Read Rongmei Naga KALUMLU 115 Bible Online

KALUMLU 115 - Rongmei Naga bible

KALUMLU 115

¹He RINGHPOUC, nang ta na aniw thuanc ni, aniw ta hamh e; nang ramzian khatni lwmlou nuhmei khang rui nang ta na aniw thuanc ni.

²Tabui swna zaatc nunc rui, “Nangniw Racguangc tabui thangc cho?” twna aniw khou thanv bam tu cho?

³Aniw Racguangc tingkauh khou bam e, kamei rui ningmei kamei taanc e.

⁴Kaniw tuang rav nunc tei daandi kachaekc de, maansei baanc rui kasiamh tuang de.

⁵Kaniw mwang nai e, tiki lat sa ngam mak ge; kaniw mik nai e, tiki how mak ge.

⁶Kaniw nu nai e, tiki chu mak ge; kaniw nukwang nai e, tiki namh mak ge.

⁷Kaniw baanc nai e, tiki kahi ngam mak ge; kaniw khwan pat ngam mak ge.

⁸Kaniw ta kasiamhloumei khatni kaniw khou lwmloumei guay tei kaniw rui kasiamhloumei racmaengc nunc kumc kan diu.

⁹RINGHPOUC khou lwmlou o, he Isaraelmeithiu. Kamei rui nangniw ta nkhavlou e khatni gaeklou e.

¹⁰RINGHPOUC khou lwmlou o, he Ravguangc tuang amuc nunc. Kamei rui nangniw ta nkhavlou e khatni gaeklou e.

¹¹RINGHPOUC khou lwmlou o, he kata kalummei nunc. Kamei rui nangniw ta nkhavlou e khatni gaeklou e.

¹²RINGHPOUC rui aniu ta ningtowlou e khatni aniu ta suaihiamlou puni; kamei rui Isaraelmei khatni Ravguangc tuang amuc nunc ta suaihiamlou puni.

¹³Daihmei ta ni, nthyammei ta ni, kata pingmei kathuic ta kamei rui suaihiamlou puni.

¹⁴RINGHPOUC rui nang khatni nang kikta khou nang tunapuan tiigeiclou diu!

¹⁵Nang ta RINGHPOUC rui suaihiamlou diu! tingkauh khatni kandih damhmeipu rui suaihiamlou diu!

¹⁶Tingkauh hei RINGHPOUC tuang e, tiki kandih hei maansei khou tiilou the.

¹⁷RINGHPOUC ta theihmei rui thuanh mak ge, rimh rimmei dic thangc key kanmei gaanv khat na rui sini thuanh mak ge.

¹⁸Tiki ringc bammei aniu rui ntaw khatni tingsaeng kata thuanc ni. RINGHPOUC ta thuanc o!