Read Rongmei Naga JOB 6 Bible Online

JOB 6 - Rongmei Naga bible

JOB 6

¹Mi tangv Job rui mundaw dat the,

²Atuang ryanra-ryanriu hei karith nthau pw e thei,

³hei tei duipui syniang suangc nrit puni the, kumna ai rui sa bammei ti hei nang khang charyn dat pu lak khe.

⁴Ngamparymei Racguangc rui ata sauhpai lu rui biw the, mi tuang khay tei apumc kapwm lik the. Ravguangc rui kalungpuam aruc khou tiguang the.

⁵Kataek tu bam saanv kuanniam tei pianna bam de, guaihkui ni kataek nai saanv reih reina bam de.

⁶Tiki thow rui ntei lou makmei taektw tu ngam nina cho? Ruaiduih gaamc khou tabui tuang thac bumhmei naina cho?

⁷Mi kumhmei taektw tei ai tu nii mak ge, kumna ai rui tu keymei kathuicna rui ata tisuan the.

⁸Ai rui neymei tei tabui swna Ravguangc rui tii lak nina cho? Ai rui huayneymei tabui swna kamei dawlou lak nina cho?

⁹Ravguangc rui ata swluailou pw e thei gay ni ki ni!

¹⁰Kamei rui kumc pw e thei, ai hei heidi ryanra bam sini ai neihlana kachuamh ni tuang e. Ravguangc hei thu nthanmei e twmei ai thay e; katuang latdanv ta ai liam zat mak ge.

¹¹Ai ringc bam khang tabui pumtan nai thena cho? Machunhmei maekna tabui swna ringc bam tu cho?

¹²Ai hei ntauh rui kasiamhmei tuang dina cho? Apumc hei ntanh dina cho?

¹³Arana ata kanlou khang apumtan maek khe; ata nkhavlou diu khang tatlou nimei bamv ni maek khe.

¹⁴Hei kumhmei ryanramei ganv khou hei kalingmei champanv kage nai e ai rui Ravguangc ta mpatlou ny mpatlou mak ny thay mak ge.

¹⁵Tiki champanv nuncle, nangniw thu ting riu mak ge thei phuimei duithuak kumc ata guat the.

¹⁶Duithuak tei gunh rui thingcna bam sini,

¹⁷neih suc pat pwkhou hei tei nungc maan kan the, duithuak tei phui thiuna karaeng ganclou the.

¹⁸Guaikuan tuangcna lanvguanh tatmei nunc rui chaengkuaic patna dui phu the, kaniw sypungramv khou tei ruanna theic maan the.

¹⁹Guaikuan tuangcna lanvguanh tatmei Shebamei khatni Temamei rui dui tei phu the,

²⁰tiki duithuak tei guang tangc pwkhou dui maek khe.

²¹Nangniw hei thu akhang mi kumhmei duithuak tei kumc the, aram ryanra how lana pingna hanc kan the,

²²Ai nangniw khou rui kaipat ney bu cho? Akhang rui meic nunc khou lanvbiwlou o twna sa bu cho?

²³Ata zauczihmei baanc khou rui ata kanlou o twna sa bu cho?

²⁴Gay the, ata nchamlou tho; akhuay guay dinc patlou tho. Ai reih reina nking ni the.

²⁵Kalingmei lat ta thu kwmlou nuh e, tiki nangniw thu kabah maekmei lat rana sa e,

²⁶Ai rui sa kanmei hei nsa de, mpwan kumh tuang de twna ningna cho? Tabui swna ai rui samei hei daw akhangv bam tu cho?

²⁷Nangniw thu nrunac nac nunc ta zuanc tu puni de, nangniw pammei ta nganvna zuanc tu puni de.

²⁸Azaw hei zauc o, ai saraamh mak ge.

²⁹Nangniw hei tat duc langv khe. Nchumh makmei tuang sw taan tho. Ata nkhuai e twna sa dat ri tho, ai hei nchumhmei de.

³⁰Ai saraamc e twna ningna cho? Ai nkhuai pui zaeng rui nchumhna sa ngam mak ge twna ningna cho?