Read Rongmei Naga KALUMLU 105 Bible Online

KALUMLU 105 - Rongmei Naga bible

KALUMLU 105

¹RINGHPOUC ta thuancku o, kahym dinc ndauh o; kamei rui taancloumei tei zaatc nunc khou raclou o.

²RINGHPOUC ta thuancna suan o; kamei rui taanclou kanmei charynmei taanv guay tei rac o.

³Aniu hei kamei nunc e twna zaenggay o; kata kalummei guay neihla kan diu.

⁴RINGHPOUC khou guang o, kamei nang khang pumtan e, khatni kata kalum bam o.

⁵Kabangc Abraham kiktathiu, kamei rui kadahloumei Jakob kiktathiu,

⁶Ravguangc rui taancloumei charynmei guay khatni kamei rui kauc pat kanmei latzan guay tei ningtow o.

⁷RINGHPOUC aniu Racguangc e; kalatdanv guay hei kandih kapwm khang e.

⁸Kamei kalatdyng tingsaeng ngaek puni, kalatdyng guay meickin 1000 ngaek puni.

⁹Kamei rui Abraham khou swloumei latdyng, Isak khou swloumei latdyng kamei ngaek puni.

¹⁰Tingsaeng nai bam pw nimei latdyng RINGHPOUC rui Jakob khou nrianhlou the.

¹¹“Ai rui nang khang Kanaan kandic tiilou puni, mi hei nang tuang sw puni,” twna kamei rui sa khwan e.

¹²Ravguangc mei nunc Kanaan kandic khou gin swna meic katit na bam khwan e.

¹³Kaniw kandih akhat khou rui akhat khou, guanghdic akhat khou rui akhat khou lungc ruan tat bam khwan e.

¹⁴Tiki kaniw ta meic gaanv khat na rui sini tiryanra mak khang Ravguangc rui swlou khwan e. “Kaniw ta gaeklou khang kamei rui guangh nunc khou kakhimlou khwan e;

¹⁵ai rui kadahloumei abangc nunc ta; khatni atuang muczwng nunc ta kahi nuh mak ge twna salou khwan e.”

¹⁶RINGHPOUC rui kaniw khou nap nkowmei tiguang the, tu khang maek khwan e.

¹⁷Tiki Josep ta bangh swna zuanclouna, RINGHPOUC rui kaniw hu ndiu kasuakclou khwan e.

¹⁸Katan khou kang bangclou khwan e, kaguang khou ntanh guangkhap khaplou khwan e.

¹⁹Kamei rui dinc kasuakcloumei tei guang tangh mak saanv, RINGHPOUC rui kata nchanv khwan e.

²⁰Mi tangv Izipmei guangc rui kata mpatlou dat khwan e; zaatc nunc ta sinmeipu rui kata mpatlou khwan e.

²¹Kamei rui kakhou kakandih tuang taanv nsinlou the, mi kandic ruc khou tei kata kaipouc tiswlou the.

²²Guangh tuang meicdaihmei nunc ruc khou ngamv phungcna khatni katuang gaanvthaic nunc ta ncham khang ngamv phungcna kaipouc swlou khwan e.

²³Mi tangv Jakob tei Izip khou key lungc khwan e.

²⁴RINGHPOUC rui kamei nunc ta tikingc nkiuclou khwan e, kaniw ta zauczihmei nunc khang suangc titanclou the.

²⁵Izipmei nunc rui kaniw ta karaeng khang tiswlou the, kaniw bangc Isaraelmei ta tiguat the.

²⁶Mi tangv kamei rui kabangc Mousi ta khatni kamei rui kadahloumei Aron ta ndiulou the.

²⁷Kamei Ravguangc tuang sw nchinmei taanv mpeyna taanc the, Izip khou charynmei taanv mpeyna taanc the.

²⁸Ravguangc rui mi kandic khou tei, zinghmei tiguang the, tiki Izipmei nunc kalatdanv piu mak khe.

²⁹Kamei rui kaniw tuang duithuak guay zei tiguanhlou the, kaniw tuang khav guay swluai the.

³⁰Kaniw kandic gou rui padik the, guanghkai nganv padik the.

³¹Ravguangc rui latdanv pat pwkhou, sim khatni chagou pang rui mi kandic kapwm tei padik the.

³²Kamei rui nrihthai khatni ganh mi kandic khou tei ting phaan tii key the.

³³Kamei rui kaniw tuang drakha bang guay khatni laengkic bang guay sw kasic the, thingbang guay swbau ngam the.

³⁴Kamei rui latdanv tii pat pwkhou, kasing thay makmei pyzinpui pang aching akha pat the.

³⁵Mi guay tei rui mi kandic khou tei naimei ramh bang guay tu ngam the; phunling guay ni tu ngam the.

³⁶Kamei rui Izipmei kaikhunc guay khou nareimei mpouh guay ta swluai the.

³⁷Mi tangv kamei rui Isaraelmei nunc ta zay pat the; kaniw kachaekc khatni daandi phungc pat the. Kaniw guay tei pumh gay the khatni tanc the.

³⁸Izipmei nunc kaniw ta ping the, kaniw tat kan pwkhou kaniw neihla the.

³⁹Ravguangc rui muangh rui kaniw ta gum binlou the, zingbangc tigaanclou khang mai tiilou the.

⁴⁰Kaniw rui ney pwkhou kamei rui kaniw khang akhuaihna pang tiguang the; kamei rui tingkauh thangc rui, taektw tii keyna ti-ngulou the.

⁴¹Kamei rui taudaic laanclou the, kumna dui puak pat the, duithuak kumcna sypungramv khou luangc pat the.

⁴²Kamei rui katuang nthanmei latdyng, kabangc Abraham khou swloumei tei kamei amuc mak ge.

⁴³Kumna kamei rui katuang kadahloumei mei nunc ta zay pat khwan e. Khoutei kaniw lu suanna neihlana kauc khwan e.

⁴⁴Kamei rui zaatc baihmei nunc tuang ramv tei kaniw khou tiilou the kaniw tuang laupuk tei laa khang swlou the,

⁴⁵heikumna swlou pwkhou kamei nunc tei kalatdanv piu khang e, khatni kalatdanv guay ngaek khang e. RINGHPOUC ta thuanc o!