Read Rongmei Naga JOB 7 Bible Online

JOB 7 - Rongmei Naga bible

JOB 7

¹Maansei panty twmei hei nymna rihmei tiswmei kumc e, taanvtaanhmei laumei kumc e,

²thinglym ta kahawmei bangc kum e, kataanv phy nkhwan bammei taanvphihmeipu kumc e.

³Bw mpeyna ramh maekna lungc guang the; zingbangc mpeyna ryanramei akhaengvna lungc guang the.

⁴Ai zip keypui lev Tabui nungc rui tinggaanc puni cho twna kakhanh the. Zingbangc tei saengc the, zip makna tinggaanc patmei ta nkhwan the.

⁵Apumc hei karik rui padik the; asuh rui padik the; kadui nluan kariph rip the.

⁶Apanty hei machunhmei maekna tat kan the, pheydakmei ntaek suangc katumcna tat kan the.

⁷He Ravguangc, apanty hei meicthiu na kumh tuang de twmei ningtowlou o; atuang neihlamei guay hei amaan ngam guang the.

⁸Ntaw nang ata how bam e; tiki how dat pu lak khe. Nang rui ata phu pwkhou ai hei maek kan ni the.

⁹Muangh tei ra patna maan kanmei kumc, maansei hei ni theic kan e thei guang dat mak khe;

¹⁰kaniw kai khou ngalanc guang dat mak khe thay howmei guay rui ni amuc kan the.

¹¹Hei zaeng rui ai reih reina bam ngam mak khe, ai hei nkhwanna alungpuamc the. Ai sa mak ngam mak khe.

¹²Tabui swna nang ata bangclou bam tu cho? Ai hei duipui thaanngangc e twna ningna cho?

¹³Ai zip keyna zaeng nthaekc khang karamc e; suhmei hei nthaekc nuhmei chaeng phu the.

¹⁴Tiki nang rui ata mang khou ni tipinglou the, ndawman khou ni pingmei tiguang the,

¹⁵hei zaeng rui hei kumhmei ryanramei pumc khou bammei suangc thu riang khaekna theic kan nii the.

¹⁶Ai lungc nii mak khe; ai lak the. Ata mpatlou tho. Panty hei kabah maek khe.

¹⁷Tabui swna maansei hei nang khang heidi nthukmei sw bam tu cho? Tabui swna kataanv khou heidi lungh gut bam tu cho?

¹⁸Nang rui kata lauthwan kathuic sigay zauc e, mikkhip dak kathuic kata nchanv e.

¹⁹Ai ateih kaduk gutmei dak khang na sini akhou rui zauc kageilou lakna cho?

²⁰He kang kaipouc, apaap rui nang khang si tuang swlou thena cho? Tabui swna nang rui ata nchanvpui bamv sw bam tu cho? Ai hei nang khang puatrith sw thena cho?

²¹Nang rui apaap amuc ngam mak khena cho? Ai rui taanc maanvloumei guay kuaklou ngam mak khena cho? Asaanh mak khou ai hei tarou thangc bam kan puni the, nang rui ata phu pwkhou bam dat pu lak khe.