Read Rongmei Naga KALUMLU 104 Bible Online

KALUMLU 104 - Rongmei Naga bible

KALUMLU 104

¹RINGHPOUC ta thuanc o, he abumaengc! He RINGHPOUC aRacguangc, nang hei adih daic cho! Nang hei tik gunc daihmei lev hymdaihmei rui karuh e.

²Gaanhmei rui pheybaan kumc karuh e. Nang rui tingpuk ta pheykai ta kumc katingh patlou e,

³khatni karuc thangc dui ruc khou nang kai swlou e. Nang muangh khou tuangc tat re, khatni mpwan swkaeng khou dungc tat re.

⁴Nang rui mpwan ta nang lat phunghmei nunc, khatni tingpalikmei riw ta nang bangc nunc tisw e.

⁵Nang rui kandih ta kabamv khou ntipna duanclou the, mi hei kalung dat lak khe.

⁶Nang rui kandih ta duipui rui phey gwam kumc gwam binlou e, dui rui chyngbut pang ta gumbinlou e.

⁷Nang rui dui ta luh pwkhou hei tei pak kan the; nang tuang latdanv kauc patmei tei chu pwkhou pak kan the.

⁸Mi guay tei chyngbut guay ruc khou luangc keyna, nang rui kasiamhloumei bamv nzwanna nzaengc khou luangc key kan the.

⁹Kandih ta liak bin dat mak khang, kaniw tat kaan dat nuh makmei ramvrei nang rui kaniw khang damclou the.

¹⁰Nang rui nzaengc baek khou duipuakkai damclou the, khatni luanghbut kak kak khou duithuak tiluangclou the.

¹¹Mi guay tei rui nwmbangc khouringc nunc khang dui tiilou e; mi khou tei nwmbangc kuanniam nunc tari kim e.

¹²Kadaeng khou thing bang guay khou, nruayna guay kaniw bou duancna lu suan e.

¹³Tingpuk kauh thangc rui nang rui chyngbut guay khou ting tiriu key e, kumna kandih hei nang suaihiam rui padik ge.

¹⁴Nang rui kiruai guay khang thingnuy paannu, maansei kai lau taanc tuna lungh khang phunling tiilou e.

¹⁵Meic lung tineihlaloumei drakha dui, zawpaanv tigaancloumei laengkic thauc, pumh tigayloumei ntyan tiilou e.

¹⁶Lebanon ngouc tuang sidar bang guay, RINGHPOUC tuang thing bang guay, kamei rui lingcloumei bang guay khou, ting mphamh mphahna tiilou e.

¹⁷Mi khou tei nruayna guay kaniw bou dwan e; aluakc guay alu bang khou kaniw bou dwan e.

¹⁸Chyng kauhmei guay hei chalung nunc khang e; khowlang guay hei mbepui nunc duppui bamv e.

¹⁹Kakwm kaganv chak khang nang rui bw damclou e; neihmik ni kamei key nimei ganv thay e.

²⁰Nang rui zingbangc damclou e, kumna zinghmei ganv khou nwmbangc khouringc mpaeng pat re.

²¹Khoutei kamangliangpui chatanh nunc kataek phuna, Ravguangc rui tiiloumei taek phuna pat re.

²²Neih pat pwkhou kaniw hanc dat re, kaniw kai khou zip dat re.

²³Khoutei maansei nunc taanvtaanh khang pat re, kumna zingckey mak saanv taanc e.

²⁴He RINGHPOUC, nang rui ramh mpeyna damclou e! Nang rui mi guay hei adih ningtyngna damclou cho! mbaanv hei nang rui damcloumei khouringc rui padik ge.

²⁵Daihmei nthukmei duipui khou kasing thay makmei, daihmei nthyammei khouringc nai e.

²⁶Mi khou tei rungh guay tat re, khatni mi khou tei nang rui damcloumei duipui ravsic laviathan ni kasau bam e.

²⁷Kaniw khang kaganv khou kataek tiilou khang, mi guay tei nang khou ngangvlou bam e.

²⁸Nang rui kaniw khang tiilou e, kumna kaniw tu e; nang rui kaniw khang kataek tiilou tina kaniw nggu the.

²⁹Nang rui nang zaw karih ntheilou khou kaniw ping e; nang rui kaniw thiu laa ganc pwkhou kaniw theic e, kumna kaniw taniang guanh dat the.

³⁰Tiki nang rui kaniw khou thiu tiilou pwkhou kaniw cha pat the; nang rui kandih khou panty kathanc tiilou the.

³¹RINGHPOUC hym tingsaeng nai diu! RINGHPOUC kamei rui damcloumei kandic khou kamei neihla diu!

³²Kamei kandih ta zauc pwkhou kandih kadunh e; kamei rui chyngbut guay ta kahi pwkhou mi guay tei maikhou pat re.

³³Ai RINGHPOUC khou lu suan bam ni apanty nai saanv, ai ringh saanv aRacguangc ta thuancna suan ni.

³⁴Alu rui kata tipianlou diu; kalam thu ai neihlamei hei RINGHPOUC khou rui e.

³⁵Paapcmei nunc ta mbaanv khou rui swmutlou diu; meicsimei nunc nai dat mak kan diu. RINGHPOUC ta thuanc o, he abumaengc! RINGHPOUC ta thuanc o!