Read Rongmei Naga KALUMLU 107 Bible Online

KALUMLU 107 - Rongmei Naga bible

KALUMLU 107

¹“RINGHPOUC ta thuanc o, kalam thu kamei hei gay e; kamei taek makna aniu ta nzian bam e!”

²Kamei rui kanloumeithiu, mi lat hei sa kaluaih dat datna RINGHPOUC ta thuanc o. Kamei rui nangniw ta zauczihmei nunc khou rui kanlou the,

³khatni ginramc khou rui, neihpat neihkey thangc rui, dihpy dihba thangc rui nangniw ta phungc guanglou dat the.

⁴Gaanvsaekc rui kaniw lungc nimei kaidai chaeng phutow makna, chaeng maekmei sypungramv khou ruan tat bam khwan e.

⁵Kaniw ndaapc tari khwan e, kumna theihpui tadiuc bam khwan e.

⁶Kumna kaniw ryanra bammei ganv khou tei, kaniw RINGHPOUC ta kaw the, kamei rui kaniw ta kaniw ryanra khou rui kanlou the.

⁷Kaniw lungc nimei kaidai guang tangh mak saanv, kamei rui kaniw ta nchumhmei chaeng khou zay tat the.

⁸Kamei rui taek makna nzianlou bammei khang tei, kamei rui kaniw khang charynmei taanv taancloumei guay khang tei aniu RINGHPOUC ta thuancku nina e.

⁹Tarimei nunc ta kamei rui tikimlou e, ndaapcmei nunc ta ti-ngulou e.

¹⁰Meic gaanvsaekc, kangkai khou bangclouna zinghmei bamv khou bam khwan e.

¹¹Kaniw rui Ngamparymei Racguangc latdanv liampui zaeng rui, kamei rui nchamloumei ta laalou makpui zaeng rui e.

¹²Kaniw taanvtaanc ranvna suan key the; kaniw bow key the; meic gaanv khat na rui sini nkhavlou dat mak khwan the.

¹³Kumna kaniw ryanra bammei ganv khou tei, kaniw RINGHPOUC ta kaw the, kamei rui kaniw ta kaniw ryanra khou rui kanlou the.

¹⁴Kamei rui kaniw ta, kamv ramh rammei khatni zinghmei bamv khou rui laa patlou dat the, kumna kaniw tuang kangriang swtaeklou the.

¹⁵Kamei rui taek makna nzianlou bammei khang rui, RINGHPOUC ta thuancku nina e, kamei rui kaniw khang taancloumei charynmei taanv guay khang rui thuancku nina e.

¹⁶Kamei rui kuanzinc kaikhamv guay swralou e, ntanhluang guay swbaulou e.

¹⁷Meic gaanvsaekc kaniw paap zaeng rui sucnu bam khwan e, kaniw khuayba zaeng rui ryanra bam khwan e.

¹⁸Kaniw tu nii zangv nii dat mak khe, theih khang ana guang khwan the.

¹⁹Kumna kaniw ryanra bammei ganv khou tei, kaniw RINGHPOUC ta kaw the, kamei rui kaniw ta kaniw ryanra khou rui kanlou the.

²⁰Kalatdanv rui kaniw ta tigaylou the, kaniw ta tarou khou rui zay patlou the.

²¹Kamei rui taek makna nzianlou bammei khang rui; kamei rui kaniw khang taancloumei charynmei taanv guay khang rui, kaniw RINGHPOUC ta thuancku nina e.

²²Kaniw puatkat katna kata thuancku nina e, neihlamei lu rui kamei rui taancloumei tei rac ndauh nina e.

²³Gaanvsaekc rui rungh tuangcna kaniw bung khang ntaanvna duipui khou tat bam khwan e.

²⁴RINGHPOUC taanv kaniw how khwan e, kamei rui duipui khou taancloumei charynmei taanv guay how the.

²⁵Kamei rui latdanv tii pwkhou tanhmei pwanzingc aliu thau the, duimuat tikamuatc thau the.

²⁶Rungh guay tei tingpuk puanc ku tangc, dui syng phungc key tangcna kadiang the, mi ganv khou tei kaniw bauc pat ngam mak khe.

²⁷Kaniw zouh mbamei nunc kumc bam khwan e, kaniw ramhei guay tei gaeng mak khe.

²⁸Kaniw ryanra bammei ganv khou tei, kaniw RINGHPOUC ta kaw the, kamei rui kaniw ta kaniw ryanra khou rui kanlou the.

²⁹Kanuaih katungh bammei pwanzingc tei kamei rui khaam rymlou the, duimuat guay rim key the.

³⁰Nchwng key pwkhou kaniw neihla the, kaniw tat nimei bamv khou kabiu kabaeng maekna kaniw ta phungc guanglou the.

³¹Kamei rui taek makna nzianlou bammei khang rui, kamei rui kaniw khang taancloumei charynmei taanv guay khang rui, kaniw RINGHPOUC ta thuancku nina e.

³²Meic nunc kalum khang guang kariu bammei khou, kahym kauc ndauh nina e, kapy swmei nunc peikai khou kata thuancku nina e.

³³RINGHPOUC rui duithuak guay ramvkiangdic tiguanhlou the, duipuakkai tipuak taanlou the.

³⁴Meic nunc paap zaeng rui kamei rui kandih gaymei ramv tei, ntey tasicramv tiguanhlou the.

³⁵Kamei rui sypungramv khou zeih tichungc padiklou the, kangc phui thiumei dic khou duipuakkai tipuak padiklou the.

³⁶Kamei rui ndaapcmei nunc ta mi khou tei tilungclou the, kaniw lungh khang mi khou tei kaidai kasiamhlou the.

³⁷Kaniw laupuk khou phunling lingc the, drakha bang lingc the, kathai geicna laaguang the.

³⁸Kamei rui kamei nunc ta suaihiamlou the, kaniw tunapuan lungc kingckiuc pat the; kaniw tuang khouringc pang ti-ntang nrailou mak khe.

³⁹Ravguangc mei nunc tei rai riumei khaengvna ryanra zaengsina, zawsina zak bam pwkhou,

⁴⁰kaniw ta rai riumei nunc ta kamei rui karaengmei lyanlou the, kaniw ta chaeng maekmei tazikramv khou tiruan tat the.

⁴¹Tiki lungcthuy lakmei ta kamei rui, kaniw ramrianra khou rui zay thaulou the, kaniw kaikhunc ta lauziu pang kumc meic tikingclou the.

⁴²Ravchaptatmei nunc hei tei howna zaenggay e, tiki meicsimei guay ta titazik chiklou e.

⁴³Ningtyngmei guay rui mi guay hei kakhanh kan diu; RINGHPOUC rui taek makna nzianlou bammei ti hei thuancku kan diu.