Read Rongmei Naga KALUMLU 102 Bible Online

KALUMLU 102 - Rongmei Naga bible

KALUMLU 102

¹Ai huayneymei nkinglou o, he RINGHPOUC, ai kapna huaymei chulou o!

²Ai ryanramei khou keylou pwkhou, akhou rui karih ntheilou rio! Ai samei hei nkinglou o, khatni ai kauc pwkhou akhou katumcna dawlou o!

³Apanty hei maikhou kumc mut key the; apumc hei mai kumc chuangc bam the.

⁴Pucbwan ta kumc ata dap piak key the, kumna kangc key the, akhang tu nii zangv nii tuang maek khe.

⁵Ai kauc ranvna kalangh the; ai hei agic lev arou na di the.

⁶Ai hei tazikramv khou bammei puanmangc kumc the, meic lungc taekna ganc tazik chikloumei bamv khou bammei puanmangc kumc the.

⁷Ai zipri thuy mak khe, ai hei kainam khou karana bamsina bammei nruayna kumc the.

⁸Zauczihmei nunc rui ata neihmaryn tizak the; ata sinnuimei nunc rui azanc siangdu siangdanmei khou zay saanc the.

⁹Nang lungpuam zaeng rui mbut ta ataektw sw the,

¹⁰amik dui rui anapmi sw the, kalam thu nang lungpuam rui ata khuaic thauna ndat ganclou the.

¹¹Apanty hei tingzyn neicmik na kumc the; ai hei pucbwan kumc ngguaih key the.

¹²Tiki he RINGHPOUC, nang thu tingsaeng guangc e; meickin guay rui nang ta ningtow puni.

¹³Nang thauna Zaion ta zauc nzianlou puni; kata zauc nzianlou nimei ganv guang the; ntaw hei the.

¹⁴Nang bangc nunc rui Zaion ta nzian e, katauc but guay ta sini nzian e, kaniw kakhang lungh suc e.

¹⁵Zaatc nunc rui RINGHPOUC ta ping puni; kandih guangc guay rui kangamv ta ping puni.

¹⁶Kalam thu RINGHPOUC rui Zaion ta kasiamh thau dat pwkhou, kamei rui kahym daihmei lyanlou puni;

¹⁷ganc nruloumei kamei nunc khwan chulou puni khatni kaniw huayneymei nkinglou puni.

¹⁸RINGHPOUC rui taanclou kanmei tei, guang nimei kin khang hylou o, ntaw puanclou makmei mei nunc rui nganv kata thuanc bam diu khang hylou o.

¹⁹Katuang nthanmei bamv kauh thangc rui RINGHPOUC zauc key khwan e; Tingkauh thangc rui kandih khou zauc key khwan e.

²⁰Kangkai khou bammei nunc rui latlumei khwan kamei chulou khwan e, khatni theih khang latzan luailou bammei nunc ta mpatlou khwan e.

²¹Kumna Zaion khou kazanc kauc ndauh puni, khatni kata Jerusalem khou thuanc puni.

²²Zaatc guay khatni guanghdic guay guang kariuna, RINGHPOUC ta kalum puni.

²³Ai chabwan sw bam khou rui, RINGHPOUC rui ata tisuan sihlou the; kamei rui apanty tiduilou the.

²⁴He Ravguangc, apanty chaeng laan khou rui ata titheiclou rio. He RINGHPOUC, nang hei tingsaeng ringc bam e.

²⁵Reynungc nang rui kandih damclou the, khatni nang baanc kahak rui tingpuk kauh damclou the.

²⁶Mi guay hei maan kan ni de, mi guay hei phey kumcna karaan key kan ni de; tiki nang thu kachac makna nai bam puni. Nang rui mi guay ti hei phey raan ta kumc ganc kan ni de, khatni mi guay hei maan kan ni de.

²⁷Tiki nang thu kaganv thuic kachac mak ge, khatni nang panty nganv zat mak ge.

²⁸Aniw nac nunc kadan makna lungc bam puni, khatni nang rui gaekloumei bangc khou kaniw tou nac nunc lungh geic kadan makna bam puni.