Read Rongmei Naga JOB 5 Bible Online

JOB 5 - Rongmei Naga bible

JOB 5

¹Joble, kauc o. Meic dawloumei nai puni ny zauc o. Nang khou dawlou nuhmei baanchara nai bu ny?

²Lungh ryanrana lunghpuamcna theihmei twmei hei mpangmei taanv e.

³Mpangmei nunc giuga mak kumcna bammei ta ni ai how e, tiki thay mak daek khou kaniw kai khou asyang keylou e.

⁴Kaniw nac nunc tei kadan makna bam khang maek khe, latzankai khou kaniw ta ding gaeklou nimei maek ge.

⁵Ndaapcmei nunc thu mpangmei nunc tuang nap-bi tu puni de— sauh pang khou thaumei nap-bi nganvna tu puni de, khatni tarimei nunc rui katuang lanv ta kahaw puni.

⁶Simei twmei hei kandih khou rui thau mak ge, katuakcmei ni kandih khou rui thau patmei tuang hamh e.

⁷Ngguay, mai khou rui maibwang samc kumei kumcna, katuakcmei hei maansei rui karana kakhou tiguangmei tuang de.

⁸Nang hei ai khwan e thei, Ravguangc daeng khou guangna lat katlou ni tuang e.

⁹Kamei rui taanc bammei taanv daihmei guay hei kaniw kabah thay mak ge, katuang charynmei taanv hei kanganv maek ge.

¹⁰Kamei rui kandih khou ting tiriu keylouna laupuk guay tei dui zwanlou the.

¹¹Ngguay, RINGHPOUC rui liwkeymei ta zay kauhlou e khatni kap bammei nunc ta ti-neihlalou e.

¹²Karouc simei nunc raeng tei kamei rui tiguang tangv mak ge,

¹³kaniw rana ningtyngna rouhsina chamvraeng swmei guay tei asaanh makna amaan nuangc kan e.

¹⁴Kaniw tei kalaanv nganvna zingcna kathamna tat re.

¹⁵Ravguangc rui lungcsimei nunc ta theic nimei khou rui kanlou e; lungcthuy lakmei nunc ta rairiumei khou rui kanlou e.

¹⁶Lungcsimei nunc khou machunhmei tiilou e khatni meicsimei nunc mwang thingclou e.

¹⁷Ravguangc rui riap ntwnloupui mei tei sangaymei e! Nang ta kamei luh pwkhou lunghpuamh riu.

¹⁸Ravguangc thu kamei rui sw nzamhloumei zam tei duamlou dat re; kabaanc rui sw nzamhna kabaanc rui swgaylou dat re.

¹⁹Kamei rui nang ta simei khou rui kanlou dat dat bam puni;

²⁰nkow-ndaapcmei ganv khou nang ta tiringclou puni, suc-rih ganv khou theihmei khou rui kanlou puni.

²¹Nang pumc swthuan nimei nunc khou rui Ravguangc rui kanlou puni; sw kasic-karoucmei guang pwkhou kamei rui kanlou puni.

²²Swkasic-karoucmei khatni nkow-ndaapcmei ta nang nuic puni, nwmbangc khouringc nunc ta ping dat lak khe.

²³Nang rui suak nimei lau khou tei ntauh nai lak ge; nwmbangc khouringc rui nang ta sw kabiu lak ge.

²⁴Khou kiu nang hei nang tuang pheykai khou nchu-nrina bam puni; nang tuang lauziu pang ta zauc pwkhou, amaan-amucmei nai lak ge.

²⁵Nang tou nang nac geic puni, nang kikta hei nwmbangc pubang zu nai puni.

²⁶Lau tay luai mak saanv gehu tei minc bammei kumc, nang hei gaanvthaih nganvna mincna bam puni.

²⁷Joble, aniw kathai saengc guangna mi hei thaymei tuang the. Mi hei kaling the, laalou tho.