Read Rongmei Naga KALUMLU 119 Bible Online

KALUMLU 119 - Rongmei Naga bible

KALUMLU 119

¹Kapanty khou khuay maekmei nunc, Ravguangc latdanv piuna lungc bammei nunc tei, sangaymei nunc e.

²RINGHPOUC latdanv guay piu bammei nunc, kaniw lungsyng khou rui kalat piu bammei nunc tei, sangaymei nunc e.

³Kaniw nkhuaimei taanc zat mak ge; kaniw RINGHPOUC chaeng khou tat re.

⁴He RINGHPOUC, nang rui aniw khang nang latdanv guay tiilou the, khatni mi guay tei piu nthuihna piu khang aniw khou dinclou the.

⁵Nang latdyn guay tei ai piu chuyna piu khangh ai machunh e.

⁶Ai nang tuang latdanv guay khou tei lunghlou bam e thei, ata tizaklou lak ge.

⁷Ai rui nang tuang nchumhmei latzan guay tei thay pwkhou, ai alung nthanna nang ta thuanc ni.

⁸Ai nang tuang latdyn guay piu ni; ata tabui nungc na sini ganclou rio!

⁹Akumhna chabwan khat rui kapanty nthanna lungc bam ngam nina cho? Nang latdyn guay piupui paan rui ngam khang e.

¹⁰Nang siamruai sw khang alung kapwm rui karamc ni; nang latdanv liam mak khang gaeklou o.

¹¹Ai nang khou paapc taanh mak khang, ai alung khou nang latdyn rylou e.

¹²Ai nang ta thuanc e, he RINGHPOUC; nang chaeng akhou dinclou o.

¹³Nang rui tiiloumei latdyn guay tei, ai khwan ranvna sa kaluaih dat dat bam ni.

¹⁴Lanv geicna naimei khang suangc, nang latdanv guay piumei khou ai neihla bam e.

¹⁵Nang latdyn guay tei ai kathai e; nang rui nchamloumei tei ai zauc mincna zauc e.

¹⁶Nang latdyn guay khou tei ai neihla e; nang latdanv guay tei ai amuc lak ge.

¹⁷Ai ringcna nang lat piu bam khang, nang bangc ata zauc nzianlou o.

¹⁸Nang latdyn khou naimei charynmei nchumhmei lat guay tei how khang, amik tiraklou o.

¹⁹Ai hei kandih khou gin de, nang tuang latdanv guay tei akhou nkamhlou rio.

²⁰Nang tuang latdyn thay niimei rui kaganv thuic alung chuangc bam e.

²¹Daihriw swpui mei ta nang luh e; nang latdanv piu makpui mei ta sianglou e.

²²Kaniw rui tizakmei khatni malamei khou rui ata tiduaklou o, kalam thu nang latdyn guay ai piu e.

²³Dihsinpouc nunc kariuna ata sw kasic khang tamdiu the, tiki ai thu nang latdyn kathai ni.

²⁴Nang latdyn guay tei rui ata tineihlalou e; mi guay tei rui ata chaengzaylou e.

²⁵Ai hei zawsina mbut ding khou zip bam the; nang latdyng thei layna ata tikaluanlou dat ro!

²⁶Ai rui taanclou kanmei guay tei sa kalauh pwkhou, nang rui akhou dawlou the; akhou nang chaeng dinclou the.

²⁷Nang latdyn guay kabac tithaylou o, kumna nang tuang charynmei taanv guay tei ai makumh bam ni.

²⁸Lungh ryanramei rui ai lak the; nang latdyng thei layna apumtan titanclou o.

²⁹Nkhuaimei chaeng khou tat nimei khou rui ata gaeklou o, khatni nang ramgai paan rui nang latdyn akhou nchamlou o.

³⁰Ai lat piu ni the twna ding the; nang latdyn guay khou ai lunghlou the.

³¹Nang latdyn guay piuna tat the; ata tizaklou rio.

³²Ai nang latdyn guay piu niina piu ni, kalam thu mbuna kabah thaymei nang rui akhou tiilou puni.

³³He RINGHPOUC, nang latdyn guay kabac akhou dinclou o, mi guay tei ai kaganv thuic piu bam ni.

³⁴Nang latdyn kabac akhou dinclou o, hei tei ai alung kapwm rui piu ni.

³⁵Nang latdanv guay tei ata tipiulou o, kalam thu mi guay khou tei akhang neihlamei laatow e.

³⁶Lungcgaymei ta suangc nang latdyn guay piu nimei lung tiilou o.

³⁷Gaeng makmei khou lunghlou nimei khou rui ata gaeklou o; nang rui nrianhloumei kumcna akhou pumtan tikaluanlou o.

³⁸Nang bangc akhou nang latdyng, nang lat piumei guay khang swlou kanmei latdyng tei, tiguang tangclou o.

³⁹Ai rui pingmei tizak nimei khou rui ata kanlou o; nang latzan hei adih charyn cho!

⁴⁰Ai nang latdanv guay piu nii e; apanty tikaluanlou o.

⁴¹Nang ata adih nzian cho twmei akhou lyanlou o, he RINGHPOUC, kumna nang latdyng thei layna ata kanlou o.

⁴²Kum pwkhou ata tizak bammei nunc khou ai daw ngam puni, kalam thu nang lat khou ai lwmlou e.

⁴³Kaganv thuic nchumhmei sa ngam khang ata nkhavlou o, kalam thu ai nang latdyn khou lwmgay bam ni.

⁴⁴Ai kaganv thuic nang latdyn piu ni.

⁴⁵Ai nyngswna lungc ni, kalam thu nang latdyn guay piu khang ai karamc e.

⁴⁶Ai nang tuang latdanv guay guangh nunc khou sa ndauh ni, ai zak lak ge.

⁴⁷Nang latdanv guay piumei khou akhang neihlamei nai e, kalam thu ai mi guay tei nzian e.

⁴⁸Ai nang latdanv ta champouh e khatni nzian e, nang latdyn guay tei ai makumh bam ni.

⁴⁹Nang rui nang bangc akhou swloumei latdyng tei ningtowlou o, hei tei rui akhou rigwnmei tiilou e.

⁵⁰Ai ryanramei ganv khou nganv ata swmlou e, kalam thu nang latdyng rui achaengc tiringclou e.

⁵¹Daihriw swpui mei nunc rui ata nsic bam e, tiki nang latdanv khou rui ai duc pat mak ge.

⁵²Nang tuang reynungc latdyn guay tei ai ningtow e, khatni hei tei rui ata swmgaylou e, he RINGHPOUC.

⁵³Meicsimei nunc rui nang latdanv swbak bammei ta ai how pwkhou, alungpuam rui padik khwan e.

⁵⁴Duimei panty dak khou hei, nang latdanv guay lam khou ai lu phuak ge.

⁵⁵Zingbangc ai nang ta ningtow e, he RINGHPOUC; khatni nang latdyn lam khou ai kakhanh e.

⁵⁶Nang latdanv guay piumei khou ai neihlamei laatow e.

⁵⁷Akhang kahawmei kiu nang na de, he RINGHPOUC; nang latdyn guay piu khang ai latdyng sw e.

⁵⁸Nang rui nrianhloumei kumcna ata zauc nzianlou khang, alung kapwm rui nang khou ney e.

⁵⁹Akheiliak ta ai kakhanh the, khatni nang latdyn thei layna tat khang ai latdyng sw the.

⁶⁰Kaluak kalat ai nang latdyn piu the.

⁶¹Meicgay makmei nunc rui akhang phah zawlou the, tiki ai nang latdyn amuh mak ge.

⁶²Nchumhmei nang latdyn guay khang rui ai zipchwng thauna nang ta thuanc e.

⁶³Ai hei nang siamruai swmei guay pam e, nang latdyn piumei guay pam e.

⁶⁴He RINGHPOUC, kandih hei nang tuang taek makmei ramzian rui padik ge; nang tuang latdanv guay akhou dinclou o.

⁶⁵Nang latdyng nang ngaek ge, he RINGHPOUC, kumna nang hei nang bangc akhang gayna swlou the.

⁶⁶Akhou ningting khatni takh tiilou o, kalam thu ai nang latdanv guay khou lwmlou e.

⁶⁷Nang rui ata riaplou makmei hu khou tei, ai chaeng maanv tat bam khwan e, tiki ntaw thu ai nang lat piu the.

⁶⁸Nang hei adih gay cho, adih nzian cho! Nang latdanv guay akhou dinclou o.

⁶⁹Daihriw swmei nunc rui alam khou saraamcna sa e, tiki nang latdyn guay hei alung kapwm rui piu e.

⁷⁰Mi nunc tei kabah thay mak khe, tiki ai thu nang latdyn khou neihla e.

⁷¹Ata riaploumei tei akhang gay khang khwan e, kalam thu hei tei rui akhou nang latdanv guay nchamlou e.

⁷²Nang rui tiiloumei latdyn tei akhang kandih khou naimei lanv guay suangc gay e.

⁷³Nang rui ata damclou the, nang rui ata tikabiu kabaeng makna lou the; Ai nang latdyn guay tei thay khang, akhang kabah thaymei tiilou o.

⁷⁴Nang ta pingmei nunc tei ata how pwkhou neihla puni, kalam thu ai nang latdyng khou lwm e.

⁷⁵He RINGHPOUC, nang latdyn guay hei nchumh e twmei ai thay e, nang hei nchumhmei lapui zaeng rui ata riaplou tu e twmei ai thay e.

⁷⁶Nang rui nang bangc akhou nrianhloumei kumcna, taek makmei nang ramzian rui ata swmgaylou o.

⁷⁷Ai ringh khang ata zauc nzianlou o; kalam thu ai nang latdyn khou neihla e.

⁷⁸Daihriw swmei nunc tei zak kan diu, kalam thu kaniw saraamcna ata nkhamlou bam e; ai thu nang latdyn guay ta tei makumh bam ni.

⁷⁹Nang ta pingmei nunc tei, nang latdanv thaymei guay tei akhou guang diu.

⁸⁰Zawsina zak nimei khou rui duak khang, ai nang latdanv guay nthuihna piu diu!

⁸¹He RINGHPOUC, ata kanlou khang nkhwanna, ai ngam mak key the; ai nang lat khou lwm e.

⁸²Nang rui nrianhloumei tiguang tangcloumei ta, “Tabui nungc rui nang ata nkhavlou nina cho?” twna amik phaengc nnang the.

⁸³Ai hei ganc patloumei zouc muanc kumc gaeng mak khe; kum sini ai nang latdanv guay ta amuc mak ge.

⁸⁴Asaanh tingsaengcna ai nkhwan bam nina cho? Ata raimei nunc ta nang tabui nungc rui dandi tiilou nina cho?

⁸⁵Daihriw swmei nunc, nang latdanv piu makmei nunc rui akhang khunh chaulou the.

⁸⁶Nang latdanv guay hei suai zat mak ge; meic nunc rui saraamhpui lat sana ata rai e, ata nkhavlou o!

⁸⁷Kaniw ata swluai changh puni the, tiki ai nang latdanv guay ta ntaamvlou mak ge.

⁸⁸Ai nang latdyn guay piu bam khang, nang rui taek makna nzianlou bammei paan rui, apanty kanlou o.

⁸⁹He RINGHPOUC, nang lat tingsaeng nai puni; mi hei tingkauh khou tingsaeng nai e.

⁹⁰Nang latdyng meickin guayna khou kalaih mak ge; nang rui kandih ta kabamv khou lou the, kumna mi hei ntipna nai bam e.

⁹¹Nang latzan thei layna ramh katana aseic nganv nai bam e, kalam thu mi guay hei nang bangc nunc e.

⁹²Nang latdanv khou ai neihlana bam mak khwan e thei, ai ryanramei khou rui theic kan ni tuang di the.

⁹³Nang latdyn guay ta ai ntaamv zat lak ge, kalam thu mi guay tei rui ata tiringclou bam tuang e.

⁹⁴Ai hei nang tuang e; ata kanlou o! Ai nang latdanv guay piu khang karamc e.

⁹⁵Meicsimei nunc ata swluai khang nchwan bam e, tiki ai nang latdyn guay makumh bam ni.

⁹⁶Ramh katana nthuih thik mak ge; tiki nang latdanv guay thu nthuih thik ge twmei ai thay e.

⁹⁷Nang latdanv ta ai adih nzian cho! Ai mi ti hei neihmaryn kakhanh e.

⁹⁸Nang latdanv hei alung khou nai tanh tan e, kumna mi rui ata zauczihmei nunc suangc ata ti-ntaklou e.

⁹⁹Ai hei ata nchamloumei nunc suangc kabahthay mbu e, kalam thu ai nang latdyn guay tei makumh e.

¹⁰⁰Ai gaanvthaih nunc suangc ni ntak mbu the, kalam thu ai nang latdanv guay piu e.

¹⁰¹Simei kheiliak guay khou rui ai pak duak the; kalam thu ai nang lat piu nii e.

¹⁰²Nang latdyn guay tei ai ntaamv mak ge, kalam thu nang kahak hei ata nchamloumeipu e.

¹⁰³Nang latdyn hei adih ndeih cho, nkhuaihdui suangc ndeih e!

¹⁰⁴Nang latdyn guay khou rui ai ningtyng laatow e, kumna simei kheiliak guay ta ai karaeng e.

¹⁰⁵Nang lat hei aphay khang maibungc e, achaeng khang gaanhmei e.

¹⁰⁶Nchumhmei nang latdyn guay tei piu khang swloumei, kalaic dat lakmei alatdyng tei ai ngaek ni.

¹⁰⁷He RINGHPOUC, ai kanganv tangcna ryanra the; nang latdyng thei layna ata titheiclou rio.

¹⁰⁸Atuang thuanckumei ravsuai hei laalou o, he RINGHPOUC, khatni nang latdyn guay akhou dinclou o.

¹⁰⁹Apanty abaancpav khou kazum bam e; tiki nang latdyn amuc mak ge.

¹¹⁰Meicgay makmei nunc rui akhang phah zawlou e, tiki ai nang latdanv guay liam mak ge.

¹¹¹Nang latdanv guay hei atuang tingsaeng lanv e; mi guay hei alung khang neihlamei e.

¹¹²Ai ringh saanv nang latdanv guay piu khang alung ding the.

¹¹³Nang khou na lunghlouna bam makmei nunc ta ai karaeng e, tiki ai nang latdyn ta nzian e.

¹¹⁴Nang hei ata dinggaekloumeipu khatni gaekloumeipu e; ai nang latdyng khou lwmgay e.

¹¹⁵Akhou rui tat pat kan o, he paapc padikmei nangniw, ai aRacguangc latdanv guay piu ni.

¹¹⁶Nang rui nrianhloumei kumcna, akhou pumtan tiilou o, kum pwkhou ai ringc puni; ai rigwn bammei hei tiguang tangclou o.

¹¹⁷Ai kabiu kabaeng mak khang ata houlou o, kumna ai kaganv thuic nang latdanv guay khou lunghlou bam ni.

¹¹⁸Nang latdyn guay tei piu makmei kathuic ta nang rui ganc pat re; kaniw tuang meicguatmei raeng guay tei gaeng mak ge.

¹¹⁹Nang rui meicsimei guayna ta, laa nuh makna ganc patmei puat ta kumc ganc pat the, kumna ai nang latdyn guay ta nzian e.

¹²⁰Nang ta pingna ai kadunh e, khatni ai nang latzan ta ping e.

¹²¹Ai nchumhmei khatni gaymei taanc e; ata zauczihmei nunc baanc khou ata ganclou rio.

¹²²Nang bangc ta nkhavlou puni twmei latdyng swlou o, kagaengh swmei nunc ta ata tirailou rio!

¹²³Nang rui kanlou nimei ta phaengcna, nang rui kanpatlou khang nrianhloumei ta phaengcna, amik phaengc nnang the.

¹²⁴Taek makmei nang ramzian thei layna akhou taanclou o, khatni nang latdanv guay akhou dinclou o.

¹²⁵Ai hei nang bangc e; nang latdanv guay tei ai thay khang akhou kabahthaymei tiilou o.

¹²⁶He RINGHPOUC, ntaw hei nang taanv sinthaulou khang kaganv the, kalam thu meic nunc nang latdanv piu mak khe.

¹²⁷Ai nang latdanv guay ta kachaekc ta suangc kahaw e, kachaekc nthanmei ta suangc sini kahaw e.

¹²⁸Kumna ai nang latdyn guay tei piu e; ai nkhuaimei taanv guay ta karaeng e.

¹²⁹Nang latdanv guay hei charyn e; ai mi guay tei alung kapwm rui piu e.

¹³⁰Nang latdyn guay kabac dincloumei rui tigaanclou e khatni mpangmei khou ningtyng tiilou e.

¹³¹Nang latdanv guay ta kahawna nkhwan e, amwang hahna nkhwan e.

¹³²Akhou karih guanglou o, nang rui nzianmei guay khou taanclou kanmei tei kumcna, ata zauc-nzianlou o.

¹³³Nang rui nrianhloumei kumcna, bow nimei khou rui ata kanlou o; ata simei rui tingamlou rio.

¹³⁴Ai nang latdanv guay piu bam khang, ata raimei nunc khou rui ata kanlou o.

¹³⁵Nang zawpaanv tei nang bangc ruc khou gaanclou o, khatni nang latdyn guay akhou dinclou o.

¹³⁶Amikdui hei duithuak kumc luangc key the; kalam thu meic nunc hei nang latdanv piu mak khe.

¹³⁷Nang hei nchumhmei e, he RINGHPOUC, khatni nang latzan hei nzih e.

¹³⁸Nang rui tiiloumei chap guay hei gay nthuih e khatni nchumh e.

¹³⁹Alungpuam hei akhou mai kumc chuangc bam e; kalam thu ata zauczihmei nunc nang latdanv guay ta thouhsw mak ge.

¹⁴⁰Nang latdyng hei suai zat mak ge, mi ti hei ai adih nzian cho!

¹⁴¹Ai hei ramhkhat na sini hamh the, ati hei ganc patlou the; tiki ai nang latdyn guay tei thouhsw mak tuang sw mak ge.

¹⁴²Nchumhmei nang chap hei, tingsaeng nchumh bam puni; khatni nang latdyn hei nzih tan bam puni.

¹⁴³Ai hei ryanramei khatni lungh geihmei rui padik ge, tiki nang latdanv guay rui akhang neihlamei phungc guang e.

¹⁴⁴Nang latdyn hei nzih tan e; akhou kabahthaymei tiilou o, kum pwkhou ai ringc puni.

¹⁴⁵Alung kapwm rui ai nang ta kaw e; akhou dawlou o, he RINGHPOUC, kumna ai nang latdanv guay piu ni!

¹⁴⁶Ai nang ta kaw e, ata kanlou o; kum pwkhou nang latdanv guay piu ni.

¹⁴⁷Ata nkhavlou khang, neih pat makmei hu khou ai nang ta kaw e; ai nang latdyng khou rigwn e.

¹⁴⁸Nang rui nchamloumei guay tei makumhna, ai zipri thuy makna zingbangc saanvsaengh aliau thangc e.

¹⁴⁹Kalam thu nang ramzian hei taek mak ge, akhwan nkinglou o, he RINGHPOUC; nang ramzian lyanlou o, kumna apanty kanlou o!

¹⁵⁰Zauzian thay makmei ata raimei nunc, nang latdyn piu zat makmei nunc ana guang the.

¹⁵¹Tiki nang akhou ana bam e, he RINGHPOUC, khatni nang latdanv guay hei tingsaeng e.

¹⁵²Nang latdanv lam khou ai reynungc rui thay the; nang rui mi guay hei tingsaeng tiilou the.

¹⁵³Ai ryanra bammei hei zauclou o, kumna ata kanlou o, kalam thu ai nang latdyn ta thouhsw mak tuang sw mak ge.

¹⁵⁴Akhang sa gaeklou o kumna ata mpatlou o; nang latdyng thei layna ata kanlou o.

¹⁵⁵Meicsimei nunc ta kanlou lak ge, kalam thu kaniw nang latdyn guay piu mak ge.

¹⁵⁶Tiki, he RINGHPOUC, nang ramzian hei daic e; nang rui zauc nzianlou o khatni ata kanlou o!

¹⁵⁷Ata zauczihmei khatni rairiumei geic e, tiki ai nang latdyn guay piu e.

¹⁵⁸Mi lwmnuh makmei nunc ti hei ai zauc pwkhou, ai lunghpuamhmei rui padik ge, kalam thu kaniw nang latdyn guay piu mak ge.

¹⁵⁹Nang latdyn guay ta tei ai adih nzian cho, he RINGHPOUC! Nang ramzian kalaic zat mak ge, kumna ata kanlou o.

¹⁶⁰Nang lat guay hei nchumh e, nchumhmei nang latzan guay hei tingsaeng e.

¹⁶¹Ngamv naimei nunc rui nchumh makna ata adow e, tiki ai nang latdyn ta champouh e.

¹⁶²Nang latdyng guay khou tei ai adih neihla cho, lanv geicna laatowmei kumc neihla e.

¹⁶³Saraamhmei twmei guay ta ai karaeng e khatni chany e, tiki ai nang latdyn ta nzian e.

¹⁶⁴Zaeng neihkhat khou ai nang ta, nchumhmei nang latzan guay khang, thuancku liang chanei e.

¹⁶⁵Nang latdyn ta nzianmei nunc khang daihmei chuzaenghmei nai e, khatni kaniw ta tibow nimei tuang ramhkhat sini maek ge.

¹⁶⁶Ata kanlou khang ai nang ta nkhwan e, he RINGHPOUC; khatni nang latdyn ai piu e.

¹⁶⁷Nang latdyn guay tei ai piu e; mi guay tei alung kapwm rui nzian e.

¹⁶⁸Nang latdanv guay khatni latdyn guay ai piu e, ai taanhmei guay nang how e.

¹⁶⁹Ata nkhavlou khang ai kapna huaymei nang pamv tangc diu, he RINGHPOUC! Nang rui nrianhloumei kumcna akhou kabahthaymei tiilou o.

¹⁷⁰Ai huayneymei chulou o, khatni nang latdyng thei layna ata kanlou o!

¹⁷¹Ai kaganv thuic nang ta thuanc ni, kalam thu nang rui akhou nang latdyn guay nchamlou the.

¹⁷²Ai nang latdyn lam khou suan ni; kalam thu nang latdanv guay hei nzih e.

¹⁷³Ata nkhavlou khang kaganv thuic chamdaanvlou o, kalam thu ai nang latdanv guay piu e.

¹⁷⁴Nang rui kanloumei ta ai adih kahaw cho, he RINGHPOUC!

¹⁷⁵Nang latdyn khou akhang neihlamei nai e, ai nang ta thuanh khang ata tiringclou o; nang latdyn rui ata nkhavlou o.

¹⁷⁶Ai hei tat maanmei lauziu kumc ruan tat the, kumna guangna nang bangc ata phulou o, kalam thu ai nang latdyn ta thouhsw mak tuang sw mak ge.