Read Rongmei Naga KALUMLU 103 Bible Online

KALUMLU 103 - Rongmei Naga bible

KALUMLU 103

¹RINGHPOUC ta thuanc o, he abumaengc! He alung kapwm, kazanc nthanmei ta thuanc o!

²RINGHPOUC ta thuanc o, he abumaengc; kamei adih nzian kadan cho twmei amuc rio!

³Kamei rui apaap guay kuaklou e, asunu guay tigaylou e.

⁴Kamei rui ata tarou khou rui kanlou e. Nzianmei khatni zauzian khou kamei rui ata nzianlou e, khatni suaihiamlou e.

⁵Ai chabwan sw tanh tan bam khang, mouckauh kumc tanh khang kamei rui akhang gaymei rana tiilou e.

⁶RINGHPOUC rui rairiu khaengvmei nunc khang latzan swlou e, kaniw khou kaniw tuang dam nchumhna tiilou e.

⁷Kamei rui Mousi khou katuang raeng ndauhlou khwan e, Isaraelmei nunc khou taanvdaih mpeyna taanc lyanlou khwan e.

⁸RINGHPOUC hei zauzian thay e khatni nzian thay e; lunghpuamh khang nzaeng e, karam zian kalaic zat mak ge.

⁹Kamei luh tanh tan bam mak ge; kamei kalungpuamc suang bam mak ge.

¹⁰Aniu khang tii biuhmei dandi kamei aniu khang tii mak ge, aniu paap guay khatni taanc maanvloumei guay khang tei dandi tii mak ge.

¹¹RINGHPOUC rui kata champouhmei nunc ta tingpuk lev kandih duhmei zu nzian e.

¹²Neihpat lev neihkey duhmei saanv kamei rui aniu paap aniu khou rui laa ganclou e.

¹³Kapu rui kanac nunc ta nzianmei kumc, kata champouhmei nunc ta kamei nzian e.

¹⁴Aniu ti hei tabui rui kasiamh tu cho twmei kamei thay e; aniu hei taniang de twmei kamei amuc mak ge.

¹⁵Maansei aniu panty hei pucbwan na kumc e. Aniu hei nwmbangc mwnpwang na kumc e— mi hei thau patna karin gayna puangc patlou the;

¹⁶mpwan aliu guang pwkhou aliu tuai kan the— meic gaanv khat na rui sini, hei tei how dat mak khe.

¹⁷RINGHPOUC ta chakhwang swmei nunc ta kamei tingsaeng nzian bam e; karamgai tei tou nah kin guay khou nai bam puni.

¹⁸Katuang latdyng khou kachangc changhna ngaekmei; khatni katuang latdanv ta lwmnuhpui mei swna piu bammei nunc khou tei nai puni.

¹⁹RINGHPOUC kaguangc bamvpaeng tingkauh khou lou e; kamei hei ramh katana ruc khou guangh e.

²⁰He tanhmei ngammei baanchara nunc, he kalatdanv guay piumei nunc, he kalat chumei nunc, nangniw RINGHPOUC ta thuanc o.

²¹He tingkauh ricmeithiu, he kabangc nunc, kachwn piumeithiu, nangniw RINGHPOUC ta thuanc o.

²²He kaguangcdic khou bammei kabaansyam guay, RINGHPOUC ta thuanc o. RINGHPOUC ta thuanc o, he abumaengc!