Read Rongmei Naga KALUMLU 118 Bible Online

KALUMLU 118 - Rongmei Naga bible

KALUMLU 118

¹RINGHPOUC ta thuanc o, kalam thu kamei hei gay e, khatni karam zian hei tingsaeng e.

²“Karam zian hei tingsaeng e,” twna Isaraelmei nunc rui sa kan diu.

³“Karam zian hei tingsaeng e,” twna Ravguangc tuang amuc nunc rui sa kan diu.

⁴“Karamzian hei tingsaeng e,” twna kata pingmei guay rui sa kan diu.

⁵Ai ryanra khou RINGHPOUC ta kaw khwan e; kamei rui dawlouna ata tiduaklou khwan e.

⁶RINGHPOUC rui ata bam nduanghlou bam e, ai ping lak ge; thow rui akhou tabui sw ngam nina cho?

⁷Ata nkhavloumei hei RINGHPOUC rui e, kumna ata zauczihmei nunc ta zaw tisiloumei ta ai how puni.

⁸Maansei khou ngangvloumei suangc RINGHPOUC khou duploumei hei gay e.

⁹Guangh nunc khou ngangvloumei suangc RINGHPOUC khou duploumei hei gay e.

¹⁰Zauczihmei mpeyna rui ata ding haengv khwan e; tiki RINGHPOUC pumtan rui ai rui kaniw ta swmutlou the!

¹¹Kaniw ata ding haengv khwan e; tiki RINGHPOUC pwmtan rui ai rui kaniw ta swmutsutlou the!

¹²Kaniw nkhuaih pang kumc ata huamc guang khwan e; tiki kaniw tei bapcrau ntei kumc matat khat na khou chuangc mut kan the. RINGHPOUC pumtan rui ai rui kaniw ta swmutsutlou the.

¹³Kaniw reic thauna ata adow ranv gut khwan e, kumna ai bow key ni kumc the; tiki RINGHPOUC rui ata nkhavlou khwan e.

¹⁴RINGHPOUC rui akhang pumtan tiilou khwan e khatni titanclou khwan e. Kamei rui ata kanlou the.

¹⁵“RINGHPOUC rui baengtanc rihliangmei taanv taanclou the, twna rihngammei lu khwan ravchap tatmei nunc pheykai khou kauc bam e

¹⁶RINGHPOUC baanzat rui zaykauh thauna, baengtanc rihlianghmei taanv taanclou the.”

¹⁷Ai theic lak ge; ai ringcna RINGHPOUC taanv kauc ndauh puni.

¹⁸Kamei rui ata ranv sihna riaplou the; tiki kamei rui ata titheih mak ge.

¹⁹Ravkai raengcmun akhang laanclou o; ai gutna RINGHPOUC ta thuanc ni!

²⁰Mi hei RINGHPOUC tuang raengcmun e; ravchaptatmei na rui gut khang e.

²¹Ai nang ta thuanc e, he RINGHPOUC; kalam thu nang akhwan chulou the, kalam thu nang rui akhang rihngammei tiilou the.

²²Kai swmei nunc rui laa zihna ganc patloumei tauc tei kunghmei kaikwn tauc tiswlou the.

²³Mi hei RINGHPOUC rui taanclou the, mi hei aniu mikzaw khou charynmei e.

²⁴Aseic hei RINGHPOUC tuang rihngammei tingmik ge; aniu neihla di kho!

²⁵Aniw ta kanlou o, he RINGHPOUC, aniw ta kanlou o! Aniw ta zaw tikauhlou o, he RINGHPOUC!

²⁶RINGHPOUC zanc khou guangmeipu tei zaenggaymei e! RINGHPOUC Ravkai khou rui aniw nang ta suaihiamlou e.

²⁷RINGHPOUC hei Ravguangc e; kariw rui aniu ta tigaanclou e. Nang baanc khou thingkwan sinna ngay thau tho, kumna ravchapaeng twan nkuay tho.

²⁸Nang hei aRacguang e, kumna ai nang ta thuancku e; nang hym ai kauc ndauh ni.

²⁹RINGHPOUC ta thuanc ku o, kalam thu kamei hei gay e; karamzian tingsaeng e.