Read Rongmei Naga KALUMLU 116 Bible Online

KALUMLU 116 - Rongmei Naga bible

KALUMLU 116

¹Ai RINGHPOUC ta nzian e; kalam thu kamei rui akhwan chulou e; kamei ai huayneymei nkinglou e.

²Ai kata kawmei kathuic kamei nkinglou e.

³Theihmei adaeng ana guang khwan the, tarou ta pingmei akhou guang khwan the; ai hei pingmei khatni lungh ryanramei padik bam khwan the.

⁴Khoutei “Ai ney e, he RINGHPOUC, ata kanlou o!” twna ai RINGHPOUC ta kaw khwan e.

⁵RINGHPOUC hei zauzian thay e khatni gay e; aniu Racguangc hei zauzian thay e.

⁶RINGHPOUC rui ngangv bamv maekmei nunc ta gaeklou e; ai theic sucnumei bamv khou rui, kamei rui ata kanlou e.

⁷Lwmgay bam o, he alungle, kalam thu RINGHPOUC hei akhang gayna swlou guang the.

⁸RINGHPOUC rui ata theihmei khou rui kanlou the, kamei rui amikdui roulou the, khatni ai zawsi nimei khou rui tiduaklou the.

⁹Kumna ai ringhmei kandic khou RINGHPOUC mav khou tat re.

¹⁰“Ati hei niak puatlou the,” twna ai sa bam pwsini ai lwm tanh tan bam khwan e.

¹¹“Gaanv khat na khou sini lwm mak khe,” twna ai pingna sa bam sini.

¹²RINGHPOUC kamei rui akhang suaihiamloumei guay khang ti hei ai tabui tii ni?

¹³Ata kanloumei khang rui thuanckuna ai rui RINGHPOUC khang drakha dui kat ni.

¹⁴Kamei nunc kariumei bamv khou ai rui nrianhloumei tei ai kakhang tii ni.

¹⁵Katuang mei gaanv khat theic pwkhou, RINGHPOUC kalung adih kabiu cho!

¹⁶Ai nang bangc e, he RINGHPOUC; apui kumcna ai nang siamruai sw e. Nang rui ata theihmei khou rui kanlou the.

¹⁷Ai nang ta thuanckuna khaeng ni, khatni ai nang khou huayney ni.

¹⁸Ai rui nrianhloumei tei, nang mei guay kariumei bamv khou,

¹⁹nang tuang Ravkai Jerusalem khou nthanmei bamv khou, ai nang khang tii ni. RINGHPOUC ta thuanc o!