Read Rongmei Naga KALUMLU 132 Bible Online

KALUMLU 132 - Rongmei Naga bible

KALUMLU 132

¹He RINGHPOUC, David ta khatni kamei khaengv kanmei ryanramei guay tei amuclou rio.

²He RINGHPOUC, kamei rui swlou kanmei latdyng tei ningtowlou o, tancbauhmei Jakob Racguangc nang khou kamei rui swlou kanmei latdyng tei:

³“Ai akai khou gut lak ge khatni zip lak ge,

⁴Ai amik tanguihna zip ri zat lak ge,

⁵Tancbauhmei Jakob Racguangc kai khang, Ravguangc bamv khang, Ai kasiamhlou mak saanv.”

⁶Latdyng Khuk lam tei aniw Bethlehem khou chu the, khatni aniw hei tei Jearim ramvpuk khou ariw the.

⁷“RINGHPOUC kai thangc aniu tat kho; aniu kaguangc bamvpaeng mav khou kalum kho,” twna aniw sa khwan e.

⁸He RINGHPOUC, nang ngamv tuang Latdyng Khuk thei, Ravkai khou nang lay guanglou o, kumna mi khou tei tingsaeng bamlou o.

⁹Nang tuang amuc nunc ravchaptatmei pheybaan kumc piu diu: nang mei nunc neihlana kauc diu!

¹⁰Nang rui nang bangc David khou latdyng swlou the; nang rui thauhteyloumei guangc ta ganc patlou rio, he RINGHPOUC.

¹¹Nang rui David khou kalaic dat lakmei latdyng, ganc dat lakmei latdyng kumna swlou the: “Ai rui nang nac mpouh pang khou gaanv khat ta guangh tiswlou puni, kamei nang thei thangc nang phaan lyn puni.

¹²Nang nac mpouh nunc rui alatdyng khatni ai rui kaniw khou tiimei latdanv guay tei piu chuyna piu bam e thei, kaniw nac mpouh nunc ni tingsaeng nang guangc bamvpaeng khou dungc bam puni.”

¹³RINGHPOUC rui Zaion ta kadahlou the; kamei rui mi ti hei kalungbamv sw nii e:

¹⁴“Mi hei ai tingsaeng lungclou nipui bamv e; mi hei ai guanghtu bam nipui bamv e.

¹⁵Ai rui Zaion khang taektw mphamh mphahna tiilou puni; mi khou hei lungc bammei, lungcsimei nunc ta titu nggulou puni.

¹⁶Katuang amuc nunc ta kaniw tuang taanv guay khou ai rui suaihiamlou puni, kumna kamei nunc neihlana lusuan puni khatni kauc puni.

¹⁷Ai rui Zaion khou David kikta pang khou gaanv khat ta guangh daihmei tiswlou puni; ai rui thauhteyloumei guangc ta mi khou tei kandih tisin bam puni.

¹⁸Ai rui kata zauczihmei nunc ta zakmei rui duamliamlou puni; tiki kaguangcdic mu daic thau puni khatni gay thau puni.”