Read Rongmei Naga KALUMLU 10 Bible Online

KALUMLU 10 - Rongmei Naga bible

KALUMLU 10

¹He RINGHPOUC, aniw ryanra bammei ganv khou, tabui swna nang hei saanv duc bam tu cho? Tabui swna nang nkamh bam tu cho?

²Meicsimei nunc ramhkhe swna lungcsimei nunc ta rai e; kaniw ta kaniw phac khou timanclou o.

³Meicsimei tei kamei kahawmei simei khou tei kagaengh sw e; agaamvpui mei tei RINGHPOUC ta siang e khatni laalou mak ge.

⁴Daihriw swna meicsimei tei RINGHPOUC ta thay mak ge, kumna Ravguangc maek ge twna ning e.

⁵Meicsimei tei ramh lam katana khou lungcgay bam nuh e; tiki kamei thay tangh makmei khou Ravguangc latzan nai e; kamei zauczihmei nunc ta mala e.

⁶“Ai kalung dat zat ni tu hamh the, akhou ryanramei keylou zat ni tu hamh the,” twna meicsimei rui kakhanh e.

⁷Kamwang khou siangmei, saraamhmei khatni kadungmei padik ge; kamei hei karaengmei, khatni simei lat sa khang rouh mak ge.

⁸Rihou rui raenghbangc khou nchwanna, kakhuay maekmei nunc ta swluaimei kumc, kamei rui ramh ngam lakmei suanmei nunc ta nrik ge.

⁹Kamangliangpui kumcna kamei dupna nchwan bam e. Kamei lungcsimei ta nrik bam e; kamei rui kaniw ta kaphac khou rui nymna zay tat the.

¹⁰Meic nzimei nunc baanc khou keyloumei sansimei nunc ta tei, kaniw rui niak puatlou the.

¹¹“Mi kumhmei tei Ravguangc amuc kanmei tuang di the, kamei kamik tanguihna how ni tu hamh e,” twna meicsimei rui kakhanh e.

¹²He RINGHPOUC, meicsimei nunc ta tei dandi tiilou o! Ryanra bammei nunc ta tei ningtowlou o!

¹³Akumhna meicsimei rui Ravguangc ta ramhsak makna, “Kamei ata dandi tii ni tu hamh e,” twna ning bam tu cho?

¹⁴Tiki nang thu how e; ryanra bammei ta tei nang thaylou e, kumna nkhavlou khang chamdaanv bam e. Ngangv bamv maekpui mei tei nang khou ngangvlou e; nang na hei lungc thuy lakmei nunc ta nkhavloumeipu kiu e.

¹⁵Meicsimei khatni kataanv simei nunc pumtan tei riambaulou o; kaniw tuang simei guay tei nsaekclou makna phu patlou o.

¹⁶RINGHPOUC hei tingsaeng khang guangh e. Kumna zentelmei nunc tei katuang kandic khou rui maan kan puni.

¹⁷He RINGHPOUC, niamhmei nunc rui huayneymei nang chulou e; nang rui kaniw ta tibauclou e.

¹⁸Rai riu khaengvmei khatni nruna nunc rui kapna huaymei nang chulou e; kandih maansei na rui tiping bam dat mak khang, nang rui kaniw khang latzan swlou e.