc dat ro. Ravchaptatmei ruc khou ryanramei keylou kanmei tuang nai bu cho?

⁸Simei tuang laupuk suakna meicsimei thw nroulouna simei thai laa bammei ta ai how the.

⁹Ravguangc rui kaniw ta kathiu tipatna kalungpuam khou pwanzingh kumc swmaan kan the

¹⁰Meicsimei nunc tei kamangliangpui kumc nin e, rah e, tiki Ravguangc rui kaniw ta ntouc rymlou kan the, kaniw nei duk bau kan the.

¹¹Kamangliangpui kumcna tu khang maekna theic kan the, kanac nunc tei pakzin pakza kan the.

¹²Kaganv akhat khou chamv akhat asuaicna guang khwan e, anu khou na salou khwan e.

¹³Ramhpingmei mang kumcna hei tei rui ata nchyang thau khwan e.

¹⁴Ai kadunh kathanh khwan e, pingmei rui apumc pwm kadunh khwan e.

¹⁵Azaw khou mpwan aliu rih ri guang khwan e, khoutei ahiw gouh gou thau khwan e.

¹⁶Khoutei ramhkhat ding bammei ta ai how the; ai kaluang the, hei tei tabui cho twmei sa khang thay mak ge. Khoutei rimh rimmei khou rui khwan akhat rui sa pat the:

¹⁷“Maansei rui Ravguangc suangc ravchap tat ngamna cho? Kata damhmeipu suangc nthan nuhna cho?

¹⁸Ravguangc rui katuang tingkauhmei bangc nunc ta lwm mak ge; katuang baanchara nunc khuay nganvna phu pat de.

¹⁹Kum e thei, taniang rui kasiamhmei maansei ta lwm puni dina cho? Nthumc ta kumcna niakpiak nuhmei bih rui kasiamhmei maansei ta lwm puni dina cho?

²⁰maansei hei thu lauthwan ringc bam lasini, thay mak daekna tingzyn key mak khou theic nuhmei tuang de.

²¹Kaniw tuang pheykai riang guay kathangv nuy gancna thaymei tuang maekna theic nuh de.”