Read Rongmei Naga JOB 40 Bible Online

JOB 40 - Rongmei Naga bible

JOB 40

¹RINGHPOUC rui Job khou sa the;

²Joble, nang rui Ngamparymei Racguangc ta khaengc the; nang ntaw hei tei lou key ni ny, daw ni cho?

³Mi tangv tei Job rui sa daw the;

⁴He RINGHPOUC, ai hei mpangna sa kan dyng the. Ai rui tabui daw ngam nina cho? Ai ramhkhat na sini sa dat lak khe.

⁵Ai rui sa lak nimei ni sa mbu nlailou kan the.

⁶Khoutei pwanzingh khou rui RINGHPOUC rui Job khou sa dat re.

⁷Nggaanvmei akhat kumcna dingthau tho, kumna ai rui thanvmei hei daw tho.

⁸Ai hei nchumh mak ge twmei lyan me twna nang sw bam tu cho— ata ti-nkhuailouna nang nchumhmei sw me twna sw bam tu cho?

⁹Nang kiu ai kumcna tancna cho? Nang khwan tei akhwan kumc ganh key kumc diwna cho?

¹⁰Kum e tw e thei nang gaengh swna, nang tik nang hym rui pheybaan swna dingthau tho.

¹¹Daihlwn swmei nunc ta tei zauc lo; nang lungpuam patna kaniw ta tei tiliulou ti tho.

¹²Ngguay, kaniw ta tei zauc lo kumna ti-ana key tho; meicsimei nunc ta tei kaniw tuang dyng bamv khou rui swpuat paruat key tho.

¹³Kaniw ta kandih khou mphumhlou tho; kaniw ta taruaih thangc bangclou tho.

¹⁴Kum pw e thei nang ta thuanc rey liang nimei kiu ai the khatni nang rana rui rih ngam tuang dyng e twmei ai nuh puni the.

¹⁵Dui guaipuang twmei khouringc ta tei zauc lo; ai rui mi ta tei ni nang ta ni damcloumei tuang de. Hei tei guaih kumcna thingnuy binc tu e.

¹⁶Tiki kapumc khou tei pumtan adih nai kan tu cho? Katei khou tei pumtan azuh nai kan tu cho?

¹⁷Kamai tei sidar bang kumc ndyng e, kanaeng thuat tei tanc e.

¹⁸Karou tei ntanh kumc, khatni katan tei tanhlubungc kumc tanc e.

¹⁹Hei tei ai rui damcloumei khouringc pang khou charyn liangmei e! Kata damhmeipu na rui kata ngam e.

²⁰Khouringh khounah palup bammei chyng khou tei kataek khang ramh bwan thau e.

²¹Kamei sauhraengh bang phwam bangc khou zip be, khatni ntou bang ding khou nkamh e.

²²Sauhraengh bang khatni duikhuangc khou thaumei tazung bang rui kaswng khou mi ta tei tiduplou e.

²³Kathiu tancna phian keymei duithuat ta kamei ping mak ge; Jordan dui rui kazaw khou mphiu tisini rup twmak ge.

²⁴Thow rui kamik duamna nym ngam nina cho? Thow rui mi ta tei nymna nariang lou ngam nina cho?