Read Rongmei Naga KALUMLU 106 Bible Online

KALUMLU 106 - Rongmei Naga bible

KALUMLU 106

¹RINGHPOUC ta thuanc o! RINGHPOUC ta thuancku o! Kalam thu kamei hei gay e, kamei tingsaeng nzian bam e.

²Kamei rui taancloumei taanv guay tei thow rac ngam ni cho? Thow rui kata thuanc tangc ngam ni cho?

³Katuang latdanv guay piumei nunc, kaganv thuic nchumhna taanc bammei nunc tei sangaymei e.

⁴He RINGHPOUC nang mei nunc ta nang nkhavlou pwkhou; ata ningtowlou o khatni mi pang khou tei ata ni tikazauhlou o.

⁵He RINGHPOUC, nang mei nunc lungcgay chingkhiuhna lungc bammei ta how tow khang khatni nang tuang zaat neihlamei khou tei ai ni neihla nchamc khang swlou o.

⁶Aniw pupouc nunc kumcna aniw ni paapc taanc the; aniw hei kheih si the, simei taanv taanc the.

⁷Aniw pupouc nunc Izip khou Ravguangc tuang charynmei taanv guay ta kabah thay mak khwan e; karam zian heizu lyanloumei tei kaniw amuc khwan e, Ntou duipui khou kaniw Kauh Liangmeipu ta liam the.

⁸Tiki kamei rui daihmei kangamv ndauh khang kalatdyng kalaic makna kaniw ta kanlou the. Daihmei kangamv ndauh khang,

⁹kamei rui Ntou duipui ta luh the, hei tei thip kan the; kamei rui kamei nunc ta ramvkiang khou zay kaan patlou the.

¹⁰Kamei rui kaniw ta howmumei nunc baanc khou rui kanlou the. Kaniw ta zauczihmei nunc khou rui kaniw ta kanduaklou the.

¹¹Tiki zauczihmei nunc ta, dui rui liak bin the; kaniw gaanv khat na sini theic nsaekclou mak khe.

¹²Khoutei kamei nunc kalatdyng guay tei lwm the, kata thuancna suan the.

¹³Tiki kamei rui taancloumei tei kaniw amuc nuangc the, kumna kalat nkhwan makna kaniw taanc khwan e.

¹⁴Tazikramv khou tei kaniw tu nii mbu laina, Ravguangc ta nchanv the.

¹⁵Kum tina kaniw rui neymei tei kamei kaniw khou tiilou the, tiki simei ravpyan kaniw khou tiguang the.

¹⁶Mi tazikramv khou tei RINGHPOUC tuang nthanmei bangc Mousi lev Aron ta kaniw mamav the.

¹⁷Khoutei kandih nkakc patna Dathan khatni Abiram lev kakaikhunc ta aluakc kan the.

¹⁸Kaney thei laymei nunc ruc khou mai keyna, mi meicsimei nunc ta tei raw mut kan the.

¹⁹Kaniw Sinai khou kachaekc guaichic kasiamhna mi ravmaengc ta tei kalum the.

²⁰Kaniw hymdaihmei Racguangc phaan thingnuy tumei khouringc maengc rui nsin the.

²¹Taanvdaih taanclouna kaniw ta Izip khou rui kanpatloumei— Racguangc ta kaniw amuc the.

²²Ham ramv khou charynmei taanv taancloumei, Ntou duipui khou meic pingmei taanv taancloumei tei.

²³Ravguangc rui kamei nunc ta swmut puni the twna sa pwkhou, kamei rui kadahloumei bangc Mousi rui Ravguangc hu khou ding thauna kaniw ta swmutlou nimei lungpuam ta khaam keylou the.

²⁴Kaniw Ravguangc latdyng ta lwm makna, gay kanmei kandic ta ntaamv the.

²⁵Kaniw pheykai khou bamna tanglum the, RINGHPOUC lat piu mak khe.

²⁶Kumna kaniw ta tazikramv khou swluailou puni, twna kamei rui nthukmei latdyng sw the.

²⁷Kaniw kikta ta zaatc baihmei pang khou nthau phaklou puni, kumna kaniw ginramc thangc theiclou puni twna kaniw khou salou the.

²⁸Mi tangv Peor khou, kaniw Baal ta kalummei khou lay kazauh the, theihmei rav nunc khou khaengloumei puat kaniw tu the.

²⁹Kaniw taanv rui RINGHPOUC lungpuam tithaulou the, aniw pang khou si sihmei ravpyan tiguang the.

³⁰Tiki Phinehas rui thauna nkhuaimei ta tei dandi tii the, kumna ravpyan tei nthaekc the.

³¹Hei tei rui kamei ravchaptatmei e twna aseic nganvna ningtow bam e, guang nimei ganv guay khou ningtow bam puni.

³²Meriba duipuakckai khou kaniw rui RINGHPOUC lung tipuamc the, kaniw zaeng rui Mousi tei ryanramei khou keylou the.

³³Kaniw rui kalung heidikamv tipuamclou tina, kakhanh makna kamwang khou rui sa pat the.

³⁴Ravmaengc kalummei nunc ta swmut ngam khang RINGHPOUC rui kaniw khou latdanv tii khwan sini kaniw piu mak khwan e.

³⁵Tiki kaniw lev now kaw nah laa kary the, kaniw ravmaengc kalummei nunc thiak laa the.

³⁶Ravguangc mei nunc ravmaengc kalum the, hei tei rui kaniw ta swmutlou the.

³⁷Kaniw nac mpouh aluh nunc ta ravsic khang khaeng the.

³⁸Kakhuay maekmei alauc nunc zei Kanaanmei tuang ravmaengc khou bunlouna mi zei guay tei rui kaniw kandic sw mphuam the.

³⁹Kaniw tuang taanv guay rui kaniw ta swtanac the, Ravguangc khou lwmnuh makmei sw the.

⁴⁰Kumna RINGHPOUC rui kamei nunc ruc khou lungpuamc the; kamei kaniw ta karaeng the.

⁴¹Kamei rui kaniw ta ravmaengc kalummei nunc baanc khou ganclou the, kaniw ta zauczihmei nunc rui sin the.

⁴²Kaniw ta zauczihmei nunc rui kaniw ta rai the, kaniw bangc khou lou the.

⁴³Katupc sihna RINGHPOUC rui kamei nunc ta kan patlou the, tiki kaniw meicliam nii the, paapc khou lup nthuk ranv ranv key kan the.

⁴⁴Kum sini kaniw kapna huay pwkhou, RINGHPOUC rui chulou the, kamei rui kaniw ramrianra thaylou the.

⁴⁵Kaniw khang rui kamei kalatdyng ningtow the, kaniw ta nzian langvpui zaeng rui kamei kakim key the.

⁴⁶Kaniw ta nym tatmei nunc lung khou tei kaniw ta nzianmei tipatlou the.

⁴⁷He RINGHPOUC, aniw Racguangc; aniw nang ta thuancku bam khang khatni nang zanc nthanmei thuanc bam khang, aniw ta kanlou o, aniw ta zaatc pang khou rui khuam guanglou dat ro.

⁴⁸RINGHPOUC ta thuanc o, Isarael Racguangc ta thuanc o! Kata ntaw khatni tingsaeng thuanc o! Meic katana “Amen!” twna sa o. RINGHPOUC ta thuanc o!