Read Rongmei Naga KALUMLU 135 Bible Online

KALUMLU 135 - Rongmei Naga bible

KALUMLU 135

¹RINGHPOUC ta thuanc o, kazanh ta thuanc o, nangniw RINGHPOUC tuang kasiamruaimei nunc,

²RINGHPOUC kai, aniu Racguangc tuang Ravkai khou ding bammeithiu.

³RINGHPOUC ta thuanc o, kalam thu kamei hei gay e; kazanc thuancna suan o, kalam thu kamei hei zauzianthay e.

⁴Kamei rui Jakob ta kakhang, Isarael ta katuang sw khang kadahlou the.

⁵Aniu RINGHPOUC hei daic e twmei ai thay e, rav kaguayna khang suangc daic e.

⁶Tingkauh khou khatni kandih khou, duipui khou khatni duipui syng thangc kamei rui kamei ningmei tei taanc e.

⁷Kamei rui pwanzingh muangc kandih tin thangc rui phungc guang e; kamei rui pwanzingh khang tingpalikmei damclou e, khatni kamei rui mpwan ta mpwankai khou rui mpat pat re.

⁸Kamei rui Izip khou maansei khatni khouringh nareimei guay ta swluai khwan e.

⁹Guangh khatni katuang meicdaihmei nunc ta dandi tii khang, mi khou tei kamei rui charynmei sw nchinmei khatni charynmei taanv mpeyna taanclou khwan e.

¹⁰Kamei rui zaatc mpeyna ta swmutlou khwan e, khatni baengtanc rihlianghmei guangc mpeyna ta swluai khwan e:

¹¹Amormei guangc Sihon, Bashanmei guangc Og, khatni Kanaanmei guangc nunc ta swluai khwan e.

¹²Kamei rui kaniw tuang ramv guay, kamei nunc khang tii khwan e; kamei rui mi guay tei Isarael khang tii khwan e.

¹³He RINGHPOUC, nang zanc tingsaeng nai bam puni; meickin guay khou nang zanc gaymei nai bam puni.

¹⁴RINGHPOUC rui kamei nunc ta gaeklou puni, kamei rui kabangc nunc ta zauc nzianlou puni.

¹⁵Zentelmei nunc tuang ravmaengc nunc hei daandi kachaekc tuang de; mi guay tei maansei baanc rui kasiamh tuang de.

¹⁶Kaniw mwang nai e, tiki sa ngam mak ge; mik nai e, tiki how mak ge.

¹⁷Kaniw nu nai e, tiki chu mak ge; kaniw thiu ni laa ngam mak ge.

¹⁸Kaniw ta kasiamhloumei nunc khatni mi khou tei lwmloumei guay tei, kaniw rui kasiamhloumei ravmaengc nunc tei kumc kan diu!

¹⁹RINGHPOUC ta thuanc o, he Isaraelmei nunc; kata thuanc o, he Ravguangc amuc nunc!

²⁰RINGHPOUC ta thuanc o, he Levimei nunc; kata thuanc o, he kata kalummei nunc!

²¹RINGHPOUC ta Zaion khou thuanc o, kakai Jerusalem khou thuanc o. RINGHPOUC ta thuanc o!