Read Rongmei Naga JOB 8 Bible Online

JOB 8 - Rongmei Naga bible

JOB 8

¹Mi tangv Shuameipu Bildad rui mundaw khwan e,

²Mi kumhmei lat hei nang asaanh sa bam ni hena cho? Nang lat hei pwanzingh kumc the.

³Ravguangc thu nchumhmei ta ti-nkhuailou zat mak ge, nchumhmei taanh makmei tuang khat na sini maek ge.

⁴Nang nac nunc rui paapc taanc kan di the, kum tina dandi tii tuang di the.

⁵Tiki ntaw lunglaih datna Ngamparymei Racguangc khou ney tho;

⁶nang rui nchumhna lungning nthan ti thei, Ravguangc rui guangna nkhavlou dat puni, khatni nang kai kaikhunc tiguanglou dat puni.

⁷Ravguangc rui tii dat nimei tei lev kida pwkhou amaan kanmei tei thu ramhkhat na sini hamh e.

⁸Reynungc tuang ningting khou tei matat akhat zauc zauc o; nangniw pupouc nunc rui laatow kanmei nchumhmei tei kakhanh zauc o.

⁹Aniu panty thu kadangv na de, aniu thu ramhkhat na sini thay mak ge. Aniu tuang kandih panty hei meic mang na kumh tuang de.

¹⁰Tiki reynungc ningtyngmei rui nang ta nchamlou pu diu o; kaniw rui kumna samei hei nking o:

¹¹“Ntou hei dui maekmei bamv khou thau ngam mak ge, ramvkaeng khou ntou bang how mak ge.

¹²Dui thip kan ti thei, kaniw tei theic rey liang the, sinsw biuh makmei bwan swna theic ngam kan the.

¹³Rav ta amucmei nunc tei thu hei tei kumh tuang e; Ravguangc ta amuclou pwkhou katuang machunc maek khe.

¹⁴Kaniw rui langhriang na ta lwm e, zankangcpui raanv na ta lwm e.

¹⁵Kaniw zankangcpui raanv khou tei ngangvlou nuh puni dai? Kaniw rui langhriang khou tei houding nuh puni dai?”

¹⁶Meicsimei nunc tei pucbwan kumcna neihriw khou thau pat the, pikwan khou thau padik patmei pucbwan kumc thau pat the.

¹⁷Kaniw maan tei tautuangc but khou kamclou the, ntauhbut khou pamclou the.

¹⁸Tiki hei tei phuay pat kan pwkhou khou tei thau bam e twmei meic thay dat mak khe.

¹⁹Ngguay, meicsimei nunc rui neihla nimei kiu hei tei na di the; ntaw thu meic baihmei guangna kaniw bamv tei lyn kan the.

²⁰Tiki Ravguangc thu lwm nuhpui mei ta mpatlou zat mak ge, meicsimei ta ni nkhavlou zat mak ge.

²¹Kamei rui nang ta tinuiclou dat puni, neihlana tikauclou dat puni.

²²Nang ta zauczihmei nunc tei zak dat puni, meicsimei nunc kai tei nai bam dat lak khe.