Read Rongmei Naga JOB 9 Bible Online

JOB 9 - Rongmei Naga bible

JOB 9

¹Mi tangv Job rui mundaw e;

²Ngguay, hei tei nchumh e twmei ai thay e. Tiki akumhna maansei rui Ravguangc hu khou nchumh ngam nina cho?

³Akumhna maansei rui Ravguangc ta agi ngam nina cho? Maansei gaanv khat na rui sini daw ngam lakmei latthanv aching aching kamei rui thanv nuh e.

⁴Ravguangc hei ningtyngmei ngammeipu e; thow rui kata akhangv ngam nina cho?

⁵Tithaylou makna kamei rui chyngbut guay ta tikalung e, kumna kalungpuamcna mi guay ta tei swmaan e.

⁶Ravguangc rui baengla tiguangna kandih ta kanukc ge; kamei rui kandih tiangc ta kanukc ge.

⁷Kamei rui neihmik ta tipat mak ngam e, gaanchuangcna guay ta ni zingbangc tigaanh mak ngam e.

⁸Kamei na rui tingpuk ta laamv ntyng patlou ngam e, khatni duipui ravsic ta niibin ngam e.

⁹Ravguangc rui gaanchuangcna guay ta tingpuk khou thaengclou the— asahkailiu, gaanhphiu, guak puanhmei hei guay hei ni damclou the.

¹⁰Kamei rui taancloumei taanvdaih guay ti hei thay tangh ngam mak ge, katuang charynmei taanv guay hei kanganv maek ge.

¹¹Ravguangc tat kalw bam e, tiki ai kata how mak ge.

¹²Kamei rui laa nii niimei laa tat kan the, meic gaanv khat na sini kata khaam ngam mak ge; “Nang tabui sw bam tu cho?” twna meic gaanv khat na rui sini thanv bauh mak ge.

¹³Ravguangc lungpuam hei kalaih mak ge. Kata akhangvmei duipui ravsic Rahab ta nkhavmei, kata zauczihmei guay ta kamei rui niak puatlou e.

¹⁴Hei zaeng rui ai Ravguangc khou daw khang akumhna lat nai nina cho?

¹⁵Akhuay maek sini, ai rui sw nimei thu atuang latzanpouc Ravguangc tuang zauzian ney khang na de.

¹⁶Ai rui sa khang kamei rui nuhlou sini ai rui samei kamei nkinglou puni twmei ai lwm mak ge.

¹⁷Kamei rui kalam maekna ata tikabiu kabaeng khang pwanzingh tiguang the.

¹⁸Athiulaamei ganv khang sini kamei rui tii mak khe; kamei rui apanty hei ryanramei rui tipadiklou the.

¹⁹Pumtan rui sw nimei tuang e thei ni, kamei thu tanhmei de! Nchumhmei tuang latzan sw kho tw ni thow rui kata latzan kai khou kaw guang ni?

²⁰Ai hei khuay maek ge khatni lwm nuhmei de, tiki alat rui thu nkhuaimei lat kumc the, ai rui sa patmei lat guay rui ata ti-nkhuai tu kumc the.

²¹Ai hei nkhuai makmei de tiki arana lam khou thay ngam mak khe ai lungc ni mak khe.

²²Kumhpui zaeng rui kuc khat lik de kamei rui khuay maekmei ta ni naimei ta ni swmaan ngam de. Ai hei nkhuai mak ge,

²³Khuay maekpui mei rui thay mak daekna theic pwkhou Ravguangc nuic e.

²⁴Ravguangc rui kandih ta meicsimei nunc khang tii kan the. Kamei rui latzanpouc nunc mik swtiatlou the. Mi hei Ravguangc rui sw mak ge thei, thow rui sw tu cho?

²⁵Apanty hei pakna tat bam e, khou tei gaymei khat na sini maek ge.

²⁶Apanty hei katumhmei palyam kumc samc tat the, mouc rui apuakc ta nym khang liap key kumc.

²⁷Ai alung ryanramei amuc ni the twna sa e thei alwn kalaic patna nuic puni,

²⁸Aryanra guay ta ping e, akhuay maekmei e twmei nangniw rui laalou ni tu hamh e.

²⁹Ati hei nkhuaimei tiswlou the, tabui sw khang nsa khou ai akhaengv dat bam nina cho?

³⁰Apaap guay hei sabuan rui khiu nthan dat ngam mak khe.

³¹Ravguangc rui ata mphuammei khunc khou ganclou the, atuang pheybaan rui nganvna ata karaeng the.

³²Ravguangc hei maansei bam khwan e thei, ai kakhou daw bam ni tuang e; latzan kai kuna agi ni tuang e.

³³Tiki aney khou chakak dinglou nimei maek khe— Ravguangc lev aney kak khou latzan swlou nimei maek khe.

³⁴He Ravguangc, ata riap nthaekclou tho! Nang tuang meic pingmei taanv hei laa ganclou tho!

³⁵Ai thu ping mak ge. Ai thu sa puni the, kalam thu arana alung ta thay e.